DGFTએ બાકી રહેલા પ્રી શિપમેન્ટના પેન્ડિંગ સર્ટિફિકેટ ક્લિયર કરવા નિકાસકારોને 7 દિવસની મુદત આપી

હવે તપાસના 2 જ દિવસમાં આપવું પડશે સર્ટિફિકેટઃ નવી સિસ્ટમમાં બે દિવસનો સમય વિતી જશે તો સિસ્ટમ આપોઆપ સર્ટિફિકેટ જનરેટ કરવાનો ઇનકાર કરી દેશે, જેથી નવેસરથી આખી પ્રક્રિયા કરવી પડી શકે છે

અમદાવાદઃ ડિરેક્ટોરેટ જનરલ ઓફ ફોરેન ટ્રેડે સિસ્ટમના નવા નિયમો અને ટેકનિકલ નિયંત્રણોના કારણે અટકી ગયેલા પ્રી-શિપમેન્ટ ઇન્સ્પેક્શન સર્ટિફિકેટ્સ-પીએસઆઈસીને ક્લિયર કરવા માટે 23 સપ્ટેમ્બર સુધીની મહેતલ આપી છે. ૨૫ ઓગસ્ટ, ૨૦૨૬ પહેલાં કરાયેલી તપાસ માટેના પેન્ડિંગ સર્ટિફિકેટ્સ ઈશ્યૂ કરવા માટે આ સમયમર્યાદ નક્કી કરવામાં આવી છે. ઉપરાંત ડિરેક્ટોરેજ જનરલ ઓફ ફોરેન ટ્રેડે નવા નિયમ હેઠળ હવેથી તપાસ (ઇન્સ્પેક્શન) પૂર્ણ થયાના માત્ર ૨ દિવસની અંદર જ પીએસઆઈસીને જનરેટ કરી ઈશ્યૂ કરી દેવાની કડક સમયમર્યાદા પણ નક્કી કરી દીધી છે. ફાર્મા ઉદ્યોગ, નિકાસકારો અને વેપાર ક્ષેત્રને કોઈ મોટું નુકસાન કે અડચણ ન પહોંચે તે માટે વાણિજ્ય મંત્રાલયે પ્રસ્તુત નિર્ણય લીધો છે.

સર્ટિફિકેટ ઈશ્યૂ ન થાય તો કેવા પ્રકારની મુશ્કેલીઓ આવી શકે?

જો માન્યતા પ્રાપ્ત એજન્સીઓ કે નિકાસકારો નિર્ધારિત સમયમર્યાદામાં સર્ટિફિકેટ રજૂ ન કરે તો તેમના શિપમેન્ટ બંદરો કે એરપોર્ટ પર કસ્ટમ્સ અધિકારીઓ દ્વારા રોકી દેવામાં આવશે. પરિણામે નિકાસ પ્રક્રિયા સંપૂર્ણપણે ઠપ્પ થઈ શકે છે. બીજું, પોર્ટ પર કન્ટેનરો પડ્યા રહેવાથી નિકાસકારો પર વધારાનો પોર્ટ સ્ટોરેજ અને કન્ટેનર ડેમરેજ-દંડનો આર્થિક બોજ વધશે.

ફાર્માસ્યુટિકલ ઉદ્યોગને મોટું નુકસાન

દવાઓ અને ફાર્મા પ્રોડક્ટ્સ સમયસર વિદેશી બજારોમાં ન પહોંચે તો સપ્લાય ચેઈન ખોરવાઈ શકે છે, જેનાથી આંતરરાષ્ટ્રીય સ્તરે ભારતીય નિકાસકારોની વિશ્વસનીયતા પર અસર પડી શકે છે. બીજી તરફ નવી સિસ્ટમમાં આપોઆપ જ પ્રમાણપત્ર ઇશ્યૂ થતાં હોવાથી હોવાથી બે દિવસનો સમય વિતી જશે તો સિસ્ટમ આપોઆપ સર્ટિફિકેટ જનરેટ કરવાનો ઇનકાર કરી દેશે. પરિણામે નિકાસકારે સર્ટિફિકેટ મેળવવા માટે નવેસરથી આખી પ્રક્રિયા કરવી પડી શકે છે.

