બે વર્ષ બાદ લગનસરાનો ધમધમાટ ચરમસીમાએ

કોરોના પછી ગુજરાતમાં આ પહેલું વર્ષ છે જ્યારે લગ્નનો ધમધમાટ વધી ગયો છે. અલબત્ત કોરોનાને કારણે હોટલ અને રિસોર્ટ્સના પાટીયા પડી ગયા હતા. દોઢથી બે વર્ષ સુધી આ સ્થિતિ રહી હતી. સરકારે ધીમે ધીમે તેમાં છૂટ આપી હતી. 2020 પછી છેક અઢી વર્ષે સ્થિતિ નોર્મલ થવામાં આવી છે. કોરોના કાળમાં ટૂંકમાં અને પાંચ પચ્ચીસ માણસોની હાજરીમાં ઉતાવળે લગ્નના સમારોહ યોજાઈ જતાં હતા. કેટલીકવાર ઉત્સાહી મહેમાનો તૈયાર થઈને લગ્ન સ્થળે પહોંચ્યા હોય તે પહેલા જ લગ્નના સમારોહ પૂરા થઈ ગયા હોવાના કિસ્સા ગયા વરસે બન્યા હતા. જો કે હવે આ સ્થિતિ પૂર્વવત થઈ ગઈ છે. કોરોનાનો ભય ઓસરી ગયો છે. લોકો દિલથી લગ્નોમાં મહાલી રહ્યા છે, અને લગ્ન યોજનારા બિગ ફેટ ઈન્ડિયન વેડિંગને છાજે તેમ મન મૂકીને ખર્ચ પણ કરી રહ્યા છે. ફાઈવસ્ટાર હોય કે થ્રી સ્ટાર હોય કે પછી સેવન સ્ટાર હોટેલ હોય, દરેકના બુકિંગમાં અકલ્પનીય વધારો આવી ગયો છે. રિસોર્ટ્સના બુકિંગમાં ઊછાળો આવ્યો છે. ગયા વર્ષે પણ થોડો ધમધમાટ હતો, પરંતુ કોરોનાનો સંપૂર્ણ નહતો ઓસર્યો. તેથી લોકોએ જિંદગીના આ અત્યંત મહત્વના પ્રસંગને મન મૂકીને માણ્યો જ નહોતો. હવે સ્થિતિ નોર્મલ થતા લોકો ફરી ધામધૂમથી લગ્ન કરવાનું પસંદ કરી રહ્યા છે.

આ વાતનો પડઘો પાડતા અમદાવાદ નજીક આવેલા કેન્સ વિલેના ફાઉન્ડર પ્રમોટર જક્ષય શાહ કહે છે, “કોરોના કાળ અને ગયા વર્ષની તુલનાએ આ વર્ષે વેડિંગ ફંક્શન અને વેડિંગ રીલેટેડ ફંક્શનના બુકિંગમાં 100 ટકાનો વધારો થયો છે. અમારા કેન્સ વિલેનો એર ક્વોલિટી ઇન્ડેક્સ ખાસ્સો સુધરી ગયો હોવાથી પણ વધુને વધુ લોકો તેમાં વેડિંગ અને વેડિંગ રીલેટેડ ફંક્શન માટે આવવાનું વધુ પસંદ કરતાં થયા છે.”

આ વર્ષ પરિસ્થિતિ અલગ જ છે. અમદાવાદ શહેરના સાણંદ નજીક આવેલા ગુલમહોર રિસોર્ટ્સના પ્રમોટર ત્રિલોક પરીખના પુત્ર અપૂર્વ પરીખ કહે છે, “ગયા વર્ષ જાન્યુઆરીમાં ફરી કોરોનાનો ભય ફેલાયો તેથી સુધરવા માંડેલી સ્થિતિ પર બ્રેક લાગી ગઈ હતી. આ વર્ષે ગયા વર્ષની તુલનાએ આ વરસે 20 ટકા વધુ બુકિંગ જોવા મળી રહ્યું છે. NRI મોટી સંખ્યામાં ઇન્ડિયા આવી રહ્યા છે.

