લાઈસન્સ વિના કોસ્મેટિક બનાવતી ત્રાગડની આનકી હર્બલ’નો રૂ. ૨.૬૮ લાખનો મુદ્દામાલ જપ્ત
અમદાવાદઃ ગુપ્ત બાતમીના આધારે ૨૫ ઓગસ્ટ ૨૦૨૬ના રોજ ફૂડ એન્ડ ડ્રગ કમિશનરની કચેરીની એક ટીમે અમદાવાદના ત્રાગડ વિસ્તારમાં આવેલા ‘આનકી હર્બલ’ નામના એકમ પર અચાનક સરપ્રાઇઝ ચેકિંગ હાથ ધરવામાં આવ્યું હતું. તપાસ દરમિયાન આ પેઢી જરૂરી કાયદાકીય લાઇસન્સ મેળવ્યા વિના તથા ઉત્પાદનોની ગુણવત્તાનું પરીક્ષણ કર્યા વગર જ ગેરકાયદેસર રીતે કોસ્મેટિક્સનું ઉત્પાદન અને બલ્કમાંથી રીપેકિંગ કરતી હોવાનું બહાર આવ્યું હતું. રાજ્યમાં નાગરિકોના આરોગ્ય અને સલામતી સાથે ચેડાં કરતી ગેરકાયદેસર પ્રવૃત્તિઓ સામે રાજ્ય સરકારે ‘ઝીરો ટોલરન્સ’ અભિગમ અપનાવ્યો છે. મુખ્યમંત્રી શ્રી ભૂપેન્દ્ર પટેલના માર્ગદર્શન, આરોગ્ય મંત્રી શ્રી પ્રફુલ પાનશેરીયાની સૂચના તેમજ ખોરાક અને ઔષધ નિયમન તંત્ર (FDCA) ના કમિશનરશ્રીના નેતૃત્વ હેઠળ ગેરકાયદેસર કોસ્મેટિક ઉત્પાદન અને રીપેકિંગ કરતી પેઢીઓ સામે રાજ્યવ્યાપી કડક ઝુંબેશ ચલાવવામાં આવી રહી છે.
રૂ. ૨.૬૮ લાખથી વધુનો મુદ્દામાલ સીઝ કરાયો:
કાર્યવાહી દરમિયાન અધિકારીઓએ સ્થળ પરથી ફેરનેસ ક્રીમ, ડાર્ક સર્કલ ક્રીમ, શેમ્પુ, હેર ઓઇલ, બોડી વોશ, ફેસ વોશ, સ્ક્રબ, સોલિડ પરફ્યુમ, ગ્લિસરીન સાબુનો જથ્થો, કાચો માલ, પેકિંગ મટીરીયલ અને છાપેલા લેબલ્સ સહિત રૂ. ૨.૬૮ લાખથી વધુનો મુદ્દામાલ જપ્ત કર્યો છે.
ઓઢવની ‘રવી માર્કેટીંગ’ ખાતે પણ તપાસના તાર લંબાયા:
FDCA ની વધુ તપાસમાં સામે આવ્યું છે કે, આ ગેરકાયદેસર કામગીરી માટેનું બલ્ક મટીરીયલ અમદાવાદના ઓઢવ સ્થિત ‘રવી માર્કેટીંગ’ પાસેથી ખરીદવામાં આવતું હતું, જ્યારે ત્રાગડના શિવાન્તા રીગેલના ફ્લેટ ખાતે રીપેકિંગ અને ગ્લિસરીન સાબુનું ગેરકાયદેસર ઉત્પાદન ચાલતું હતું. તંત્ર દ્વારા ‘રવી માર્કેટીંગ’ ખાતે પણ તપાસ શરૂ કરવામાં આવી છે અને સ્થળ પરથી ઔષધિય ગુણવત્તાની ચકાસણી અર્થે ૧૦ વિવિધ કોસ્મેટિક પ્રોડક્ટ્સના નમૂનાઓ લઈ લેબોરેટરી પૃથક્કરણ માટે મોકલવામાં આવ્યા છે.
નકલી બી.પી. દવા કૌભાંડમાં ક્રાઇમ બ્રાન્ચ અને FDCA ની સફળતા:
આ સાથે તાજેતરમાં અમદાવાદ શહેર ક્રાઇમ બ્રાન્ચ અને FDCA ના સંયુક્ત ઓપરેશન દરમિયાન બ્લડ પ્રેશર (BP) ની નકલી દવાનું વેચાણ કરતી આંતરરાજ્ય સિન્ડિકેટનો પર્દાફાશ કરવામાં આવ્યો હતો, જેમાં અમદાવાદ અને લખનઉના ૩ આરોપીઓની ધરપકડ કરાઈ છે. આ સફળ કામગીરી બદલ આરોગ્ય મંત્રી શ્રી પ્રફુલ પાનશેરીયાએ પોલીસ કમિશનરશ્રી સહિત ક્રાઇમ બ્રાન્ચ અને FDCA ની સમગ્ર ટીમને અભિનંદન પાઠવ્યા છે અને સ્પષ્ટ આશ્વાસન આપ્યું છે કે પ્રજાના આરોગ્ય સામે જોખમ ઊભું કરનારા ગુનેગારો સામે કડકમાં કડક કાર્યવાહી જારી રહેશે.
