પ્રોજેક્ટના ખર્ચમાં થયેલા વધારા પ્રમાણે બિલ્ડર્સ-ડેવલપર્સ ૫થી ૧૦ ટકા સુધીનો પ્રોપર્ટીમાં ભાવ વધારો કરશે
પ્રોજેક્ટના ખર્ચમાં થયેલા વધારા પ્રમાણે બિલ્ડર્સ-ડેવલપર્સ ૫થી ૧૦ ટકા સુધીનો ભાવ વધારો કરવા સહમત થઈ ગયા
બાંધકામ ઉદ્યોગ માટેના કાચા માલના ભાવમાં 20 ટકાથી માંડીને 60 ટકા સુધીનો વધારો થઈ જતાં કોમર્શિયલ અને રેસિડેન્શિયલ પ્રોપર્ટીના ભાવ વધારવા પડ્યા
અમદાવાદઃ અમેરિકા અને ઇરાન વચ્ચેના યુદ્ધને કારણે બાંધકામ ઉદ્યોગ માટે જોઈતા સ્ટીલ, સિમેન્ટ, પેઈન્ટ, એલ્યુમિનિયમ સેક્શન સહિતની કાચા માલના ભાવમાં ૨૦થી માંડીને ૬૦ ટકા સુધીનો વધારો થઈ જતાં અને ભાવ ઘટવાનું નામ ન લેતા હોવાથી બિલ્ડર્સ અને ડેવલપર્સની બાંધકામની કિંમત વધી જતાં તેમણે ફ્લેટ્સ અને કોમર્શિયલ પ્રોપર્ટીના ભાવમાં મિનિમમ ૫ ટકાનો વધારો કરવાની આજે જાહેરાત કરી છે. પહેલી જુલાઈથી આ નવો વધારો લાગી પડશે, એમ ક્રેડાઈ-અમદાવાદ-ગાહેડના પ્રમુખ આલાપ પટેલે જણાવ્યું હતું.
ક્રેડાઈ-અમદાવાદ-ગાહેડના બિલ્ડર્સ અને ડેવલપર્સની આજે મળેલી બેઠકમાં પહેલી જુલાઈથી મિલકતના ભાવમાં ઓછામાં ઓછા ૫ ટકા અને વધુમાં વધુ ૧૦ ટકા વધારો કરવાનો નિર્ણય લેવામાં આવ્યો છે. બાંધકામ માટે જરુરી કાચો માલ સમયસર અને સતત ન મળતો હોવાથી બાંધકામના તમામ કામ નિયમિત આગળ ન વધી શકતા હોવાથી શ્રમિકોને નિયમિત કામ મળતું નથી. તેથી શ્રમિકો તેમના વતન ચાલ્યા ગયા છે. જે શ્રમિકો અહીં છે તેમણે તેમના ભાવમાં વધારો કરી દીધો છે.
ક્રેડાઈ ગાહેડ અમદાવાદના જનરલ સેક્રેટરી અંકુર દેસાઈનું કહેવું છે કે લેબરની અછતને કારણે બાંધકામના પ્રોજેક્ટ સમયસર પૂરા થઈ શકતા નથી. પરિણામે પ્રોજેક્ટ વિલંબમાં પડે તો રિયલ એસ્ટેટ રેગ્યુલેટરી ઓથોરિટી તરફથી દંડ કરવામાં આવે તેવું જોખમ પણ તોળાઈ રહ્યું છે. રેરા નક્કી કરી આપે તે મર્યાદામાં ફ્લેટ કે કોમર્શિયલ પ્રોપર્ટી ખરીદનારાઓને પઝેશન આપી દેવાનું હોય છે. તેમાં ચૂક થાય તો તે દંડને પાત્ર બને છે.
મિલકત ખરીદનારાઓ પર બિનજરુરી ખર્ચનું ભારણ ન વધે તે માટે બિલ્ડર્સ અને ડેવલપર્સે ત્રણ મહિના સુધી ભાવ વધારો ન કરવાની ધીરજ દાખવી છે. પરંતુ હવે કાચા માલના ભાવ વધારોને કારણે તેમની પાસે મિલકતના ભાવમાં વધારો કરવા સિવાય કોઈ ચારો જ રહ્યો નથી.