નવેમ્બરની વાત કરવામાં આવે તો રિસોર્ટ્સમાં રોજ કોઈને કોઈ ફંક્શન હોવાનું જોવા મળ્યું છે. આગામી મહિનાઓમાં પણ આ સ્થિતિ રહેવાની શક્યતા રહેલી છે. બીજું અત્યાર સુધી છ બાર મહિના પૂર્વેથી બુકિંગ કરાવતા હતા, હવે માંડ એક બે મહિના પહેલા તપાસ ચાલુ કરીને બુકિંગ કરાવવાનું વલણ વધી રહ્યું છે. લગ્ન કે સંગીત સંધ્યા જેવા લગ્ન નિમિત્તના કોઈને કોઈ ફંક્શનનું બુકિંગ મળ્યા જ કરે છે.” જોકે સાઉન્ડ પરમિશન આપવાના નિયમ થોડાક કડક જણાય છે. તેમાં અડધો એક કલાકનું રિલેક્શેસન આપવામાં આવે તો લોકો બહુ જ સારી રીતે તેમના ફંક્શનને માણી શકશે.

ડેસ્ટિનેશન વેડિંગનો ટ્રેન્ડ પણ મજૂબૂત બન્યો છે. અમદાવાદના યુવાનો ડેસ્ટિનેશન વેડિંગ માટે ગોવા, ઉદેપુર, જેસલમેર જેવા લોકેશન્સ પર પસંદગી ઉતારી રહ્યા છે. હા કેટલાક અમદાવાદી કપલ્સ જૂનાગઢ જવાનું પણ પસંદ કરતાં હોવાનું જોવા મળે છે. જ્યારે સૌરાષ્ટ્રના યુવાનો સાસણગીરમાં જઈને ડેસ્ટિનેશન વેડિંગ કરવાનું પસંદ કરે છે. જૂનાગઢની પરિસરના 150 કિલોમીટરની રેન્જમાંથી લોકો સાસણગીરમાં ટુ નાઈટ થ્રી ડેઝના પેકેજ સાથે ડેસ્ટિનેશન વેડિંગ માટે રિસોર્ટ્સ બુક કરાવી રહ્યા છે. હા, કેટલાક તેમના ઘરથી 50-100 કિલોમીટર દૂર આવેલા રિસોર્ટ્સમાં ટુ નાઈટ થ્રી ડેઝના પેકેજ લઈને ડેસ્ટિનેશન વેડિંગનો આનંદ માણે છે.

વેડિંગ ફોટોગ્રાફી કરતી ધ રેડ સર્કલ સ્ટુડિયોના ફાઉન્ડર પ્રમોટર મિહિર મહેતા કહે છે, “ગુજરાતથી હવે લોકો નોર્થ ઇન્ડિયાના કુલુ-મનાલી, લેહ-લડાખ સુધી ડેસ્ટિનેશન વેડિંગ કરવા તૈયાર થવા માંડ્યા છે. વિદેશમાં દુબઈ, અબુધાબી અને ટર્કી સુધી પણ ડેસ્ટિનેશન વેડિંગ માટે ગુજરાતીઓ જાય છે.”

