દર્શન ઓર્ના ટેલિગ્રામ સ્ટોક મેનિપ્યુલેશન કેસમાં SEBIએ 5 લોકો પર રૂ. 3.10 કરોડનો દંડ ફટકાર્યો
આકાશ દોશી, કેવિન કાપડિયા, દિલીપ દોશી, રિચી દિલીપ દોશી અને કૃતિ કેવિન કાપડિયાની ભૂમિકા અંગે તપાસ કરી દંડ કરવામાં આવ્યો
માર્કેટ રેગ્યુલેટર સેબી દર્શન ઓર્ના લિમિટેડના શેરમાં ભાવ અને વોલ્યુમમાં ગેરરીતિપૂર્વક હેરફેર કરવાના આરોપમાં પાંચ વ્યક્તિઓને કુલ રૂ. 3.10 કરોડનો દંડ ફટકાર્યો છે. સેબીએ આ કાર્યવાહી શેરમાં સંકલિત ટ્રેડિંગ અને ટેલિગ્રામ ચેનલો મારફતે કરવામાં આવેલા પ્રમોશનલ મેસેજના આધારે હાથ ધરી હતી.
આ કેસમાં આકાશ દોશી, કેવિન કાપડિયા, દિલીપ દોશી, રિચી દિલીપ દોશી અને કૃતિ કેવિન કાપડિયાની ભૂમિકા અંગે તપાસ કરવામાં આવી હતી. તપાસ દરમિયાન સેબીને શંકાસ્પદ ટ્રેડિંગ પેટર્ન અને સોશિયલ મીડિયા પર શેર ખરીદવાની ભલામણો મળી આવી હતી.
સેબીના જણાવ્યા અનુસાર સંબંધિત વ્યક્તિઓએ શેરમાં ભારે ટ્રેડિંગ કરીને ટેલિગ્રામ ચેનલો પર સકારાત્મક મેસેજ ફેલાવ્યા હતા જેથી રિટેઈલ રોકાણકારોને આકર્ષી શકાય. આ ગતિવિધિઓના કારણે બજારમાં શેર પ્રત્યે ખોટી માંગ અને રસ હોવાનો ભાસ ઉભો થયો હતો.
સેબીની તપાસમાં જાણવા મળ્યું કે 24 ફેબ્રુઆરી 2022 અને 4 માર્ચ 2022ના રોજ ટેલિગ્રામ પર દર્શન ઓર્ના લિમિટેડના શેર ખરીદવાની ભલામણ કરાઈ હતી અને મોટા નફાના વાયદા કરવામાં આવ્યા હતા. આ મેસેજ બાદ શેરના ટ્રેડિંગ વોલ્યુમ અને ભાવમાં તેજી જોવા મળી હતી, પરંતુ બાદમાં શેરમાં ભારે ઘટાડો થયો હતો.
સેબીએ આરોપ મૂક્યો કે આકાશ દોશીએ પોતાના ખાતા ઉપરાંત પરિવારજનો દિલીપ દોશી અને રિચી દોશીના ખાતાઓ મારફતે પણ ટ્રેડિંગ કર્યું હતું. બીજી તરફ કેવિન કાપડિયાએ કૃતિ કાપડિયાના ખાતાનો ઉપયોગ કર્યો હોવાનો આરોપ છે. રેગ્યુલેટરે બેન્ક ટ્રાન્ઝેક્શન અને કૉલ ડેટા રેકોર્ડની પણ તપાસ કરી હતી. સેબીના જણાવ્યા અનુસાર નાણાકીય લેવડદેવડ અને વારંવાર થયેલા સંપર્કો દર્શાવે છે કે સંબંધિત લોકો વચ્ચે સંકલિત કામગીરી ચાલી રહી હતી.
સેબીએ જણાવ્યું કે આરોપીઓએ સિન્ક્રોનાઈઝ ટ્રેડ્સ, છેલ્લા સોદાઓની કિંમત અને નવા ઊંચા ભાવ તથા નાના પ્રથમ ટ્રેડ દ્વારા શેરના ભાવ અને માર્કેટ સેન્ટિમેન્ટને પ્રભાવિત કરવાનો પ્રયાસ કર્યો હતો. તપાસના સમયગાળા દરમિયાન દર્શન ઓર્ના લિમિટેડનો શેર આશરે રૂ. 64થી વધીને રૂ. 147 સુધી ગયો હતો અને ત્યારબાદ તેમાં મોટો ઘટાડો આવ્યો હતો.
સેબીએ નોંધ્યું છે કે આ સમયગાળા દરમિયાન કંપનીમાં જાહેર હિસ્સેદારીમાં પણ નોંધપાત્ર વધારો થયો હતો, જે દર્શાવે છે કે રિટેઈલ રોકાણકારો પણ આ પ્રવૃત્તિમાં આકર્ષાયા હતા. રેગ્યુલેટરના અંદાજ મુજબ આ સમગ્ર ગેરરીતિથી જોડાયેલા લોકોે મળીને રૂ. 2.50 કરોડથી વધુનો નફો કમાયો હતો.
આ મામલો અગાઉ સિક્યોરીટી એપેલેટ ટ્રિબ્યુનલ સમક્ષ પડકારવામાં આવ્યો હતો. સિક્યોરિટી એપેલેટ ટ્રિબ્યુનલે કેસ ફરી વિચારવા સેબીને પરત મોકલ્યો હતો અને આરોપીઓને પોતાનો બચાવ રજૂ કરવાની તક આપવા સૂચના આપી હતી. આરોપીઓએ તમામ આરોપો નકારી કાઢ્યા હતા. તેમનું કહેવું હતું કે ટ્રેડિંગનો બજાર પર અસરકારક પ્રભાવ નહોતો અને તેમાં છેતરપિંડી સાબિત થતી નથી. તેઓએ વધુમાં દલીલ કરી હતી કે કમાયેલો નફો કાયદેસર રીતે જાહેર અને ટેક્સ હેઠળ દર્શાવવામાં આવ્યો હતો.
પરંતુ સેબીએ જણાવ્યું કે ટ્રેડિંગ પેટર્ન, નાણાકીય સંબંધો અને ટેલિગ્રામ આધારિત શેર પ્રમોશનને એકસાથે જોતા શેરમાં ગેરરીતિપૂર્વક હેરફેર કરવાનો સંકલિત પ્રયાસ સ્પષ્ટ થાય છે, જે સેબી એક્ટ અને પીએફયુટીપીના નિયમોનું ઉલ્લંઘન છે. કેસની તમામ પરિસ્થિતિઓ અને ગેરકાયદેસર કમાણીના સમયમૂલ્યને ધ્યાનમાં રાખીને સેબીએ સેબી એક્ટની કલમ 15 એચએ હેઠળ કુલ રૂ. 3.10 કરોડનો દંડ ફટકાર્યો છે.
