એમામીનો શેર લાંબી રેસનો મજબૂત ઘોડોઃ લાંબા ગાળા માટે રોકાણ કરી શકાય

ફાસ્ટ મુવિંગ કન્ઝ્યુર ગુડ્સના સેક્ટરની કંપની એમામી-Emamiના શેર વર્તમાન ભાવ સપાટીએ લેણ કરવાનું આયોજન કરી શકાય છે. એમામીની ગ્રામ્ય બજારમાં મજબૂત હાજરી અને સીઝનલ ઉત્પાદનોમાં વૃદ્ધિને કારણે તથા મજબૂત વિતરણ નેટવર્ક તથા સ્થિર માર્જિન હોવાથી આકર્ષક મૂલ્ય ધરાવતી કંપનીના શેરમાં રોકાણ કરી શકાય તેમ છે.

એમામીના શેરનો ભાવ આશરે 35 ટકા ઘટીને રૂ.399 આસપાસ આવી ગયો છે. તેનો વર્તમાન બજાર ભાવ બાવન સપ્તાહની નીચી સપાટીની નજીક છે. નાણાંકીય વર્ષ 2025-26ના પરિણામોએ કંપનીની હવામાન પરની નિર્ભરતા, ચોથા ત્રિમાસિક ગાળાના નબળા વેચાણ અને ઓપરેટિંગ માર્જિન પર દબાણ વધી રહ્યા હોવાનો નિર્દેશ આપ્યો છે.

2022-23માં નબળા પ્રદર્શન પછી કંપનીએ આગામી બે વર્ષ સારું પ્રદર્શન કર્યું હતું. જોકે 2025-26માં કંપનીની આવકમાં 0.8 ટકાનો ઘટાડો થયો છે. કંપનીના વેરા પહેલાના નફામાં પમ 10 ટકાનો ઘટાડો થયો છે. તેમ જ એડજસ્ટેડ નેટ નફો 5 ટકા ઘટ્યો છે. બીજીતરફ ચોથા ત્રિમાસિક ગાળામાં સ્થાનિક બજારમાં વેચાણની ક્વોન્ટિટીમાં સાત ટકાનો ઘટાડો આવ્યો છે. તેમ જ વેચાણ મૂલ્યમાં ત્રણ ટકાનો ઘટાડો જોવા મળ્યો છે. આમ ભાવવધારા અને પ્રોડક્ટ મિક્સે વેચાણમાં આવેલી નબળાઈને થોડી હદ સુધી સંતુલિત કરવામાં મદદ કરી છે.

છતાં શેરના ભાવમાં ભારે ઘટાડો જોવા મળ્યો છે. અગાઉ નબળા રહેલા કેટલાંક વિભાગોમાં સુધારો, નવા વ્યવસાયોમાં વૃદ્ધિ, દર વર્ષે થતો રૂ. 700-800 કરોડની ફ્રી કેશ ફ્લો, સુધરેલી વર્કિંગ કેપિટલ અને નેટ કેશ પોઝિટિવ બેલેન્સશીટને કારણે જોખમી સ્થિતિમાંથી બહાર આવવાની શક્યતા વધુ મજબૂત જણાય છે. આજે શેરબજારમાં મળતી સ્ક્રિપ્સના ભાવ ઊંચા જણાય છે ત્યારે એમામીનું મૂલ્ય અન્ય શેર્સની તુલનામાં ઓછું છે. વૈશ્વિક અને સ્થાનિક અનિશ્ચિતતાઓને ધ્યાનમાં રાખતાં 4-5 વર્ષના લાંબા ગાળાના રોકાણકારો હાલના સ્તરે તબક્કાવાર ખરીદી કરી શકે છે.

એમામીના ધ્યાન ખેંચતા પાસોઓ

એક, છેલ્લા 12 મહિનાની કમાણીના 22.6 ગણાં મૂલ્યાંકન પર એમામીના શેરનું ટ્રેડિગ થઈ રહ્યું છે. બે, આગામી એક વર્ષની અનુમાનિત કમાણીના 20.5 ગણો થવાની સંભાવના છે. ત્રણ,  આગામી બે વર્ષની કમાણીના 18.6 ગણાં મૂલ્યાંકન પર અત્યારે ટ્રેડ થઈ રહ્યો છે.

નાણાંકીય વર્ષ 2026-27ના આધારે તેનો P/E રેશિયો છેલ્લા પાંચ વર્ષના સરેરાશ કરતાં લગભગ 25 ટકા ઓછો છે. 2026-27માં 14 ટકા અને 2027-28માં શેરદીઠ કમાણીમાં 11 ટકાની વૃદ્ધિ થવાની ધારણા હોવાથી મધ્યમ ગાળામાં વૃદ્ધિની શક્યતા યથાવત છે.