ગુજરાતમાં આ સીઝનમાં અંદાજે 1 લાખ લગ્ન થવાના છે. દેશમાં અંદાજે 25 લાખ મેરેજ થવાના છે. એક લગ્નમાં સરેરાશ રૂ. 7 થી 25 લાખના ખર્ચનો અંદાજ માંડવામાં આવે તો આ વર્ષે મેરેજ પાછળ ગુજરાતમાં અંદાજે રૂ. 2500થી 3000કરોડથી વધુનો બિઝનેસ જનરેટ થાય તેમ જણાય છે. ઈન્ડસ્ટ્રીના લોકો તો તેનાથીય વધુ બિઝનેસ જનરેટ થવાનો અંદાજ મૂકી રહ્યા છે. તેમાં બેન્ક્વેટ બુકિંગ, હોટેલ્સ બુકિંગ, ડ્રેસ અને ક્લોધિંગ, જ્વેલરી શો રૂમ્સ, કેટરર્સ અને ઇવેન્ટ મેનેજમેન્ટ માટેના ખર્ચનો સમાવેશ થાય છે.

જ્વેલરી બિઝનેસ ધમધોકારઃ

અમદાવાદની જ્વેલરીના ક્ષેત્રમાં મોટો શૉ રૂમ ધરાવતા એ.બી. જ્વેલર્સના પ્રમોટર-ડિરેક્ટર મનોજ સોની કહે છે, “સીઝન ખૂબ જ સારી છે. દાગીના માટે સતત નવી પૂછપરછો આવી રહી છે. ગોલ્ડના રેટ બહુ ઊંચા ગયા નથી. વૈશ્વિક પરિસ્થિતિ જોતાં ગોલ્ડના રેટ્સ સારા રહેવાની ધારણા છે જેને કારણે ઓર્ડર મળતા જ રહેશે તેવું જણાય છે. પહેલા ફક્ત અમેરિકા અને બ્રિટનમાંથી બિનિવાસી ભારતીયો અહીં પ્રસંગોમાં આવતા હતા. હવે કેનેડા, ઓસ્ટ્રેલિયા અને ન્યુઝીલેન્ડથી પણ લોકો લગ્નસરામાં ભારત આવતા થયા છે. આમ પણ ગુજરાતીઓ વિશ્વના લગભગ બધા જ દેશોમાં વસે છે. તેઓ ગુજરાત આવે ત્યારે ઘરેણાની લેવાલી આપણે ત્યાં થયા જ કરે છે. ફેબ્રુઆરીના અંત સુધી જ્વેલરી બિઝનેસમાં ધમધમાટ જોવાય તેવી શક્યતા છે.”

દબાવેલી સ્પ્રિંગ જેમ બમણા જોરથી ઉછળે એમ કોરોનાનો ભય સાવ ઓસરી જતા હવે લોકો અભૂતપૂર્વ ઉત્સાહથી લગ્નનું આયોજન કરી રહ્યા છે. લોકો લગ્ન-પ્રસંગોમાં મન મૂકીને ખર્ચ કરી રહ્યા છે, અને તેમાં મહાલવા જનારા લોકો પણ દિલ ખોલીને શોપિંગ કરી રહ્યા છે. રંગેચંગે યોજાનારા આ ઉત્સવોનો લાભ વેડિંગ ઈન્ડસ્ટ્રી સાથે જોડાયેલા લગભગ સૌને મળી રહ્યો છે.

અમદાવાદની જ્વેલરી શોપ જ્વેલ પ્લસના ડિરેક્ટર જયકુમાર બેગાની કહે છે, “ગયા વર્ષની તુલનામાં આ વરસે ઘરાકીમાં અને વેચાણમાં 30થી 40 ટકા જેટલો વધારો થયો છે. તેમાંય ખાસ કરીને ગોલ્ડ, ડાયમંડ ને પોલકીના દાગીનાની જોરદાર ડિમાન્ડ છે. છેલ્લા પંદર જ દિવસમાં વેચાણમાં ગયા વરસની તુલનાએ 40 ટકાનો વધારો આવી ગયો છે. આ સ્થિતિમાં વેચાણ વધે તે માટે અમે જુદાં જુદાં વિસ્તારમાં અને શહેરોમાં એક્ઝિબિશનનું પણ આયોજન કરી રહ્યા છીએ. અમારા એક્ઝિબિશનને પણ સારામાં સારો પ્રતિભાવ મળી રહ્યો છે.”

