આજે આ કંપનીઓના શેર્સની ચાલ પર પણ નજર રાખજો
આજે શેરબજારમાં જીવન વીમા નિગમ, વેદાંતા, ફિઝિક્સવાલા, અદાણી એનર્જી, પીએફસી, ડીસીએક્સ સિસ્ટમ્સ અને જીએચવી ઇન્ફ્રા સહિતના શેર્સ લાઈમ લાઈટમાં રહેવાની સંભાવના રહેલી છે. ભારતીય જીવન વીમા નિગમના બોર્ડે હાલના શેરહોલ્ડર્સને 1:1 ના પ્રમાણમાં બોનસ ઇક્વિટી શેર આપવાની મંજૂરી આપી છે. રેકોર્ડ તારીખ પછી જાહેર કરવામાં આવશે અને શેરહોલ્ડર્સની મંજૂરી હેઠળ રહેશે.
છત્તીસગઢના શક્તિ જિલ્લામાં વેદાંતા લિમિટેડના પાવર પ્લાન્ટમાં બોઇલર ટ્યુબ ફાટતાં 11 કામદારોના મોત થયા અને 22 લોકો ઘાયલ થયા. ઘટનાનું કારણ હજુ સ્પષ્ટ નથી. તેની અસર શેરબજારમાં લિસ્ટ થયેલી તેની સ્ક્રિપ પર જોવા મળી શકે છે.
ફિઝિક્સવાલાએ ટેક્સ ડિમાન્ડમાં સુધારા માટે અરજી કર્યા બાદ ટેક્સ રકમ રૂ.263.34 કરોડમાંથી ઘટીને રૂ. 192.76 કરોડ થઈ છે. કંપનીએ કમિશનર (અપીલ) સમક્ષ અપીલ કરી છે અને બાકી રકમ સામે મજબૂત દલીલો કરી હોવાનું જણાવ્યું છે.
માઈન્ડસ્પેસ આરઈઆઈટી-REITએ ચેન્નઈની કંપની રેડિયલ આઈટી પાર્ક પ્રાઈવેટ લિમિટેડને ખરીદવા રૂ. 3,000 કરોડના સોદા માટે કરાર કર્યા છે. આ કરારમાં 51 ટકા હિસ્સો માઈન્ડ સ્પેસનો અને 49 ટકા હિસ્સો સહ-નિવેશક-સાથી રોકાણકાર પાસે રહેશે.
અદાણી એનર્જી સોલ્યુશન્સે મુંબઈ માટે 1,000 મેગાવોટની એચવીડીસી લિંક શરૂ કરી છે. તેનાથી રિન્યુએબલ એનર્જી સપ્લાય વધશે અને વીજ પુરવઠાની સ્થિરતા સુધરશે.
ઇન્ડોકો રેમેડીઝના ઔરંગાબાદ ટેસ્ટિંગ સેન્ટરનું અમેરિકાના ફૂડ એન્ડ ડ્રગ એડમિનિસ્ટ્રેશનના અધિકારીઓએ નિરીક્ષણ પૂરું કરી લીધું છે. આ નિરીક્ષણમાં ક્ષતિ હોવાનું ધ્યાનમાં આવ્યું ન હોવાનું જાણવા મળી રહ્યું છે.
ટાટા કેમિકલ્સની બ્રિટન સ્થિત બે સબસિડીયરી કંપનીઓ બંધ થઈ ગઈ છે.
પાવર ફાઇનાન્સ કોર્પોરેશને ચાર નવા સ્પેશિયલ પર્પઝ વેહિકલ કંપનીઓ બનાવી છે.
હિંદુસ્તાન ઝિંકને રાજસ્થાનના પોટાશ બ્લોક માટે સફળ બિડર જાહેર કરવામાં આવ્યું છે.
ગોલ્ડિયમ ઇન્ટરનેશનલએ મુંબઈમાં નવી લેબ-ગ્રોન ડાયમંડ જ્વેલરી સ્ટોર શરૂ કરી છે, હવે કુલ 24 સ્ટોર કાર્યરત છે.
સુપ્રીમ ઇન્ડસ્ટ્રીઝે મહારાષ્ટ્રમાં EPS ઉત્પાદન ક્ષમતા 85,000 TPA થી વધારીને 1.15 લાખ TPA કરી છે.
HG ઇન્ફ્રાને મિર્જાપુર થર્મલ પ્રોજેક્ટ માટે રૂ.519.33 કરોડનો ઓર્ડર મળ્યો છે.
ગોદાવરી પાવર એન્ડ ઇસ્પાત ગ્રીન એનર્જી સ્ટોરેજ ક્ષેત્રમાં પ્રવેશ કરી રહી છે અને લિથિયમ બેટરી માટે ચાઇનીઝ કંપની સાથે કરાર કર્યો છે.
ડીસીએક્સ સિસ્ટમ્સને રૂ. 31.64 કરોડના નવા ઓર્ડર મળ્યા છે.
વ્રજ આયર્નને સોલાર પાવર માટે વીજ ડ્યૂટીમાંથી છૂટ મળી છે.
જયકાય એન્ટરપ્રાઇઝે ડિફેન્સ કોમ્પોનેન્ટ બિઝનેસ ખરીદવા રૂ. 5 કરોડનો સોદો કર્યો છે.
શાર્પ ઇન્ડિયાના પ્રમોટરે પોતાની 75 ટકા હિસ્સેદારી વેચવાનો કરાર કર્યો છે.
GHV ઇન્ફ્રાએ અમેરિકામાં રૂ. 840 કરોડના પ્રોજેક્ટ માટે ઈપીસી-EPC કરાર કર્યો છે.
નાયાસાએ ઓનલાઇન વેચાણ મજબૂત બનાવવા યુનિકોમર્સ સાથે ભાગીદારી કરી છે.
લે લાવોયર કંપનીએ હોટેલ માટે 3 વર્ષનો લૉન્ડ્રી સર્વિસ કરાર કર્યો છે.
કિલબર્ન એન્જિનિયરિંગે નવા નોન-એક્ઝિક્યુટિવ ચેરમેનની નિમણૂક કરી છે અને ₹600 કરોડના ઓર્ડર સાથે મજબૂત પ્રદર્શન દર્શાવ્યું છે.
