અમેરિકન ડોલરની મજબૂતી ને મોંઘવારીની ચિંતાથી ભારતમાં સોનાનો ભાવ ગગડીને રૂ.1.27 લાખ સુધી આવી શકે
આજના સમયમાં સોનાના ભાવ પર ઘણા પરિબળો અસર કરી રહ્યા છે. મજબૂત અમેરિકન ડોલર અને વધતી મોંઘવારીની ભીતિને કારણે છેલ્લા અઠવાડિયામાં સોનાના ભાવમાં નોંધપાત્ર ઘટાડો જોવા મળ્યો હતો. રૂ. 1.70 લાખ સુધી જઈ આવેલો સોનાનો ભાવ બે દિવસ પહેલા રૂ. 1.58 લાખ થઈને આજે તેનાથી નીચે ઉતરી રૂ. 1.44ની સપાટીએ આવી ગયો છે.
અમેરિકા અને ઇઝરાયેલી મળીને ઇરાન પર આક્રમણ કર્યું ત્યારે દસ ગ્રામ સોનાનો ભાવ રૂ. 1.60 લાખનો હતો. આજે સોનાનો ભાવ ઘટીને રૂ. 1,44,825 પ્રતિ 10 ગ્રામ પર આવી ગયો છે. આંતરરાષ્ટ્રીય બજારમાં ટ્રોય ઓંસ દીઠ 5200 ડૉલરના મથાળે પહોંચેલું સોનું લગભગ $4,574 પ્રતિ ઔંસ પર આવી ગયું છે. આમ તેમાં અંદાજે 525 ડૉલરનું ગાબડું પડી ચૂક્યું છે.
સોના ચાંદીના બજારના વિશેષજ્ઞોનું માનવું છે કે ભારતમાં ભાવ દસ ગ્રામ સોનાના ભાવ ઘટીને રૂ. 1,27,000 સુધી નીચે આવી શકે છે. વૈશ્વિક સ્તરે લગભગ $4,250 પ્રતિ ઔંસ સુધી ઘટાડો આવવાની શક્યતા જોવાઈ રહી છે.
પશ્ચિમ એશિયામાં યુદ્ધને કારણે ક્રૂડ ઓઈલ- કાચા તેલના ભાવ વધી રહ્યા છે. તેથી વિશ્વના દેશોમાં મોંઘવારી વધી રહી છે. તેથી સોનાના ભાવ પર દબાણ આવી રહ્યું છે. સોનાનો ભાવ મજબૂત ડોલરને કારણે પણ તૂટી રહ્યો છે. યુદ્ધના માહોલમાં અમેરિકન ડોલરની ડિમાન્ડ ચોમેરથી વધી જતાં અમેરિકી ડૉલર મજબૂત બન્યો છે. સોનામાં રોકાણ કરનારા રોકાણકારો પણ ડોલર તરફ વળી રહ્યા છે. તેથી સોનાની ડિમાન્ડ ઘટી રહી છે. પરિણામે ભાવમાં ગાબડાં પડી રહ્યા છે.
વિશ્વની મોટી બેન્કોએ યુદ્ધના કાળમાં અપનાવેલી નીતિ પણ સોનાના ભાવના ઘટાડા માટે જવાબદાર બનતી હોવાનું માનવામાં આવે છે. અમેરિકાની ફેડરલ રિઝર્વ બેન્ક અને બ્રિટનની બેન્ક ઓફ ઇન્ગ્લેન્ડની નીતિની અસર પણ સોનાના ભાવ પર જોવા મળી રહી છે. બેન્કો વ્યાજ દર ઘટાડવા બદલે વધારવાની કોશિશ કરી રહી છે અથવા તો સ્થિર રાખે તેવી શક્યતા જણાઈ રહી છે. વ્યાજદર ઊંચા જાય તેમ તેમ સોનામાં કરવામાં આવતું રોકાણ ઓછું થવા માંડે છે.
તેથી જ અત્યાર સોનાના બજારમાં ઘટાડાની ચાલ જોવા મળી રહી છે. સોનાના ભાવમાં જોવા મળતી મોટી વધઘટ પણ આ જ સ્થિતિને આભારી છે. નજીકના સમયમાં સોનું દસ ગ્રામ દીઠ રૂ. 1.40 લાખથી રૂ. 1.47 લાખની રેન્જમાં રહેવાની સંભાવના જણાય છે.
ટેક્નિકલ વિશ્લેષકોના મતાનુસાર સોનું રૂ.1.65–1.70 લાખની સપાટીએ મજબૂત પ્રતિકાર સપાટી ધરાવે છે. સોનું રૂ. 1.35 લાખની સપાટીએ ટેકો ધરાવે છે. રૂ. 1.27 લાખ સંભવિત નીચામાં નીચી સપાટીએ રહે તેવી શક્યતા છે. સોનાના ભાવ હાલમાં દબાણ હેઠળ છે.