કેટરિંગના બિઝનેસને પણ તડાકો પડ્યો

કેટરિંગના વ્યવસાયમાં અમદાવાદમાં મોટું નામ ધરાવતા ગોરધન થાળ અને ગોરમો જેવી હોટેલ ધરાવતા ગોરધન મહારાજ કહે છે, “ગયા વર્ષે માર્કેટ ખૂલ્યું પછી ફરી કોરોનાનો ભય ફેલાતા ઓર્ડર કેન્સલ થઈ ગયા હતા. આ વરસે ઓર્ડર સારા મળી રહ્યા છે. પરંતુ એક દિવસમાં બહુ બહુ તો ચાર પાંચ ઓર્ડર લઈ શકાય. લગ્નના મૂહુર્તના દિવસોએ પાંચથી સાત ઓર્ડર મળી રહ્યા છે. ઉદાહરણ આપીને વાત કરવામાં આવે તો 25, 26 અને 27 નવેમ્બરે અને 8, 9 અને 10મી ડિસેમ્બરે બહુ જ લગ્નો છે. આ દિવસોમાં પાંચ પાંચ ઓર્ડર કે તેનાથીય વધુ ઓર્ડર મળી જાય છે. પરંતુ તે લેવાની ક્ષમતા પણ હોવી જરૂરી છે. બીજી તરફ તે સિવાયના એટલે કે મુહૂર્તના દિવસ સિવાયના દિવસો કોરાં જઈ રહ્યા છે. છતાંય માર્કેટ આ વરસે ઘણું જ સારું છે. તેમાં 20થી 25 ટકાનો સુધારો જોવા મળી રહ્યો છે.”

વેડિંગ ફોટોગ્રાફીનો બિઝનેસ જોરમાંઃ

રેડ સર્કલ સ્ટુડિયોના પ્રમોટર અને વેડિંગ ફોટોગ્રાફર મિહિર મહેતા કહે છે, “ગુજરાતીઓ પાસે સ્પેન્ડિંગ પાવર તો હતો જ હતો. કોરોનાને કારણે ધંધા અટકી ગયા હોવાથી સ્પેન્ડિંગ પર બ્રેક લાગી હતી. પરંતુ હવે બેક ટુ નોર્મલ જેવી સ્થિતિ જોવા મળી રહી છે. લોકો મન મૂકીને ખર્ચ કરી રહ્યા છે. તેથી જ ગયા વર્ષની તુલનાએ આ વરસે 20થી 30 ટકા ઓર્ડર વધ્યા છે. લોકો મસ્તીથી ખર્ચ કરી રહ્યા છે. બીજી તરફ કોરોનાને કારણે બે વર્ષ સુધી ધંધાથી વંચિત રહેલા વેડિંગ ફોટોગ્રાફર્સ, ઇવેન્ટ મેનેજર કે પછી કેટરર્સ મેક્ઝિમમ ઓર્ડર્સ મેળવી લઈને તેમની બે વર્ષની નુકસાનીને સરભર કરી રહ્યા છે. આવતું વર્ષ પણ આવુ જ જાય તેવા અણસાર મળી રહ્યા છે.”

વેડિંગ ફોટોગ્રાફી અને વિડીયોગ્રાફી એક જમાનામાં લક્ઝરી ગણાતી હતી. પરંતુ હવે દરેક કપલ સારી ફોટોગ્રાફી કરાવવા ઈચ્છે છે. સમાજના દરેક વર્ગમાં પ્રીવેડિંગ ફોટોગ્રાફી અને વિડીયોગ્રાફી નોર્મલ બની ગયા છે. છેલ્લા બે વર્ષની સરખામણીમાં વેડિંગ ફોટોગ્રાફર્સના બુકિંગમાં આ વરસે 20થી 30 ટકાનો વધારો થયો છે.