1974માં સ્થપાયેલી કંપની એમામી પર્સનલ કેર અને આરોગ્યસંભાળના ક્ષેત્રમાં કાર્યરત છે. કંપની પાસે 550થી વધુ ઉત્પાદનોનો પોર્ટફોલિયો છે. કંપનીની કુલ આવકમાંથી લગભગ 82 ટકા આવક ભારતમાંથી આવે છે. કંપનીની મુખ્ય બ્રાન્ડ્સમાં નવરત્ન અને ડર્મીકૂલ, પેઇન મેનેજમેન્ટ, બોરોપ્લસ, હેલ્થકેર, કેશ કિંગ, સ્માર્ટ એન્ડ હેન્ડસમ, 7 ઓઇલ્સ ઇન વન, ધ મેન કંપનીનો સમાવેશ થાય છે. આંતરરાષ્ટ્રીય વ્યવસાય કંપનીની કુલ આવકમાં 18 ટકા ફાળો આપે છે.

હજી પણ સીઝનલ વ્યવસાય પર મદાર

એમામીના વેચાણનો મોટો હિસ્સો ઠંડક આપતા તેલ, ટેલ્કમ પાવડર અને ઉનાળાના ઉત્પાદનો પર આધારિત રહ્યો છે. કંપનીએ છેલ્લા કેટલાક વર્ષોમાં તમામ ઋતુમાં વેચાતા ઉત્પાદનો, ડિજિટલ બ્રાન્ડ્સ અને નવા વેચાણ માધ્યમો દ્વારા આ નિર્ભરતા ઘટાડવાનો પ્રયાસ કર્યો છે. પરંતુ નાણાંકીય વર્ષ 2025-26માં ફરી સાબિત થયું કે ઉનાળાના ઉત્પાદનો હજુ પણ અત્યંત મહત્વના છે. નવરત્ન અને ડર્મીકૂલ વેચાણમાં 2025-26 દરમિયાન 15 ટકા ઘટાડો જોવા મળ્યો છે. ચોથા ત્રિમાસિક ગાળામાં જ 21 ટકા ઘટાડો  જોવા મળ્યો છે. માત્ર ટેલ્કમ પાવડર વિભાગની આવકમાં લગભગ રૂ. 100 કરોડનો ઘટાડો આવ્યો છે. તેમ જ ચોથા ત્રિમાસિક ગાળામાં ટેલ્કમ કેટેગરીમાં 40 ટકા ઘટાડો જોવા મળ્યો છે. કંપનીએ તેના માટે મોડા ઉનાળા, અસામાન્ય વરસાદ અને તાપમાનની અનિશ્ચિતતાને જવાબદાર ગણાવ્યા છે.

આંતરરાષ્ટ્રીય વ્યવસાયમાં પણ અસર

આંતરરાષ્ટ્રીય વેચાણની વાત કરીએ તો 2025-26માં ત્રણ ટકા વધ્યું છે. પરંતુ ચોથા ત્રિમાસિક ગાળામાં 5 ટકા ઘટ્યું છે. માર્ચ મહિનાની નબળાઈનું કારણ પશ્ચિમ એશિયામાં સપ્લાય ચેઇન વિક્ષેપ હોવાનું કંપનીએ જણાવ્યું છે. નાણાંકીય વર્ષ 2025-26માં તમામ વિભાગોનું પરફોર્મન્સ નબળું રહ્યું નહોતું. ઉનાળા સિવાયના ઘરેલુ ઉત્પાદનોના પોર્ટફોલિયોમાં મૂલ્ય આધારિત વૃદ્ધિ 11 ટકાની જોવા મળી હતી. તેમ જ વેચાણ જથ્થા આધારિત વૃદ્ધિ સાત ટકાની જોવા મળી હતી.

કંપનીના કેશ કિંગ બ્રાન્ડના વેચાણમાં 2025-26ના ચોથા ત્રિમાસિક ગાળામાં 14 ટકાનો વધારો જોવા મળ્યો છે. જોકે આખા વર્ષના આંકડાં જોઈએ તો તેમાં બે ટકાનો ઘટાડો જોવા મળ્યો છે. છતાં ચોથા ત્રિમાસિક ગાળામાં જોવા મળેલા સુધારાને સકારાત્મક સંકેત માનવામાં આવે છે. સેવન ઓઈલ્સ ઇન વનના વેચાણમાં ચોથા ત્રિમાસિક ગાળામાં 34 ટકાની વૃદ્ધિ જોવા મળી છે. 2025-26ના વર્ષમાં તેમાં 13 ટકા વૃદ્ધિ જોવા મળી છે. પેઈન મેનેજમેન્ટના પ્રોડક્ટ્સના વેચાણમાં ચોથા ત્રિમાસિકા ગાળામાં 11 ટકાની વૃદ્ધિ થઈ છે. આખા વર્ષ દરમિયાન તેમાં સાત ટકાનો વધારો થયો છે. હેલ્થકેરના પ્રોડક્સના વેચાણમાં ચોથા ત્રિમાસિક ગાળામાં સાત ટકાનો વધારો થયો છે. આખા વર્ષ દરમિયાન હેલ્થકેરના પ્રોડક્ટ્સના વેચાણમાં પાંચ ટકાનો વધારો જોવા મળ્યો છે.

