ફ્યુઅલ-એફિશિયન્સીના નવા નિયમો અને વૈશ્વિક ટેસ્ટિંગ સિસ્ટમથી જાન્યુારીથી દરેક કાર મોંઘી બનશે, માઈલેજ ઘટશે
પહેલી એપ્રિલ, 2027થી ભારત સરકાર હાલની મોડિફાઈડ ઇન્ડિયન ડ્રાઇવિંગ સાઈકલ-એમઆઈડીસી ટેસ્ટિંગ પદ્ધતિને બદલીને વધુ કડક વૈશ્વિક ટેસ્ટિંગ સિસ્ટમ ડબ્લ્યુએલટીપી લાગુ કરશે. તેની સાથે જ કોર્પોરેટ એવરેજ ફ્યુઅલ એફિશિયન્સી-કાફે-3ના નિયમો પણ વધુ કડક બનાવવામાં આવશે.
આ બંને ફેરફારોના કારણે નાની મોટરકાર અને એસયુવી તથા ઇલેક્ટ્રિક વાહનોનું સત્તાવાર માઈલેજ અને ડ્રાઇવિંગ રેન્જ દસથી બાર ટકા સુધી ઓછી થઈ શકે છે. તેમ જ નવી ટેક્નોલોજી અપગ્રેડના કારણે વાહનોની કિંમતમાં વધારો થવાની શક્યતા પણ રહેલી છે.
ઉદાહરણ આપીને વાત કરીએ તો હાલમાં 25 કિમી પ્રતિ લિટર માઈલેજ દર્શાવતી પેટ્રોલ કાર નવા ટેસ્ટિંગ હેઠળ 21થી 22 કિમી પ્રતિ લિટર સુધી આવી શકે છે. જ્યારે 500 કિમી રેન્જ દર્શાવતું ઇલેક્ટ્રિક વેહિકલ નવી સિસ્ટમ હેઠળ 430થી 450 કિમી રેન્જ સુધી સર્ટિફાઈ થઈ શકે છે.
પરિણામે ભારતીય ઓટોમોબાઈલ કંપનીઓ માટે આગામી 11 મહિના ખૂબ પડકારજનક બની શકે છે. પહેલાથી જ વધતા ઉત્પાદન ખર્ચ અને નબળી માંગ વચ્ચે હવે કંપનીઓએ વધુ કડક માઈલેજ ધોરણો, નવા ટેસ્ટિંગ સિસ્ટમ અને નફાકારકતા જાળવવાનું દબાણ સહન કરવું પડશે.
કારમાં શું નવા ફેરફારો આવશે?
મોટરકારના નિષ્ણાત વિશ્લેષકોનું કહેવું છે કે વિવિધ સેગમેન્ટની કારમાં અલગ અલગ ટેક્નોલોજી ઉમેરવાની જરૂર પડશે. નાના એન્ટ્રી લેવલ કાર એટલ કે મારુતિ સુઝુકી અલ્ટો અને રેનો ક્વિડ જેવી કારમાં વધુ અદ્યતન એન્જિન સોફ્ટવેર, હાઈ-પ્રેશર ફ્યુઅલ ઇન્જેક્ટર્સ અને નવા સેન્સર્સ ઉમેરવાની જરૂર પડી શકે છે. જેના કારણે પ્રતિ કાર રૂ.30,000થી રૂ. 50,000 સુધી ખર્ચ વધી શકે છે.
મારુતિ સુઝુકીની પ્રીમિયમ હેચબેક બલેનો અને હ્યુંડે આઈ-20માં ગેસોલિન પાર્ટિક્યુલેટ ફિલ્ટર, અપગ્રેડેડ કેટેલિટિક કન્વર્ટર અને માઇલ્ડ-હાઈબ્રિડ સિસ્ટમ ઉમેરવાથી રૂ.40,000થી રૂ.60,000 સુધીનો વધારાનો ખર્ચ થઈ શકે છે. તેમ જ સબકોમ્પેક્ટ એસયુવી કાર મારુતિ બ્રિઝા, ટાટા નેક્સોન, હ્યુંડે વેન્યુ અને ટાટા પંચ જેવી એસયુવીમાં એરોડાયનામિક સુધારા, એક્ટિવ ગ્રિલ શટર અને સ્ટાર્ટ-સ્ટોપ અથવા માઇલ્ડ-હાઈબ્રિડ સિસ્ટમ ઉમેરવી પડી શકે છે. જેના કારણે રૂ. 50,000થી રૂ.80,000 સુધી ખર્ચ વધી શકે છે.
