સપ્ટેમ્બરમાં ફેડ વ્યાજદરમાં વધારાની વધતી શક્યતાઓની ભારતીય શેરબજાર પર અસર પડી શકે
ફેડરલ રિઝર્વ બેન્કના નિર્ણયનું પરિણામ: ફેડના વિભાજિત નિર્ણયથી સંકેત મળે છે કે વ્યાજદરમાં વધારો ટૂંક સમયમાં આવી શકે છે
અમેરિકાની ફેડરલ રિઝર્વ બેન્કના ઘટનાક્રમને કારણે રાતોરાત યુએસ બોન્ડ યીલ્ડ અને યુએસ સ્ટોક્સમાં ઘટાડો નોંધાયો હતો.
અમદાવાદઃ અમેરિકાની ફેડરલ રિઝર્વ બેન્ક આગામી સમયમાં નીતિ કડક કરવાનો નિર્ણય લે છે, તો તે યુએસ ડોલરને મજબૂત કરી શકે છે અને કમોડિટીઝ તથા ઉભરતા બજારોની અસ્કયામતો પર દબાણ લાવી શકે છે. યુએસ ફેડ ચેરમેન કેવિન વૉર્શની આગેવાની હેઠળની FOMC એ યુએસ વ્યાજદર રાતોરાત 3.5–3.75 ટકા પર અપરિવર્તિત રાખ્યા છે. આ નિર્ણય મોટેભાગે અપેક્ષાઓ મુજબ જ હતો, પરંતુ સપ્ટેમ્બરમાં વ્યાજદરમાં વધારાની શક્યતાઓ વધી ગઈ છે. વિશ્લેષકોએ તુરંત ધ્યાન દોર્યું કે ગુરુવારનો નિર્ણય 9-3થી વિભાજિત હતો, જેમાં ત્રણ FOMC સભ્યોએ ફુગાવાને અંકુશમાં લેવા માટે વ્યાજદરમાં વધારાની તરફેણમાં મતદાન કર્યું હતું.
જીઓજિત ઈન્વેસ્ટમેન્ટ્સના ચીફ ઈન્વેસ્ટમેન્ટ સ્ટ્રેટેજિસ્ટ વી. કે. વિજયકુમારે ચેતવણી આપતા જણાવ્યું હતું કે, “આ વિભાજિત નિર્ણય સૂચવે છે કે ટૂંક સમયમાં વ્યાજદરમાં વધારો આવી શકે છે.” આ ઘટનાક્રમને કારણે રાતોરાત અમેરિકાના બોન્ડમાં મળતી યીલ્ડ એટલે કે વળતરમાં અને અમેરિકાના સ્ટોક્સમાં ઘટાડો થયો હતો. બીજીતરફ ભારત સહિતના એશિયન બજારોએ આ ઘટનાક્રમને અવગણવાનું પસંદ કર્યું, ત્યારે વિશ્લેષકોએ જણાવ્યું હતું કે અમેરિકી બોન્ડમાં મળનારા વળતર અને ડોલર ઇન્ડેક્સ એવી બાબતો છે જેના પર રોકાણકારોએ નજીકથી નજર રાખવી જોઈએ. છેલ્લા આંકડા મુજબ, અમેરિકાના 10 વર્ષની બોન્ડ યીલ્ડ-વળતર 4.7 ટકા પર હતું.
આયોનિક એસેટના ગ્લોબલ ઈન્વેસ્ટમેન્ટ્સના હેડ અંકિતા પાઠકે નોંધ્યું હતું કે નવા ફેડ ચેરમેને સક્રિયપણે ભવિષ્યનું માર્ગદર્શન (ફોરવર્ડ ગાઈડન્સ) આપવાનું ટાળ્યું છે અને તેના બદલે તેઓ બજારમાંથી બદલાતી મેક્રોઇકોનોમિક પરિસ્થિતિના સંકેતોની અપેક્ષા રાખે છે. સમિતિની અંદરના વિરોધાભાસી મંતવ્યો ફુગાવાના દ્રષ્ટિકોણની અનિશ્ચિતતાને દર્શાવે છે, જે આગામી મહિનાઓમાં ડેટા-આધારિત અભિગમ અપનાવવાના ફેડના વલણને વધુ મજબૂત બનાવે છે, તેમ તેમણે જણાવ્યું હતું. પાઠકે જણાવ્યું હતું કે, “જો ફેડ આગામી સમયમાં નીતિ કડક કરવાનો નિર્ણય લે છે, તો તે યુએસ ડોલરને ટેકો આપી શકે છે અને કમોડિટીઝ તથા ઉભરતા બજારની અસ્કયામતો પર દબાણ લાવી શકે છે.”
એક્સિસ ડાયરેક્ટના રિસર્ચ હેડ રાજેશ પાલવિયાએ જણાવ્યું હતું કે ભારતીય બજાર પર તેની તાત્કાલિક અસર માળખાકીય બનવાને બદલે સેન્ટિમેન્ટ-આધારિત હોવાની શક્યતા છે, કારણ કે યુએસની ઊંચી બોન્ડ યીલ્ડ વિદેશી પોર્ટફોલિયો પ્રવાહને અસ્થિર રાખી શકે છે. પ્રીમિયમ વેલ્યુએશન ધરાવતા ક્ષેત્રોમાં સમયાંતરે પ્રોફિટ બુકિંગ જોવા મળી શકે છે. આ અંગેના આંકડાઓ દર્શાવે છે કે સતત ચાર મહિનાના વેચાણ પછી જુલાઈમાં ભારતમાં FPIનો ચોખ્ખો પ્રવાહ રૂ. 9,613 કરોડ સાથે પોઝિટિવ બન્યો હતો. તે સકારાત્મક વલણ જોખમમાં મૂકાઈ શકે છે. જોકે, પાલવિયાને લાગે છે કે ભારતના મજબૂત સ્થાનિક મેક્રો ફંડામેન્ટલ્સ, સ્થિતિસ્થાપક કમાણીનો દ્રષ્ટિકોણ અને તંદુરસ્ત લિક્વિડિટી આવી અસરને હળવી કરવામાં મદદ કરશે.
જેએમ ફાઇનાન્શિયલે જણાવ્યું હતું કે પગલું ન ભરવાની સાથે ફેડની હોકિશ (કડક) ટિપ્પણીએ તેની વિશ્વસનીયતાને નુકસાન પહોંચાડ્યું છે. “બજારો હવે સપ્ટેમ્બર ’26માં વ્યાજદરમાં વધારાની 57 ટકા શક્યતા ગણી રહ્યા છે. અમારું માનવું છે કે વ્યાજદરમાં વધારો ડિસેમ્બર 2026 સુધી પાછળ ઠેલાશે; ત્યાં સુધી, અમને લાગે છે કે નીતિ કડક કરવાનું કામ લિક્વિડિટીના માર્ગે હાથ ધરવું જોઈએ,” તેમ બ્રોકરેજે જણાવ્યું હતું. પાલવિયાએ રોકાણકારોને યુએસ બોન્ડ યીલ્ડ, ડોલરની હિલચાલ અને ક્રૂડ ઓઇલની કિંમતો પર નજીકથી નજર રાખવાની સલાહ આપી હતી, જે સાથે મળીને ભારતીય શેરબજારની નજીકના ગાળાની દિશા નક્કી કરશે.