વેપારીઓ, નિકાસકારો અને એજન્સીઓએ બચવા માટે શું કરવું?

આ મુશ્કેલીઓથી બચવા અને નિયમોનું પાલન સરળતાથી થાય તે માટે સંબંધિત સેક્ટરના લોકોએ નીચે મુજબના પગલાં લેવા જરૂરી છે.

જૂના બેકલોગનો તાત્કાલિક નિકાલ: ૨૫ ઓગસ્ટ, ૨૦૨૬ પહેલાં થયેલી તમામ તપાસ માટેના બાકી રહેલા પ્રીશિપમેન્ટ ઇન્સ્પેક્શન સર્ટિફિકેટ્સ આપેલા ૭ દિવસના ટ્રાન્ઝિશનલ વિન્ડો દરમિયાન જ ઈશ્યૂ કરી લેવાના રહેશે.

બે દિવસના નિયમનું ચુસ્ત પાલન: હવેથી નવી કોઈ પણ તપાસ થાય ત્યારે એજન્સીઓએ એ વાત સુનિશ્ચિત કરવી પડશે કે તપાસ પૂર્ણ થયાના ૪૮ કલાક (૨ દિવસ)માં જ ડિજિટલ સર્ટિફિકેટ અપલોડ થઈ જવું ફરજિયાત કરવામાં આવ્યું છે.

તપાસના સ્થળેથી જ સર્ટિફિકેટ અપલોડ કરવુંઃ ડિરેક્ટોરેટ જનરલ ઓફ ફોરેન ટ્રેડના નવા નિયમ મુજબ પ્રી શિપમેન્ટ ઇન્સપેક્શન સર્ટિફિકેટ ઇશ્યૂ કરવા માટે જે દેશ અથવા ભૌગોલિક સ્થળે તપાસ કરવામાં આવી હોય ત્યાંતી જ સર્ટિફિકેટ અપલોડ કરી દેવાનું ફરજિયાત કરી દેવામાં આવ્યું છે. આ વ્યવસ્થા ઊભી કરવાથી એજન્સીઓએ ટેકનિકલ લોકેશન સુસંગત રહે તે રીતે જ ઓનલાઈન એન્ટ્રી કરવી પડશે.

નવા સિસ્ટમ મોડ્યુલને સમજવું: ફાર્મા નિકાસકારો અને કસ્ટમ્સ બ્રોકર્સે ૨૫ ઓગસ્ટના રોજ જાહેર કરાયેલા ટ્રેડ નોટિસ નં. 22/2026-27 ના અન્ય તમામ નિયમોનું પાલન ચાલુ રાખવું પડશે કારણ કે મુદત સિવાયના બાકીના તમામ નિયમો યથાવત રાખવામાં આવ્યા છે.

ડિરેક્ટોરેટ જનરલ ઓફ ફોરેન ટ્રેડના ડેપ્યુટી ડિરેક્ટર જનરલ મનોજ કુમાર મીનાના જણાવ્યા અનુસાર, “નવી ડિજિટલ પ્રક્રિયાને સરળતાથી અમલમાં મૂકવા અને અગાઉના પેન્ડિંગ કિસ્સાઓનો સંતોષકારક ઉકેલ લાવવા માટે આ અસ્થાયી છૂટછાટ આપવામાં આવી છે, જેથી વ્યાપાર જગતને કોઈ તકલીફ ન પડે.”

પ્રી-શિપમેન્ટ ઇન્સ્પેક્શન સર્ટિફિકેટ શા માટે મહત્વનું છે?

