રૂ. 590 કરોડના ફ્રોડના ખુલાસા પછી IDFC First Bankના શેર ફોકસમાં રહેશે
સોમવારે બજાર ખુલતા જ IDFC First Bankના શેરના ભાવમાં ખાસ્સી હલચલ જોવા મળી શકે છે. ચંડીગઢની એક બ્રાંચમાં આશરે રૂ.590 કરોડના સંદિગ્ધ ફ્રોડનો ખુલાસો થતાં બેન્ક ફરી દબાણમાં આવી ગઈ છે. આ રકમ બેંકના ઓક્ટોબર-ડિસેમ્બર ત્રિમાસિક (Q3)ના રૂ. 503 કરોડના નેટ પ્રોફિટથી પણ વધુ છે અને 2024-25ના કુલ વાર્ષિક નફાના લગભગ 38 ટકા જેટલી થાય છે. તેનું પ્રાવિઝન આ જ વરસે કરવામાં આવે તો બેન્કનો નફો ઘટી જવાની સંભાવના છે. તેની સીધી અસર હેઠળ શેરહોલ્ડર્સના હોલ્ડિંગની વેલ્યુ પર પડી શકે છે.
ફ્રોડ કેવી રીતે સામે આવ્યો?
હરિયાણા સરકારના એક વિભાગે પોતાના ખાતું બંધ કરીને રકમ અન્ય બેંકમાં ટ્રાન્સફર કરવાની વિનંતી કરી તે દરમિયાન ખાતામાં દર્શાવેલી રકમ અને વાસ્તવિક બેલેન્સ વચ્ચે તફાવત જોવા મળ્યો હતો. ત્યારબાદ અન્ય સરકારી એકમોના ખાતાઓમાં પણ આવી ગરબડ હોવાનું ધ્યાનમાં આવ્યું હતું. સ્થાનિક અહેવાલ મુજબ હરિયાણા સરકારે બે પ્રાઈવેટ બેંકોમાં રહેલા સરકારી ખાતા બંધ કરવાનો નિર્ણય લીધો હતો.
બેંકની કાર્યવાહી
- ચાર અધિકારીઓને સસ્પેન્ડ કરવામાં આવ્યા
- સ્વતંત્ર બાહ્ય એજન્સી દ્વારા ફોરેન્સિક ઓડિટ થશે
- પોલીસ ફરિયાદ નોંધાઈ
- શિસ્તભંગ, નાગરિક અને ફોજદારી કાર્યવાહી હાથ ધરાશે
આઈડીએફસી બેન્કનું કહેવું છે કે આ મામલો માત્ર ચંડીગઢની એક ચોક્કસ બ્રાંચમાં સરકારી ખાતાઓ સુધી મર્યાદિત છે અને અન્ય ગ્રાહકો પર અસર પડેલી જોવા મળતી નથી.
નાણાકીય પરિસ્થિતિ
2024-25માં માઇક્રોફાઇનાન્સ ક્ષેત્રની મુશ્કેલીઓ વચ્ચે બેન્કે કઠિન વર્ષ જોયું હતું.
- વાર્ષિક નેટ પ્રોફિટમાં 48 ટકાનો ઘટાડો થયો છે. આ ઘટાડો 1,525 કરોડનો ખળે,
- માઇક્રોફાઇનાન્સ પોર્ટફોલિયો 28 ટકા ઓછો કર્યો છે.
- કુલ લોન બુકમાં તેનો હિસ્સો 6 ટકાથી ઘટાડી 4 ટકા કર્યો
જોકે 2025-26ના ત્રીજા ત્રિમાસિક ગાળામાં બેન્કનું નાણાંકીય પરફોર્મન્સ મજબૂત રહ્યું છે.
- નેટ પ્રોફિટ 48 ટકા વધીને રૂ.503 કરોડ થયો છે.
- એપ્રિલ-ડિસેમ્બર 2025 દરમ્યાન 8 ટકા વૃદ્ધિ સાથે નફો રૂ. 1,317 કરોડ થયો છે.
ગત એક વર્ષમાં શેરા ભાવમાં લગભગ 39 ટકાનો વધારો થયો છે. આ વધારો Nifty Bankના વાર્ષિક 26 ટકાના વધારાથી ઘણો વધુ છે.
આગળ શું?
સરકારી ખાતાઓ સંકળાયેલા હોવાને કારણે આંતરિક નિયંત્રણ અને બ્રાંચ લેવલ ગવર્નન્સ અંગે પ્રશ્નો ઊભા થઈ શકે છે. હવે બજારનું ધ્યાન સ્વતંત્ર ફોરેન્સિક ઓડિટ અને તેના પરિણામો પર રહેશે. માઇક્રોફાઇનાન્સ મુશ્કેલીઓમાંથી બહાર આવી રહેલી બેંક માટે આ ઘટના નવો પડકાર બની શકે છે.
