ઇંટનો સપ્લાયનો ઓર્ડર લીધા પછી ડિલીવરી ન આપી વી.કે. બ્રિક્સનો માલિકોએ રૂ. 40 લાખની છેતરપિંડી કરી
અમદાવાદની બ્રિક્સ ફેક્ટરીના મેનેજર હિમાંશુ શાંતિલાલ ગોરની થલતેજના મીરાં એપાર્ટમેન્ટમાંથી ધરપકડ કરીને તેમને જેલને હવાલે કરી દેવામાં આવ્યા
અમદાવાદઃ શુક્રવારઃ વીએસસી એન્ટરપ્રાઈસને ઇંટનો સપ્લાય આપવા માટે રૂ. 40 લાખનું પેમેન્ટ લઈને ઇંટની ડિલીવરી જ ન આપનાર અને બોગસ બિલ બનાવીને ડિલીવરી આપી હોવાનું ઉપજાવી કાઢનાર અમદાવાદની બ્રિક્સ ફેક્ટરીના માલિક જશવંત વનમાળીદાસ પ્રજાપતિ અને તેમના પુત્ર મેહુલ જશવંત પ્રજાપતિ સામે ઉજ્જેનમાં ફરિયાદ નોંધવામાં આવી છે. છેતરપિંડી કરનારા જશવંત પ્રજાપતિ અને તેમના પુત્ર અમદાવાદના સિંધુભવન રોડ પર આવેલા અશ્વવિલાના 42 નંબરના બંગલોમાં રહે છે.આ ફરિયાદના અનુસંધાનમાં અમદાવાદની બ્રિક્સ ફેક્ટરીના મેનેજર હિમાંશુ શાંતિલાલ ગોરની થલતેજના મીરાં એપાર્ટમેન્ટમાંથી ધરપકડ કરીને તેમને જેલને હવાલે કરી દેવામાં આવ્યા છે. ઉજ્જૈનની પોલીસ તેમની ધરપકડ કરવા ઉજ્જૈનથી અમદાવાદ આવી હતી. હિમાંશુ ગોરને ચાર જુલાઈ સુધી પોલીસ કસ્ટડીમાં રાખવામાં આવ્યા હતા. તેમણે કોર્ટમાં કરેલી જામીન અરજી ફગાવી દેવામાં આવી છે.
ઉજ્જૈનના માધવનગર પોલીસ સ્ટેશનમાં આપેલી આપેલી ફરિયાદમાં જણાવવામાં આવ્યું હતું કે પાંચ લાખ ઇંટની સપ્લા આપવા માટે વી.કે. બ્રિક્સ ફેક્ટરીને નામે રૂ. 25 લાખનો ચેક અને બાકીના 15 લાખનો ચેક વી.કે. લોજિસ્ટીકના નામે આપવામાં આવ્યો હતા. પરંતુ ઇંટની ડિલીવરી આપી હોવાનું દર્શાવવા માટે તેમણે બોગસ બિલો ઊભા કરી લીધા હતા. આમ ડિલીવરી આપ્યા વિના જ ડિલીવરી આપી દીધી હોવાનો દેખાવ કરીને રૂ.40 લાખની છેતરપિંડી કરી હતી.
પરિણામે ઉજ્જૈનની કંપની વીએસસી એન્ટરપ્રાઈસ પ્રાઇવેટ લિમિટેડ નામની કંપનીના પ્રમોટર મુકેશ વ્યાસે ઉજ્જૈનમાં ફરિયાદ કરી હતી. આ ફરિયાદના અનુસંધાનમાં ઉજ્જૈનની પોલીસે તપાસ કરીને આરોપી મેહુલ જશવંત પ્રજાપતિ અને જશવંત પ્રજાપતિ સામે તપાસ ચાલુ કરતાં તેઓ અન્ડરગ્રાઉન્ડ થઈ ગયા હતા. સપ્ટેમ્બર 2025થી પિતા-પુત્ર ફરાર થઈ ગયા હોવાથી પોલીસે ફેક્ટરીના મેનેજર હિમાંશુ ગોરની 30મી જૂને ધરપકડ કરી ઉજ્જૈની જેલમાં મોકલી આપવામાં આવ્યા હતા. રૂ. 40 લાખની છેતરપિંડીના મુખ્ય આરોપી જશવંત પ્રજાપતિ અને મેહુલ પ્રજાપતિ હજી આજે પણ ભાગેડું છે.