આંતરરાષ્ટ્રીય વેપાર (ઇમ્પોર્ટ-એક્સપોર્ટ) ક્ષેત્રે, ખાસ કરીને ફાર્માસ્યુટિકલ (દવા) અને અન્ય સંવેદનશીલ ઉદ્યોગો માટે પીએસઆઈસી એક અત્યંત મહત્વપૂર્ણ દસ્તાવેજ છે. આ સર્ટિફિકેટના મુખ્ય મહત્વ અને કારણો નીચે મુજબ છે:

ગુણવત્તા અને ગુણવત્તાના ધોરણોની ખાતરી

આ સર્ટિફિકેટ એ વાતની અધિકૃત સાબિતી છે કે માલ જહાજ કે ફ્લાઇટમાં રવાના થાય તે પહેલાં તેની યોગ્ય તપાસ કરવામાં આવી છે. તે દર્શાવે છે કે નિકાસ કરવામાં આવતો માલ આંતરરાષ્ટ્રીય ધોરણો અને આયાત કરનાર દેશના ગુણવત્તાના નિયમોનું સંપૂર્ણ પાલન કરે છે.

કસ્ટમ્સ ક્લિયરન્સ માટે કાનૂની જરૂરિયાત

બંદરો અથવા એરપોર્ટ પર કસ્ટમ્સ અધિકારીઓ દ્વારા માલને દેશની બહાર જવાની કે અન્ય દેશમાં પ્રવેશે ત્યારે ક્લિયરન્સ આપવા માટે પીએસઆઈસીને માગવું ફરજિયાત હોય છે. આ સર્ટિફિકેટ વગર કસ્ટમ્સ વિભાગ માલને આગળ વધવા દેતો નથી.

ગેરકાયદેસર કે ખામીયુક્ત માલની નિકાસ પર રોક

દવાઓ જેવા સંવેદનશીલ ક્ષેત્રમાં અપ્રમાણિત, સબ-સ્ટાન્ડર્ડ (નિમ્ન ગુણવત્તાવાળી) કે ભેળસેળયુક્ત પ્રોડક્ટ્સ વિદેશ ન મોકલાય તે સુનિશ્ચિત કરવા માટે આ તપાસ અને સર્ટિફિકેટ ખૂબ જરૂરી છે. તેનાથી દેશની વેપારી છબી જળવાઈ રહે છે.

આંતરરાષ્ટ્રીય વેપારમાં પારદર્શિતા અને ટ્રેસેબિલિટી

DGFT ના નવા નિયમ મુજબ હવે જે સ્થળે (દેશ કે લોકેશન પર) તપાસ થઈ હોય ત્યાંથી જ સર્ટિફિકેટ ઓનલાઈન અપલોડ કરવાનું હોય છે. આનાથી ડિજિટલ સિસ્ટમમાં પારદર્શિતા આવે છે અને કોઈ ખોટા કે બનાવટી સર્ટિફિકેટ બનાવી શકતું નથી.

આર્થિક નુકસાન અને વિવાદોથી બચાવ

જો માલ યોગ્ય તપાસ વગર વિદેશ પહોંચી જાય અને ત્યાં ક્વોલિટી ટેસ્ટમાં રિજેક્ટ થાય, તો આખો માલ પરત લાવવો પડે છે અથવા નાશ કરવો પડે છે. પીએસઆઈસી નિકાસકાર અને આયાતકાર બંનેને આવા મોટા આર્થિક નુકસાન અને કાનૂની વિવાદોથી બચાવે છે.

ટૂંકમાં કહીએ તો, પીએસઆઈસીને એ આંતરરાષ્ટ્રીય બજારમાં ભારતીય માલસામાનની ગુણવત્તાનો ‘પાસપોર્ટ’ છે, જે વેપારને સુરક્ષિત અને ઝડપી બનાવે છે.

Share on Social Media

DGFTએ બાકી રહેલા પ્રી શિપમેન્ટના પેન્ડિંગ સર્ટિફિકેટ ક્લિયર કરવા નિકાસકારોને 7 દિવસની મહેતલ આપી

DGFTએ બાકી રહેલા પ્રી શિપમેન્ટના પેન્ડિંગ સર્ટિફિકેટ ક્લિયર કરવા નિકાસકારોને 7 દિવસની મુદત આપી

સર્ટિફિકેટ ઈશ્યૂ ન થાય તો કેવા પ્રકારની મુશ્કેલીઓ આવી શકે?