વૈશ્વિક ટેન્ડરથી મુક્ત 354 મેડિકલ ડિવાઇસની નવી યાદી પર DoPએ સ્ટેકહોલ્ડર્સ પાસે સૂચનો મંગાવ્યા

વૈશ્વિક ટેન્ડરથી મુક્ત 354 મેડિકલ ડિવાઇસની નવી યાદી પર DoPએ સ્ટેકહોલ્ડર્સ પાસે સૂચનો મંગાવ્યા

હિતધારકોને 28મી ફેબ્રુઆરી સુધીમાં તેમના અભિપ્રાયો ઓનલાઈન જ મોકલી આપવાની સૂચના આપવામાં આવી

અમદાવાદઃ ભારત સરકારના Department of Pharmaceuticalsએ જાહેર ખરીદી એજન્સીઓ માટે વૈશ્વિક ટેન્ડર (Global Tender Enquiry – GTE)માંથી મુક્ત કરાયેલા 354 મેડિકલ ડિવાઇસની સુધારેલી યાદી અંગે તમામ સ્ટેકહોલ્ડર્સના અભિપ્રાય અને સૂચનો મંગાવ્યા છે.

આ પહેલાં, Department of Expenditure, Government of Indiaએ 28 જૂન 2024ના રોજ આ 354 મેડિકલ ડિવાઇસને લોકલ પ્રોક્યોરમેન્ટની શરતમાંથી મુક્તિ આપતો આદેશ બહાર પાડ્યો હતો. તેને કારણે સરકારી ખરીદી સંસ્થાઓને આ ડિવાઇસ માટે વૈશ્વિક ટેન્ડર બહાર પાડવાની મંજૂરી મળી હતી.

ત્યારબાદ ફેબ્રુઆરી 2025માં, કેટલાક મેડિકલ ઉપકરણોના નામ બદલવાની સૂચનાઓ મળતા આ યાદીમાં સુધારો કરવામાં આવ્યો હતો. આ મુક્તિ General Financial Rules (GFR), 2017 ના Rule 161(iv) હેઠળ આપવામાં આવેલી સામાન્ય છૂટના આધારે છે અને તે 31 માર્ચ 2027 સુધી અથવા આગામી આદેશ આવે ત્યાં સુધી માન્ય રહેશે.

હવે DoPએ સુધારેલી યાદી અંગે ફરી એકવાર તમામ હિતધારકો પાસેથી ટિપ્પણીઓ અને સૂચનો મંગાવ્યા છે. છેલ્લી તારીખ 28 ફેબ્રુઆરી 2026 નક્કી કરવામાં આવી છે. દરેક હિત ધરાવનારાઓએ સૂચનો નિર્ધારિત ફોર્મેટમાં DoPના Medical Devices Divisionના ઈમેઈલ પર મોકલવાના રહેશે.

સ્ટેકહોલ્ડર્સે જે ઉપકરણ અંગે વાંધો હોય અથવા GTE યાદીમાં ઉમેરવાની ભલામણ કરવી હોય તેનું નામ અને સીરિયલ નંબર, સ્થાનિક ઉત્પાદકનું નામ, લાયસન્સ નંબર, દેશી ઉત્પાદન ક્ષમતા તથા સ્થાનિક માંગ અને ઉત્પાદન વચ્ચેનો તફાવત જેવી વિગતો આપવી ફરજિયાત રહેશે.

DoP દ્વારા 30 ડિસેમ્બર 2020ના રોજ Public Procurement (Preference to Make in India) Order, 2017 અમલમાં મૂકવા માર્ગદર્શિકા જાહેર કરવામાં આવી હતી, જેનો હેતુ Make in India પહેલને પ્રોત્સાહન આપવાનો અને દેશમાં ફાર્માસ્યુટિકલ ક્ષેત્રમાં ઉત્પાદન વધારી રોજગાર સર્જવાનો હતો.

આ માર્ગદર્શિકા મુજબ, સરકારી ખરીદી સંસ્થાઓએ Class-I લોકલ સપ્લાયર્સ (80 ટકા અથવા તેથી વધુ સ્થાનિક સામગ્રી) અને Class-II લોકલ સપ્લાયર્સ (50 ટકાથી વધુ પરંતુ 80 ટકાથી ઓછી સ્થાનિક સામગ્રી) પાસેથી ખરીદી પ્રાધાન્યથી કરવી જોઈએ. જ્યારે 50 ટકા કે તેથી ઓછી સ્થાનિક સામગ્રી ધરાવનાર સપ્લાયર્સને non-local તરીકે ગણવામાં આવે છે.

પરંતુ કેટલીક પરિસ્થિતિઓમાં દેશમાં જરૂરી ગુણવત્તાવાળા ઉત્પાદનો ઉપલબ્ધ ન હોય, ત્યારે વિદેશી સપ્લાયર્સ પાસેથી સ્પર્ધાત્મક ઓફર મેળવવા GTE મંજૂર કરવામાં આવે છે. GFRમાં કરાયેલા સુધારા મુજબ રૂ.200 કરોડ સુધીના ટેન્ડર માટે સામાન્ય રીતે વૈશ્વિક ટેન્ડર મંજૂર નથી, પરંતુ ખાસ કારણો હોય તો સંબંધિત મંત્રાલય વિગતવાર નોંધ સાથે છૂટ માગી શકે છે.

જૂન 2024માં પ્રથમ વખત 354 મેડિકલ ડિવાઇસની યાદી જાહેર કરવામાં આવી હતી, જેને ફેબ્રુઆરી 2025માં સુધારવામાં આવી હતી. તેમાં કેટલાક ઉપકરણોના નામ બદલીને વધુ ટેક્નિકલ અને સ્પષ્ટ બનાવવામાં આવ્યા હતા. તેમાં cardiac output monitoring system, non-invasive fluid management monitoring system તથા dual segment / dual pump phacoemulsification systemનો સમાવેશ થાય છે.