ફાર્મા સેક્ટરની કંપનીઓ માટે સરકાર બાયોફાર્મા શક્તિ સ્કીમ ચાલુ કરશે
- 2026-27ના નાણાકીય વર્ષ માટે આ યોજના હેઠળ રૂ.500 કરોડની પ્રારંભિક ફાળવણી કરવામાં આવી
બાયોફાર્મા શક્તિ યોજના અંગેના પ્રગતિ અહેવાલ તથા સંપૂર્ણ કાર્યયોજના અને ફંડના ઉપયોગ વિશે સમિતિને નિયમિત રીતે માહિતગાર રાખવાની સૂચને રસાયણ અને ખાતર સંબંધિત સંસદીય સમિતિએ ડિપાર્ટમેન્ટ ઓફ ફાર્માસ્યૂટિકલ્સને સૂચના આપી છે. આ સાથે યોજના મંજૂર થયા પછી તેની અંતિમ રચના અને નાણાકીય વિતરણની વિગતો પણ રજૂ કરવા જણાવ્યું છે.
આ સૂચના Nirmala Sitharaman દ્વારા જાહેર કરાયેલી Biopharma Shakti યોજનાને અનુસરીને આપવામાં આવી છે. આ યોજના માટે આગામી 5 વર્ષમાં ₹10,000 કરોડનો ખર્ચ કરવામાં આવશે. તેનો મુખ્ય હેતુ ભારતમાં બાયોફાર્માસ્યુટિકલ ઉત્પાદનને મજબૂત બનાવીને દેશને વૈશ્વિક મેન્યુફેક્ચરિંગ હબ બનાવવાનો છે.
યોજનાનો હેતુ
બાયોફાર્મા શક્તિ એટલે કે ટેકનોલોજી અને નવસંસ્કરણ-ઈન્નોવેશનના માધ્યમથી આરોગ્ય સેવાને વધુ આધુનિક અને દરદીઓની અનુકૂળ બનાવવાનો ઉદ્દેશ છે. એક, સ્થાનિક એટલે કે દેશી સ્તરે બાયોલોજિક્સ અને બાયોસિમિલર દવાઓનું ઉત્પાદન વધારવાનો પણ ઉદ્દેશ છે. બીજું, આત્મનિર્ભર બાયોફાર્મા ઇકોસિસ્ટમ ડેવલપ કરવાનો છે. ત્રણ, આરોગ્ય સેવાઓને વધુ સસ્તી અને અસરકારક બનાવવી છે.
અમલીકરણ અને આયોજન
આ યોજનાના અમલીકરણ માટે ડિપાર્ટમેન્ટ ઓફ ફાર્માસ્યૂટિકલ્સ મધ્યસ્થ-નોડલ મંત્રાલય તરીકે કામ કરશે. હાલમાં યોજના યોજના પ્રારંભિક તબક્કામાં છે. વર્ષવાર ફંડ વિતરણ અને ઘટક મુજબના કામની વહેંચણીની વિગતો તૈયાર થઈ રહી છે. અન્ય મંત્રાલયો અને હિત ધરાવતા લોકો સાથે ચર્ચા ચાલી રહી છે. આ અંગેની સંસદીય સમિતિનું નેતૃત્વ પૂર્વ ક્રિકેટર અને સાંસદ કીર્તિ આઝાદ કરી રહ્યા છે. તેમનું કહેવું છે કે ફાઈનલ-અંતિમ મંજૂરી મળ્યા બાદ તમામ વિગતો સમિતિને આપવી જરૂરી છે.
બજેટ ફાળવણી
2026-27ના નાણાકીય વર્ષ માટે આ યોજના હેઠળ રૂ.500 કરોડની પ્રારંભિક ફાળવણી કરવામાં આવી છે. સંસદીય સમિતિએ ડિપાર્ટમેન્ટ ઓફ ફાર્માસ્યૂટિકલ્સ પાસે માંગણી કરી છે કે આ રકમ કેવી રીતે ઉપયોગમાં લેવામાં આવશે તેની સ્પષ્ટ કાર્યયોજના રજૂ કરવામાં આવવી જોઈએ. નાણાં મંત્રી નિર્મલા સીતારમણે પોતાના બજેટ ભાષણમાં જણાવ્યું હતું કે બાયોલોજિક દવાઓ જીવન ગુણવત્તા સુધારવામાં મહત્વપૂર્ણ છે. ત્રણ નવી નેશનલ ઇન્સ્ટિટ્યૂટ ઓફ ફાર્માસ્યૂટિકલ એજ્યુકેશન એન્ડ રિસર્ચ-નાઈપરની સ્થાપના કરવામાં આશે. અત્યારે સક્રિય સાત જેટલી નાઈપરને અપગ્રેડ કરવામાં આવશે. તેની સાથે જ 1,000થી વધુ ક્લિનિકલ ટ્રાયલ સાઇટ્સનું નેટવર્ક બનાવવામાં આવશે તદુપરાંત ડ્રગ સ્ટાન્ડર્ડ કંટ્રોલ ઓર્ગેનાઈઝેશનનને મજબૂત બનાવવાની પણ યોજના છે. તેનાથી વૈશ્વિક ધોરણો અનુસાર મંજૂરી પ્રક્રિયા ઝડપી કરવી શક્ય બની જશે.