પ્રી વેડિંગ ફોટોગ્રાફી અને વિડીયોગ્રાફીની વાત કરતાં મિહિર મહેતા કહે છે, “ગુજરાતી કપલ્સ કચ્છ ભુજની આસપાસ માંડવી બીચ પર, દીવ, ઉદેપુર, આબુ અને ગોવા પ્રીવેડિંગ ફોટોગ્રાફી માટે જવાનું પસંદ કરે છે. હવે નોર્થ ઇન્ડિયામાં પણ પ્રીવેડિંગ શૂટ્સ કરાવવા લોકો જવા માંડ્યા છે. ઘણા કપલ્સ મનાલી, લેહ-લડાખ, અરુણાચલ પ્રદેશ, અંદામાન-નિકોબાર પણ પ્રી વેડિંગ શૂટ્સ માટે જવાનું પસંદ કરતાં થયા છે. વિદેશમાં દુબઈ પ્રીવેડિંગ માટે હોટસ્પોટ છે. તેનાથીય આગળ વધીને વાત કરીએ તો દુબઈ, તુર્કસ્તાન કે અબુધાબી, માલદિવ્સ સહિતના ડેસ્ટિનેશન પર ફોટોગ્રાફી કરવા માટે જવાનું પસંદ કરનારાઓ જોવા મળી રહ્યા છે. જૂનાગઢની 150 કિલોમીટરની પરિસરમાં રહેનારા ડેસ્ટિનેશન વેડિંગ માટે સાસણગીર જવાનું પસંદ કરવા માંડ્યા છે.”

પ્રિ વેડિંગ શૂટ માટે સુંદર લોકેશન્સ પૂરા પાડતા વિલાની બોલબાલાઃ

જો પ્રિ વેડિંગ શૂટ માટે ગુજરાત બહાર ન જવું હોય તો ગુજરાતમાં જ એવા વિલા છે જ્યાં ફોટોશૂટ્સ માટે રમણીય સેટ્સ ઊભા કરવામાં આવ્યા છે. રસ્ટિક વિલા અને લા ફેબ્યુલોસ પ્રિ વેડિંગ શૂટ માટે કપલ્સના ફેવરિટ બની રહ્યા છે. વેડિંગ ફોટોગ્રાફી કરતી ધ રેડ સર્કલ સ્ટુડિયોના ફાઉન્ડર મિહિર મહેતા કહે છે, “સાણંદના લા ફેબ્યુલોસમાં કંટ્રી કે સિટી બેઝ સેટ બનાવેલા છે. એક સેટ ગ્રીસના સેક્ટોરીનાનું છે. તેના પર ફોટોગ્રાફી કે વિડીયોગ્રાફી કરાવી હોય તો ગ્રીસ જઈને ફોટોશૂટ કરાવ્યું હોય તેની ફિલ આપે છે.”

લા ફેબ્યુલોસોના ફાઉન્ડટર-પ્રમોટર શીમોલી શાહ કહે છે, “તેમણે હાઉસ ઓફ વિન્ડસર, જેસલમેર પેલેસ, ઉદેપુર સહેલિયો બાડી, પદ્માવત મુવીમાં બતાવેલી સ્ટેપવેલ-વાવ, જયપુર સિટી પેલેસ-વ્હાઈટ એન્ડ બ્લ્યુ, રોયલ મોગલ પેલેસ, સ્વિસ હાઉસ, આઈરિશ પબ, લંડન હાઉસ, વિરાટ અનુષ્કાના લગ્નનું લોકેશન ટસ્કની, રેડવેલ્વેટ-સબ્યસાચીના શૉ રૂમ જેવો હોલ, યુરોપિયન હાઉસ જેવો હોલ, મોડર્ન વુડન, લા રાન્ચ, બાકેર સ્ટ્રીટ, અલ્બરોબેલુ, સ્ટ્રીટ, મોરોક્કો પેલેસ, ક્રોએશિયન સ્ટ્રીટ, ટ્રેવી ફાઉન્ટેઈન, રોમાનિયન ઓલ્ડ ટાઉન, રોમન ગઝેબો, વેનિસ સ્ટ્રીટ, પિયાનો ફેન્ટસી જેવા લોકેશન્સના સેટ્સ ઊભા કરેલા છે. પરિણામે યુરોપિયન કંટ્રીની ફેમસ સ્ટ્રીટમાં પ્રી વેડિંગ શૂટ્સ કરાવ્યું હોવાનો અહેસાસ અપાવે છે. ” શીમોલી શાહ વધુમાં જણાવે છે કે પ્રી વેડિંગ ફોટોશૂટ્સ અને વિડીયોગ્રાફી કરાવનારાઓનો ગયા વર્ષ જેટલો જ પ્રતિભાવ મળે છે. જો કે કેટલાંક કપલ્સ મર્યાદિત બજેટને કારણે આવા વિલા બુક કરાવતા ખચકાતા હોવાથી હાલ તેમણે રેટમાં કોઈ વધારો કર્યો નથી.