હ્યુંડે ક્રેટા, કિયા સેલ્ટોસ, મારુતિ સુઝુકી ગ્રાન્ડ વિટારા, અને ટોયેટા અર્બન ક્રૂઝર હેયરીડરમાં મજબૂત હાઈબ્રિડ સિસ્ટમ અને વધુ અદ્યતન ટ્રાન્સમિશન ઉમેરવાથી પ્રતિ વાહન રૂ. 70,000થી રૂ.1 લાખ સુધી ખર્ચ વધી શકે છે. મોટી એસયુવી કારમાં મહિન્દ્રા એક્સયુવી 700, ટાટા સફારી, મહિન્દ્રા સ્કોર્પિયો, અને ટોયોટા ઇન્વોવા હાયક્રોસ જેવી મોટી ગાડીઓમાં સૌથી વધુ ખર્ચ વધવાની શક્યતા છે. તેમાં સ્ટ્રોંગ હાઈબ્રિડ સિસ્ટમ, ડ્યુઅલ એક્ઝોસ્ટ ટ્રીટમેન્ટ અને હલકા વજનના મટિરિયલનો ઉપયોગ કરવો પડશે. વધારાનો ખર્ચ રૂ.1.2 લાખથી રૂ. 2 લાખ સુધી પહોંચી શકે છે.
કાફે-3 અને ડબ્લ્યુએલટીપીની બેવડી અસર
કાફે-3 હેઠળ કંપનીઓ માટે સરેરાશ કાર્બન ઉત્સર્જનનું લક્ષ્ય વધુ કડક બનશે. બીજી તરફ ડબ્લ્યુટીએલપી ટેસ્ટિંગ સિસ્ટમ વધુ વાસ્તવિક ડ્રાઈવિંગ પરિસ્થિતિઓને આધારે માઈલેજ અને ઉત્સર્જન માપશે. નવી સિસ્ટમમાં વધુ ઝડપ, વધારે એક્સિલરેશન અને વાસ્તવિક રોડ પરિસ્થિતિઓનો સમાવેશ થવાથી માઈલેજ ઓછું અને કાર્બન ઉત્સર્જન વધારે દેખાશે. પરિણામે કાર ઉત્પાદકોને વધુ હાઈબ્રિડ ટેક્નોલોજી, હલકા મટિરિયલ અને એરોડાયનામિક ડિઝાઇન અપનાવવી પડશે.
ગ્રાહકો પર શું અસર પડશે?
નવા નિયમો હેઠળ ગ્રાહકોને કારના બ્રોશરમાં ઓછું માઈલેજ અને ઈલેક્ટ્રિક વેહિકલની ઓછી રેન્જ જોવા મળશે. તેમ જ નવી ટેક્નોલોજી ઉમેરવાના ખર્ચનો ભાર ગ્રાહકો પર આવી શકે છે, જેના કારણે વાહનોની કિંમતો વધી શકે છે.
નિષ્ણાતોના મતાનુસાર ડબ્લ્યુએલટીપી ટેસ્ટિંગ વાસ્તવિક ડ્રાઇવિંગ અનુભવને વધુ નજીકથી દર્શાવે છે. તેનાથી વાહન ઓછું કાર્યક્ષમ બનતું નથી, પરંતુ ટેસ્ટિંગ હવે વધુ વાસ્તવિક પરિણામ આપે છે. તેનો સીધો ફાયદો વૈશ્વિક બ્રાન્ડ્સને મળી શકે છે. મર્સિડીઝ બેન્ઝ, બીએમડબ્લ્યુ, ઓડિ, વોલ્વો અને લેક્સસ જેવી વૈશ્વિક કંપનીઓ માટે પરિવર્તન સરળ બની શકે છે, કારણ કે તેમની ઘણી કાર પહેલેથી ડબ્લ્યુએલટીપી સર્ટિફાઈડ છે. બીજીતરફ ટાટા મોટર્સ, મહિન્દ્રા એન્ડ મહિન્દ્રા અને મારુતિ સુઝુકી જેવી ભારતીય કંપનીઓ નવા ધોરણો માટે તૈયારીઓમાં વ્યસ્ત છે.
