ઘટતા બજારમાં SIP બંધ કરવી એ સૌથી મોટો આર્થિક ફટકો

ઘટતા બજારમાં SIP બંધ કરવી એ સૌથી મોટો આર્થિક ફટકો

નરમાઈના બજારમાં શું કરવું તે અંગે રોકાણકારો માટે નિષ્ણાતોની મહત્વપૂર્ણ સલાહ

શેરબજારમાં નરમાઈનો દોર ચાલી રહ્યો છે. નિફ્ટી ૫૦માં સતત આઠ અઠવાડિયાથી ઘટાડો જોવા મળ્યો છે, જેમાં આશરે ૮.૭૫ ટકાનો ઘટાડો નોંધાયો છે અને રોકાણકારોની રૂ. ૨૮ લાખ કરોડથી વધુની સંપત્તિ ધોવાઈ ગઈ છે. આવા સમયે મ્યુચ્યુઅલ ફંડ અને ખાસ કરીને સ્ટોક આધારિત સ્કીમ્સમાં સિસ્ટમેટિક ઇન્વેસ્ટમેન્ટ પ્લાનમાં રોકાણ કરનારા રોકાણકારોના પોર્ટફોલિયોમાં મોટું ધોવાણ દેખાતાં તેઓ ગભરાઈને એસઆઈપી-સિસ્ટેમેટિક ઇન્વેસ્ટમેન્ટ પ્લાન બંધ કરી દેવાનું વિચારતા હોય છે. પરંતુ બજારના નિષ્ણાતોના મતે ઘટતા બજારમાં એસઆઈપી અટકાવવી એ લાંબા ગાળાના સંપત્તિ સર્જન કરવાના આયોજન માટે સૌથી મોંઘી ભૂલ સાબિત થઈ શકે છે.

ઘટતું બજાર: એસઆઈપી રોકાણકારો માટે ખરીદીની શ્રેષ્ઠ તક

બજારમાં જ્યારે મિલકતોના ભાવ ઘટે છે, ત્યારે સિસ્ટેમેટિક ઇન્વેસ્ટમેન્ટ પ્લાનના માધ્યમથી કોસ્ટ એવરેજિંગનો લાભ મળે છે. એસઆઈપીમાં દર મહિને નિશ્ચિત રકમનું રોકાણ થાય છે. જ્યારે બજાર ઘટે છે અને ફંડની નેટ એસેટ વેલ્યુ નીચે આવે છે, ત્યારે તે જ રકમમાં વધુ યુનિટ્સ ખરીદી શકાય છે. ટાટા એસેટ મેનેજમેન્ટના પ્રોડક્ટ અને સ્ટ્રેટેજી હેડ અક્ષય રાવ જણાવે છે કે, “બજારનું કરેક્શન એ જ સમય છે જ્યારે એસઆઈપી સૌથી વધુ મજબૂતીથી કામ કરે છે.” વર્ષ ૨૦૦૦ પછીના નિફ્ટી ૫૦૦ (Nifty 500)ના ડેટાનું વિશ્લેષણ દર્શાવે છે કે બજાર લગભગ ૩૦ ટકા સમય નેગેટિવ રહ્યું હતું, પરંતુ રોકાણકારોએ તેમના કુલ યુનિટ્સના લગભગ ૪૫ ટકા યુનિટ્સ આ નેગેટિવ સમયગાળા દરમિયાન જ એકઠા કર્યા હતા. જો આ સમયે એસઆઈપી બંધ કરવામાં આવે તો સસ્તા ભાવે વધુ યુનિટ્સ ભેગા કરવાનો મોકો હાથમાંથી જતો રહે છે.

માત્ર થોડા હપ્તા ચૂકવવાથી થતું મોટું નુકસાન

દાખલા તરીકે, જો દર મહિને રૂ. ૧૦,૦૦૦ ની એસઆઈપી ચાલતી હોય અને નેટ એસેટ વેલ્યુ રૂ. ૧૦૦ હોય, તો ૧૦૦ યુનિટ્સ મળે છે. જો બજાર ઘટે અને NAV રૂ. ૮૦ થઈ જાય, તો તે જ રૂ. ૧૦,૦૦૦ માં ૧૨૫ યુનિટ્સ મળશે. ત્રણ મહિના સુધી ઘટેલી નેટ એસેટ વેલ્યુ પર રોકાણ ચાલુ રાખનાર વ્યક્તિ રૂ. ૩૦,૦૦૦ માં કુલ ૩૭૫ યુનિટ્સ ભેગા કરી લેશે. Wealthy.in ના સહ-સ્થાપક આદિત્ય અગરવાલ જણાવે છે કે, જે રોકાણકારો બજાર ઘટતાં એસઆઈપી અટકાવે છે, તેઓ સામાન્ય રીતે બજાર સ્થિર થવાની રાહ જુએ છે. જ્યારે તેઓ ફરી શરૂ કરે છે ત્યારે બજાર રિકવર થઈ ચૂક્યું હોય છે અને તેમને ઊંચા ભાવે ઓછા યુનિટ્સ મળે છે. આનાથી શિસ્તબદ્ધ રોકાણની આદત તૂટે છે અને કમ્પાઉન્ડિંગ (ચક્રવૃદ્ધિ વ્યાજ) નો મોટો લાભ જતો રહે છે.