આણંદમાં આવેલું રસ્ટિક વિલા પણ પ્રિ વેડિંગ શૂટ માટે લોકપ્રિય લોકેશન છે. જે કપલ્સ કુદરતી લોકેશન્સ પર ફોટોગ્રાફી કરાવવા માંગતા હોય તેમના માટે રસ્ટિક વિલા પહેલી પસંદ બની રહે છે. અહીં આર્કિટેક્ચર અને લાઈટિંગ્સની દ્રષ્ટિએ બહુ જ સારી સુવિધા સાથેના લોકેશન્સ જોવા મળી રહ્યા છે. રસ્ટિક વિલામાં નાની નાની ફિલ્મ્સના શૂટિંગ્સ પણ થઈ રહ્યા છે. ક્લોધિંગ, એપરલ્સ, જ્વેલરીનો સહિતના પ્રોડક્ટ્સની જાહેરાત બનાવવા માટેના શૂટિંગ્સ પણ રસ્ટિક વિલામાં થઈ રહ્યા છે. જોકે તેના ચાર્જમાં પણ આ વરસે 25 ટકા સુધીનો વધારો આવી ગયો છે. તેમાં દિવસના બારથી પંદર કલાક સુધી શૂટિંગ કરવાની સુવિધા આપવામાં આવે છે. આ ગાળા દરમિયાન કપલ્સ અને ફોટોગ્રાફર્સને ખાવા, પીવાથી માંડીને આરામ કરવા સહિતની તમામ સુવિધાઓ સચવાય છે.

સુરતમાં પિક્સોસિટીએ આ ટ્રેન્ડનો આરંભ કર્યો હતો. વાસ્તવમાં ડાયમંડ સિટી અને ટેક્સટાઈલના હબ તરીકે સુરત જાણીતું છે. ફેશનને લગતા શૂટિંગ્સ અને ગોલ્ડ ડાયમંડ જ્વેલરીના પ્રમોશન્સ જાહેરાતો બનાવવા લોકેશન્સની જરૂર પડે છે. આ લોકેશન્સ મળી રહે તે માટે જ પિક્સોસિટી તૈયાર કરવામાં આવ્યું હતું. તેના પછી જ ગુજરાતમાં પ્રીવેડિંગ ફોટોગ્રાફી અને વિડીયોગ્રાફી માટેના લોકેશન્સ પૂરા પાડતા ડેસ્ટિનેશન્સ ડેવલપ થયા છે. જોકે પિક્સોસિટીમાં જનારાઓનું કહેવુ છે કે પિક્સોસિટીનું મેઈન્ટેનન્સ આજની તારીખે જોઈએ તેવું જણાતું નથી. તેથી તેથી આણંદ અને સાણંદના લોકેશન્સની ડીમાન્ડ વધી રહી છે.