H-1B વિઝા વિવાદ વણસ્યો: અમેરિકાવાસીનો ભારતીય પ્રત્યેનો રોષ વિકરાળ બન્યો
- ભારતીયોને અમેરિકામાંથી તગેડી મૂકો જેવી પોસ્ટ્સે માત્ર બે મહિનામાં લગભગ 280 મિલિયન એટલે કે 28 કરોડ વ્યૂઝ મેળવી લીધા લીધા છે.
- ભારતીયો સામેની ઑનલાઇન નફરત ગંભીર સ્તરે પહોંચી ગઈ છે. આ નફરત માત્ર ઇમિગ્રેશન નહીં, પરંતુ સામાજિક સૌહાર્દ માટે પણ ચિંતાજનક છે.
- નવો ટ્રેન્ડ “ગ્રેટ રિપ્લેસમેન્ટ થિયરી” જેવી ખોટી ધારણાઓ સાથે જોડાઈ રહ્યો છે. તેમાં હવે યહૂદીઓની જગ્યાએ ભારતીયોને “કબજો કરતા” બતાવવામાં આવી રહ્યા છે.
તાજેતરના The New York Times ના અહેવાલમાં જણાવવામાં આવ્યું છે કે અમેરિકામાં H-1B વિઝાને લઈને ચાલી રહેલી ચર્ચા હવે માત્ર નોકરી અને પગાર પૂરતી સીમિત રહી નથી, પરંતુ ઘણા સ્થળોએ તે ખુલ્લી રીતે દક્ષિણ એશિયાઈઓ અને તેમાંય ખાસ કરીને ભારતીયો વિરુદ્ધના દ્વેષમાં બદલાઈ રહી છે.
અમેરિકાના રાષ્ટ્રપતિ Donald Trump એ પણ કડક ઇમિગ્રેશન વિરોધી વલણ અપનાવ્યું છે. સપ્ટેમ્બરમાં તેમણે ચોક્કસ નવી H-1B અરજીઓ પર $100,000 ફી લગાવતો આદેશ કર્યો હતો, જો કે સાથે એમ પણ કહ્યું કે અમેરિકાને હજુ પણ કેટલાક વિદેશી કુશળ કામદારોની જરૂર છે.
પરંતુ એશિયન અમેરિકન હિતરક્ષક સંગઠનોનું કહેવું છે કે નીતિ અંગેની ચર્ચા હવે હેટ સ્પીચ હેઠળ દટાવા માંડી છે. ભારતીય અમેરિકનો અમેરિકાની વસ્તીના આશરે 1.5 ટકા છે અને તેઓ સૌથી વધુ શિક્ષિત તથા આર્થિક રીતે સફળ ઇમિગ્રન્ટ સમુદાયોમાં ગણાય છે. ઘણા લોકો ટેકનોલોજી, મેડિસિન અને બિઝનેસ ક્ષેત્રમાં કામ કરે છે.
અમેરિકામાં ભારતીય વિરોધી ભાવનાઓમાં ઝડપી વધારો
Stop AAPI Hateના આંકડાનો ઉલ્લેખ કરતાં NYT કહે છે કે જાન્યુઆરી 2023 થી ડિસેમ્બર 2025 વચ્ચે ઑનલાઇન દક્ષિણ એશિયાઈ વિરોધી ગાળો અને હિંસા જોડાયેલી ભાષામાં 115 ટકાનો વધારો થયો છે. ભારતીયોને અમેરિકામાંથી તગેડી મૂકો-“deport Indians” જેવી પોસ્ટ્રર્સે માત્ર બે મહિનામાં લગભગ 280 મિલિયન વ્યૂઝ મેળવી લીધા લીધા છે. ભારતીય-અમેરિકન ટિપ્પણિકાર દિનેશ ડી’સૂઝાએ લખ્યું છે કે 40 વર્ષની અમેરિકાની કારકિર્દીમાં મેં આવું ભાષણ ક્યારેય જોયું નથી.” આ નવો ટ્રેન્ડ “ગ્રેટ રિપ્લેસમેન્ટ થિયરી” જેવી ખોટી ધારણાઓ સાથે જોડાઈ રહ્યો છે—જ્યાં હવે યહૂદીઓની જગ્યાએ ભારતીયોને “કબજો કરતા” બતાવવામાં આવે છે.
ટેક્સાસ ફ્રિસ્કોની બેઠકમાં પણ ઝેરી વાતાવરણ
ટેક્સાસના ફ્રિસ્કોમાં સિટી કાઉન્સિલ બેઠક દરમિયાન કેટલાક વક્તાઓએ H-1B કાર્યક્રમને “ભારતીય કબજા” માટે જવાબદાર ઠેરવ્યા છે. મેયર જેફ ચેનીએ કહ્યું હતુ કે આવા ઘણા લોકો એટલે કે બહારથી આવેલા લોકો ઉશ્કેરણી કરવાનું કામ કરતાં હતા.
રાજકારણીઓ અને જાહેર વ્યક્તિઓ નિશાન પર
Kamala Harrisના ચૂંટણી અભિયાન દરમિયાન પણ દક્ષિણ એશિયાઈ વિરોધી ભાષા ઉચ્ચારણ વધી ગયા હતા. ઉપરાંત, JD Vance અને તેમની ભારતીય મૂળની પત્ની ઉષા વેન્સ સામે પણ જાતિવાદી ટિપ્પણીઓ થઈ હતી. ટેક ઉદ્યોગપતિ Vivek Ramaswamy ને પણ “anchor baby” જેવી ટિપ્પણીઓનો સામનો કરવો પડ્યો હતો.
H-1B વિઝા શું છે?
H-1B વિઝા યોજના 1990માં શરૂ થઈ હતી, જે દર વર્ષે આશરે 85,000 વિદેશી નિષ્ણાતોને અમેરિકામાં કામ કરવાની મંજૂરી આપે છે. Pew Research Centerના અહેવાલમાં જણાવ્યા મુજબ 2023માં મંજૂર થયેલી H-1B અરજીઓમાંથી લગભગ 75 ટકા અરજીઓ ભારતીય કામદારોની તરફેણમાં રહી હતી. મોટાભાગે સોફ્ટવેર પ્રોગ્રામર અને કમ્પ્યુટર ઇજનેરોને આવકાર આપવામાં આવ્યો હતો. કંપનીઓ કહે છે કે સ્થાનિક ટેલેન્ટ ઓછું છે, જ્યારે શ્રમિક સંગઠનો આ યોજના દુરુપયોગ થતી હોવાનું માને છે.
H-1B વિઝા અંગેની ચર્ચા હવે નીતિથી આગળ વધી દ્વેષભર્યા વલણમાં ફેરવાઈ રહી છે. 280 મિલિયન વ્યૂઝ અને 115 ટકાનો વધારો એ બતાવે છે કે ભારતીયો સામેની ઑનલાઇન નફરત ગંભીર સ્તરે પહોંચી ગઈ છે—જે માત્ર ઇમિગ્રેશન નહીં, પરંતુ સામાજિક સૌહાર્દ માટે પણ ચિંતા જનક છે.