ટાઇમિંગ કરતાં સુસંગતતા વધુ મહત્વની

કોટક મહિન્દ્રા એસેટ મેનેજમેન્ટ કંપનીના રિટેલ સેલ્સ હેડ ઓવાસ બક્ષી એક રસપ્રદ ઉદાહરણ આપે છે. રોકાણકાર A: ૧૧ ફેબ્રુઆરી ૨૦૦૦ થી ૩૧ જુલાઈ ૨૦૨૬ સુધી સતત એસઆઈપી ચાલુ રાખી કુલ રૂ. ૭૯.૫૦ લાખનું રોકાણ કર્યું. તેમની સંપત્તિ વધીને આશરે રૂ. ૫.૨૬ કરોડ થઈ ગઈ હતી. તેના પર ૧૨.૨૨ટકા વાર્ષિક રિટર્ન મળ્યુ હતું. આ જ રીતે રોકાણકાર B: સપ્ટેમ્બર ૨૦૦૧ ના કટોકટીના સમયે ગભરાઈને સિસ્ટેમેટિક ઇન્વેસ્ટમેન્ટ પ્લાન બંધ કરી દીધો અને માત્ર ₹૫ લાખનું જ કુલ રોકાણ કર્યું. જુલાઈ ૨૦૨૬ સુધીમાં તેમનું ફંડ વધીને રૂ. ૯૪.૫૯ લાખ થયું હતુ.. બંનેના વાર્ષિક રિટર્નની ટકાવારી સરખી હોવા છતાં, સતત રોકાણ ચાલુ રાખવાને કારણે રોકાણકાર A એ બજારના તમામ ચક્ર (ઉતાર-ચડાવ) નો લાભ મેળવીને મોટો કોર્પસ બનાવ્યો હતો.

એસઆઈપી ક્યારે ઘટાડવી કે અટકાવવી જોઈએ?

બજાર ઘટવું એ એસઆઈપી બંધ કરવાનું કારણ ન હોવું જોઈએ. પરંતુ નીચે દર્શાવેલી અંગત કે નાણાકીય પરિસ્થિતિમાં જ એસઆઈપી અંગે પુનર્વિચાર કરવો જોઈએ. જો નોકરી જતી રહે કે આવક બંધ થાય અને પૂરતું ઇમરજન્સી ફંડ ન હોય, તો પ્રાથમિક ઘરખર્ચ માટે એસઆઈપી અટકાવી શકાય છે. જો ક્રેડિટ કાર્ડ કે અન્ય મોંઘી લોનનું વ્યાજ બાકી હોય, તો પહેલાં તે ચુકવવું વધુ ડહાપણભર્યું છે.

૩. ટૂંકા ગાળાના લક્ષ્યો: જો કોઈ નાણાકીય લક્ષ્ય માત્ર ૨ થી ૩ વર્ષ દૂર હોય, તો ઇક્વિટી બજારની અસ્થિરતાથી બચવા નાણાંને ડેટ કે સુરક્ષિત સ્કીમમાં શિફ્ટ કરવા જોઈએ.

૪. સ્કીમનું ખરાબ પ્રદર્શન: જો કોઈ ચોક્કસ મ્યુચ્યુઅલ ફંડ સ્કીમ તેના બેંચમાર્ક અને અન્ય ફંડ્સની સરખામણીમાં સતત ખરાબ પ્રદર્શન કરતી હોય, તો તેમાંથી બહાર નીકળી બીજી સારી સ્કીમ પસંદ કરવી જોઈએ. જો નાણાકીય ખેંચ હોય તો SIP સંપૂર્ણ બંધ કરવાને બદલે તેની રકમ ઘટાડવી વધુ યોગ્ય છે, જેથી રોકાણની આદત જળવાઈ રહેશે.

ભારતીય રોકાણકારોનો શિસ્તબદ્ધ અભિગમ

AMFI ના ઓગસ્ટ ૨૦૨૬ ના આંકડા દર્શાવે છે કે બજારની અનિશ્ચિતતા છતાં ભારતીય રોકાણકારોનો એસઆઈપીમાં વિશ્વાસ અકબંધ છે. ઓગસ્ટ ૨૦૨૬ માં માસિક એસઆઈપીનું યોગદાન રૂ. ૩૨,૨૯૭ કરોડના રેકોર્ડ સ્તરે પહોંચ્યું હતું. જો તમારી પાસે સ્થિર આવક, પૂરતું ઇમરજન્સી ફંડ અને લાંબા ગાળાના લક્ષ્યો હોય, તો બજારના ઘટાડાથી ગભરાયા વગર એસઆઈપી ચાલુ રાખવી એ જ સંપત્તિ સર્જનની ચાવી છે.

Share on Social Media

ઘટતા બજારમાં SIP બંધ કરવી એ સૌથી મોટો આર્થિક ફટકો

ઘટતું બજાર: એસઆઈપી રોકાણકારો માટે ખરીદીની શ્રેષ્ઠ તક