ગ્લેન્ડ ફાર્માના શેર્સના રોકાણકારોએ હવે શું કરવું જોઈએ?

ગ્લેન્ડ ફાર્મા મુખ્યત્વે જેનરિક ઇન્જેક્ટેબલ્સ બનાવતી અને ફાર્માસ્યુટિકલ આઉટસોર્સિંગના ક્ષેત્રે કામ કરતી મોટી કંપની છે. કોરોના કાળ બાદ આ શેરમાં ભારે ઉતાર-ચઢાવ જોવા મળ્યો છે. ઓગસ્ટ ૨૦૨૧માં રૂ. ૪,૩૦૦ ની સર્વોચ્ચ સપાટી વટાવ્યા બાદ, માંગ ઘટવાથી જૂન ૨૦૨૩માં આ શેર ઘટીને રૂ. ૯૩૦ સુધી આવી ગયો હતો. જોકે, હવે કંપનીની સ્થિતિ સુધરી રહી છે અને શેર રૂ. ૨,૪૭૫ ની આસપાસ ટ્રેડ થઈ રહ્યો છે.

રોકાણકારો માટે સલાહ: શેર ખરીદવો, વેચવો કે રાહ જોવી?

મુખ્ય ભલામણ: રોકાણકારોએ આ શેરમાં અત્યારે એકસામટું  મોટું રોકાણ કરવાને બદલે, બજારમાં આવતા કોઈપણ ઘટાડા કે કરેક્શન સમયે ધીમે-ધીમે આ શેર એકઠો કરવો જોઈએ. કંપનીનું વેલ્યુએશન હાલમાં તેના ૧ વર્ષના ફોરવર્ડ અર્નિંગ્સ કરતાં ૩૧ ગણું (31x P/E) છે, જે તેના ૫ વર્ષની સરેરાશ (૨૮ ગણું) કરતાં વધારે છે. આ પ્રીમિયમ વેલ્યુએશનના કારણે, જો કંપનીના કામકાજમાં સહેજ પણ ખામી આવશે તો શેર ઘટી શકે છે. તેથી, ઘટાડા પર ખરીદી કરવાથી રોકાણકારોને સુરક્ષા મળશે.

કંપનીની વૃદ્ધિ પાછળના ૩ મુખ્ય કારણોઃ GLP-1 ડાયાબિટીસ માર્કેટ માટે મોટી તૈયારી

ડાયાબિટીસ અને વજન ઘટાડવા માટેની પ્રખ્યાત દવાઓના પેટન્ટ આગામી ૨૦૨૬ થી ૨૦૩૦ વચ્ચે પૂરા થઈ રહ્યા છે. ગ્લેન્ડ ફાર્માએ આ તક ઝડપવા માટે પોતાની ફિલ-ફિનિશ ક્ષમતા વાર્ષિક ૪ કરોડ યુનિટથી વધારીને ૧૪ કરોડ યુનિટ કરી દીધી છે. કંપનીએ આ માટે અત્યાર સુધીમાં ૮ કોન્ટ્રાક્ટ સાઇન પણ કરી લીધા છે, જે આગામી ૩ થી ૫ વર્ષમાં મોટી કમાણી કરાવી આપશે.

 અમેરિકાની માર્કેટમાં નવી પ્રોડક્ટ્સ લોન્ચિંગ

કંપનીએ ફાઇનાન્સિયલ યર ૨૦૨૬માં અમેરિકામાં ૩૧ નવી પ્રોડક્ટ્સ લોન્ચ કરી છે અને વર્ષ ૨૦૨૭માં પણ અઆ સિલસિલો ચાલુ રહેશે. અમેરિકાની મોટી સંસ્થાઓ  સાથે થયેલા જેનરિક દવાઓના કોન્ટ્રાક્ટને કારણે કંપનીની આવક સતત વધતી રહેશે. આ ઉપરાંત, ૨૦૨૮ થી નવા ૩ મોટા આઉટસોર્સિંગ પ્રોજેક્ટ્સ પણ શરૂ થશે.

૩. યુરોપિયન કંપની સેનેક્સીમાં રિકવરી

ગ્લેન્ડ ફાર્માએ એપ્રિલ ૨૦૨૩માં ફ્રાન્સની સેનેક્સી કંપની ખરીદી હતી, જેના કારણે શરૂઆતમાં નફાના માર્જિન પર ખરાબ અસર પડી હતી. પરંતુ હવે પરિસ્થિતિ સુધરી રહી છે. કર્મચારીઓ અને ખર્ચના મેનેજમેન્ટ દ્વારા ગત ક્વાર્ટરમાં સેનેક્સીનું માર્જિન વધીને ૨ ટકા થયું છે. આ માર્જેિન પહેલા નેગેટિવ હતું. કંપની આગામી વર્ષમાં આ માર્જિન વધારીને ૧૫ ટકાની આસપાસ લઈ જવા માંગે છે, જે ફાયદાકારક સાબિત થશે.

કંપનીની નાણાકીય સ્થિતિ 

વિગત	પ્રદર્શન / સ્થિતિ (FY23-26)
આવક વૃદ્ધિ (Revenue CAGR)	૧૩% ની વાર્ષિક વૃદ્ધિ (વર્ષ ૨૦૨૬માં ₹૬,૪૩૧ કરોડ)
EBITDA વૃદ્ધિ	૧૭% વાર્ષિક વૃદ્ધિ દર
નાણાકીય સદ્દરતા	કંપની સંપૂર્ણપણે નેટ કેશ (Net Cash) ધરાવે છે અને દેવાના બોજથી મુક્ત છે.
ભવિષ્યનું આયોજન	કંપની આગામી ૫ વર્ષમાં પ્લાન્ટના વિસ્તરણ માટે ₹૨,૦૦૦ કરોડનું મૂડીરોકાણ (Capex) કરશે.

ધ્યાનમાં રાખવાના જોખમો

• ઊંચું વેલ્યુએશન: શેર અત્યારે મોંઘા વેલ્યુએશન પર ટ્રેડ થઈ રહ્યો હોવાથી કંપનીના પરિણામો ધારણા કરતાં નબળા આવશે તો શેરમાં મોટો કડાકો આવી શકે છે.

• ભૂતકાળની વોલેટિલિટી: આ શેરમાં અગાઉ મોટો ઘટાડો જોવા મળ્યો છે, તેથી સામાન્ય રોકાણકારોએ આક્રમક ખરીદીથી બચવું જોઈએ.