કોમર્શિયલ ગેસ સિલિન્ડરની નવી કિંમત મુજબ 19 કિલનો કોમર્શિયલ એલપીજી સિલિન્ડરનો વર્તમાન ભાવ રૂ. 3071.50થી વધીને 3113.50 થઈ જશે

ભારતની સૌથી મોટી સરકારી તેલ રિફાઇનિંગ અને માર્કેટિંગ કંપની ઇન્ડિયન ઓઈલ કોર્પોરેશને 19 કિલોગ્રામના કોમર્શિયલ LPG સિલિન્ડરના ભાવમાં ₹42નો વધારો કરવામાં આવ્યો છે. પરિણામે નવી કિંમત મુજબ 19 કિલનો કોમર્શિયલ એલપીજી સિલિન્ડરનો વર્તમાન ભાવ રૂ. 3071.50થી વધીને 3113.50 થઈ જશે.

આ ભાવવધારો મુખ્યત્વે નીચેના વ્યવસાયિક ગ્રાહકોને અસર કરશે. તેમાં હોટેલ, રેસ્ટોરાં, કેટરિંગ વ્યવસાય, ઔદ્યોગિક એકમો, નાની ઉત્પાદન એકમો, બેકરી, ફૂડ પ્રોસેસિંગ યુનિટ્સ અને કોમર્શિયલ ધોરણે ચલાવવામાં આવતા ક્લાઉડ કિચન પર મોટી અસર પડશે. જોકે ઘરેલુ (14.2 કિલો) LPG સિલિન્ડરના ગ્રાહકો માટે આ જાહેરાત લાગુ પડતી નથી. પરંતુ તેમાં પણ ટૂંકા ગાળામાં નવો વધારો આવવાની શક્યતાને નકારી શકાતી નથી.

અન્ય તેલ કંપનીઓ પણ ભાવ વધારશે

ભારતમાં સામાન્ય રીતે ત્રણ મુખ્ય સરકારી પેટ્રોલિયમ કંપનીઓ છે. તેમાં ઇન્ડિયન ઓઈલ કોર્પોરેશને ભાવ વધારાની જાહેરાત કરી છે. તેને પગલે ભારત પેટ્રોલિયમ કોર્પોરેશન લિમિટેડ અને હિન્દુસ્તાન પેટ્રોલિયમ કોર્પોરેશન લિમિટેડ પણ ભાવ વધારો કરે તેવી સંભાવના રહેલી છે.

ગુજરાત અને અમદાવાદ પર શું અસર પડશે?

અમદાવાદ, સુરત, વડોદરા, રાજકોટ અને અન્ય શહેરોમાં રેસ્ટોરન્ટનો ગેસ ખર્ચ વધશે. કેટરિંગ સેવાઓનો ખર્ચ વધશે. તેથી લગ્ન માટે કેટરિંગ સેવા લેનારાઓનો ખર્ચ બોજ વધી જશે. હોટેલ ઉદ્યોગના ઓપરેશનલ ખર્ચમાં વધારો થશે. હોટેલમાં પીરસાતી વાનગીઓ મોંઘી થઈ જવાની સંભાવના છે. નાના ખાણીપીણી વ્યવસાયોની નફાકારકતા પર દબાણ આવી શકે છે. તેઓ પણ ભાવમાં વધારો કરી દેશે.

આગામી મહિનાઓમાં LPGના ભાવોમાં વધુ વધારો થશે તો ખાદ્યપદાર્થોના ભાવમાં વધારો

• બહાર જમવાના ખર્ચમાં વધારો
• નાના ઉદ્યોગોના ઉત્પાદન ખર્ચમાં વધારો જોવા મળી શકે છે.

કોઈ રેસ્ટોરન્ટ દર મહિને 50 કોમર્શિયલ સિલિન્ડર વાપરતી હોય તો તેનો બોજ નીચે મુજબ વધી જવાની શક્યતા છે

• વધારાનો ખર્ચ પ્રતિ સિલિન્ડર: રૂ.42
• માસિક વધારાનો ખર્ચ: રૂ. 2,100
• વાર્ષિક વધારાનો ખર્ચ: રૂ.25,200

મોટા હોટેલ અને કેટરિંગ વ્યવસાય માટે આ રકમ વધુ મોટી બની શકે છે.

• કોમર્શિયલ LPG સિલિન્ડર ₹42 મોંઘો થયો
• નવી કિંમત ₹3,113.50 પ્રતિ 19 કિલો સિલિન્ડર
• ઘરેલુ LPG સિલિન્ડરના ભાવમાં કોઈ ફેરફાર જાહેર થયો નથી
• હોટેલ, રેસ્ટોરન્ટ અને ઉદ્યોગોને સીધી અસર
• BPCL અને HPCL દ્વારા પણ સમાન ભાવવધારો થવાની શક્યતા