નવા વ્યવસાયોની પ્રગતિ

પુરુષો માટેના બ્રિલ્લારે પ્રોડક્ટ્સના વેચાણમાં ચોથા ત્રિમાસિક ગાળામાં 34 ટકાનો વધારો થયો છે. સમગ્ર 2025-26માં આ પ્રોડક્ટ્સના વેચાણમાં 20 ટકા વૃદ્ધિ જોવા મળી છે. મેનેજમેન્ટ મુજબ આ વ્યવસાયોમાં આગામી વર્ષોમાં 30 ટકા જેટલી વાર્ષિક વૃદ્ધિ શક્ય છે. કંપનીને એલોઇવેરા આધારિત ફ્રૂટ ડ્રિંક્સ માર્કેટમાં મજબૂત પ્રવેશ અપાવી રહ્યા છે. હાલમાં કંપનીનો વેરા પહેલાનો નફો આશરે રૂ. 40-45 કરોડનો છે. કંપનીની વેડિક્સ અને સ્કીનક્રાફ્ટની બ્રાન્ડના પ્રોડક્ટ્સના વધી રહેલા વેચાણ વ્યક્તિગત સૌંદર્ય ઉત્પાદનોના ક્ષેત્રમાં લાંબા ગાળાની તક તરીકે જોવામાં આવે છે.

કંપનીની નાણાકીય સ્થિતિ

કંપની પાસે હાલમાં લગભગ રૂ. 720 કરોડની નેટ કેશ-ચોખ્ખી રોકડ છે. નવી બ્રાન્ડ્સમાં રોકાણ વધી રહ્યું છે. કંપની નવી બ્રાન્ડ્સ હસ્તગત કરી રહી છે. તેમ જ કમાણીમાં આવતી અસ્થિરતાનો સામનો કરવાની ક્ષમતાને મજબૂત બનાવી રહી છે. છતાં કંપની સામે પડકારો મોટા છે. કંપની  ઉનાળાના ઉત્પાદનો પર વધુ નિર્ભર છે. ઉનાળા સિવાયના ઉત્પાદનોમાં વૃદ્ધિ છતાં નવરત્ન અને ડર્મીકૂલની નબળાઈ આખી કંપનીના પરિણામો પર અસર કરે છે. ચોથા ત્રિમાસિક ગાળામાં ઘરેલુ વેચાણના જથ્થામાં સાત ટકાનો ઘટાડો ચિંતાજનક છે. બોરોપ્લસ જેવી જૂની પણ જાણીતી બ્રાન્ડ્સના વેચાણમાં આઠ ટકાનો ઘટાડો જોવા મળ્યો છે. નાણાંકીય વર્ષ 2025-26માં તેના વેચાણમાં માત્ર બે ટકાનો વધારો જોવા મળ્યો છે. એમામીના ગ્રોસ માર્જિન પરનું દબાણ વધી રહ્યું ચે. ગ્રોસ માર્જિન ચોથા ત્રિમાસિક ગાળામાં બે ટકા વધ્યો હોવા છતાં વેરા પૂર્વેને નફો 15 ટકા ઘટ્યો છે. કારણ કે જાહેરાત ખર્ચ, પ્રચાર ખર્ચ  ખૂબ જ વધી ગયા છે. આ તમામ પરિબળોને ધ્યાનમાં લેતા એમામીનો શેર વેલ્યુએબલ ઇન્વેસ્ટમેન્ટ બની રહેવાની સંભાવના જણાય છે. કારણ કે શેરમાં 35 ટકાનો સુધારો આવી ચૂક્યો છે. છતાં તેનું વર્તમાન બજાર મૂલ્ય રોકાણ કરવા માટે આકર્ષક છે. કંપનીની નવા બ્રાન્ડ્સ ઝડપથી વધી રહી છે. કંપનીનો રોકડનો પ્રવાહ મજબૂત છે. રોકડનો ચોખ્ખો પ્રવાહ  રૂ. 720 કરોડનો છે. ગ્રામ્ય બજારમાં મજબૂત હાજરી છે. આમ 4-5 વર્ષનો રોકાણ જાળવી રાખવાને સમર્થ રોકામકારો ટૂંકાગાળાના ઉતાર-ચઢાવ સહન કરી શકતા હોય તો વર્તમાન ભાવે તબક્કાવાર ખરીદી વિચારવા જેવી બની શકે છે.