અમદાવાદની કોમર્શિયલ કોર્ટ બ્રિટન-સ્વિટ્ઝર્લેન્ડની કંપનીઓને કરાર ભંગ માટે નોટિસ પાઠવી
2028 સુધીનો કરાર એકાએક સમાપ્ત કરી દેતાં કોમર્શિયલ કોર્ટ નોટિસ કાઢી
સ્વિટ્ઝર્લેન્ડની અને બ્રિટનની કંપનીને દસ દિવસમાં જવાબ રજૂ કરવા આદેશ આપ્યો
અમદાવાદઃ ગુજરાતની કોમર્શિયલ કોર્ટે વિદેશી કંપની દ્વારા કરવામાં આવેલા સોલ ડિસ્ટ્રિબ્યુટરશિપ કરારને અચાનક સમાપ્ત કરવાના નિર્ણય સામે 15 કરોડ રૂપિયાના નુકસાનની ડિમાન્ડ સાથે આજે કેસ દાખલ કર્યો છે. સ્વિટ્ઝર્લેન્ડની ધીસ એજી અને ગુજરાતની મેડિનોવેશન વિઝન પ્રાઈવેટ લિમિટેડ વચ્ચે થયેલા કરાર ભંગ માટે આ નોટિસ આપવામાં આવી છે, એમ મેડોન્નોવેશન વિઝન પ્રાઈવેટ લિમિટેડ વતીથી કેસ લડી રહેલા એડવોકેટ સચિન વસાવડાએ જણાવ્યું હતું.
બંને કંપનીઓ વચ્ચે થયેલો કરાર વર્ષ 2028 સુધી માન્ય હતો. કોર્ટએ ઇન્જંકશન અંગેની સુનાવણી માટે નોટિસ જારી કરી છે અને સામે પક્ષને 10 દિવસની અંદર જવાબ રજૂ કરવાનો આદેશ આપ્યો છે.
સ્વિટ્ઝર્લૅન્ડમાં આવેલી કંપની ધીસ એજીએ ભારતીય કંપની મેડિનોવેશન વિઝન પ્રાઈવેટ લિમિટેડ-એમવીપીએલ સાથે કરાર કરીને ભારતમાં આંખના નિષ્ણાતો (ઓફ્થેલ્મોલોજિસ્ટ) દ્વારા કૅટારેક્ટ સર્જરી માટે ઉપયોગ થતી સોફી મશીનોના વેચાણ માટે સોલ ડિસ્ટ્રિબ્યુટર તરીકે નિયુક્ત કરી હતી. આ કરાર મુજબ ભારતમાં આ મશીનો વેચવાનો એકમાત્ર અધિકાર એમવીપીએલ પાસે હતો.
MVPLની બે વર્ષ સુધીની સતત મહેનત અને પ્રયત્નોના કારણે આ મશીનોને ડોક્ટરોમાં મોટી લોકપ્રિયતા મળી. દેશમાં 200થી વધુ ડોક્ટરો દ્વારા મશીનોના ડેમો માટે માંગ કરવામાં આવી અને ઘણા ડોક્ટરો તેને ખરીદવામાં રસ દાખવ્યો હતો. પરિણામે સોફી મશીનોનું વેચાણ વધ્યું હતું અને તે ડોક્ટરોમાં જાણીતી બની ગઈ હતી.
પરંતુ ત્યારબાદ વધુ નફો મેળવવા માટે સ્વિસ કંપનીએ બ્રિટન આધારિત રેયનર કંપની સાથે ગોઠવણ કરી અને MVPL સાથેનો સોલ ડિસ્ટ્રિબ્યુટરશિપ કરાર અચાનક સમાપ્ત કરી દીધો હતો. આ રીતે ભારતમાં થનારા નફાને પોતાના કબજામાં લેવા માટે વિદેશી કંપનીઓએ એમવીપીએલ સાથેનો સોલ ડિસ્ટ્રિબ્યુટરશિપ કરાર અચાનક રદ કરી દીધો, જેને લઈને હવે કોર્ટમાં કાનૂની લડાઈ શરૂ થઈ છે.
