ઠંડા પીણા સ્પ્રાઈટમાં ગાબાપેન્ટિનની ત્રણ-ત્રણ ગોળીઓ નાખીને નશો કરતાં યુવાનો

નસ દબાવાથી થતી પીડા માટેની દવાનો ઉપયોગ નશો કરવા માટેઃ આર્ટિફિશિયલ ઇન્ટેલિજન્સથી પ્રસ્ક્રિપ્શન બનાવીને કેમિસ્ટો પાસે બેફામ ખરીદવામાં આવતી ગાબાબેન્ટિનની ગોળીઓ

આર્ટિફિશિયલ ઇન્ટેલિજન્સની મદદથી પ્રિસ્ક્રિપ્શન બનાવીને તેના પર ગાબાપેન્ટિન નામની દવાની ગોળીઓ ખરીદીને સ્પ્રાઈટ તરીકે જાણીતા ઠંડાં પીણામાં નાખીને તેનો નશો કરવાનું ચલણ અમદાવાદના યુવાનોમાં વધી રહ્યું છે. અમદાવાદના સિંધુભવન રોડ, 200 ફૂટના રિંગ રોડ પર ઝૂંડાલ સર્કલ પાસેના કોફી હાઉસમાં, થલતેજ નજીક ન્યૂયોર્ક ટાવર પાસે અને ગોદરેજ સિટીના વિસ્તારમાં રોજ સાંજ પછી યુવાનો આ દવાનો નશો કરી રહ્યા છે.

ગુજરાતના કેમિસ્ટ એન્ડ ડ્રગિસ્ટ એસોસિયેશનના પ્રમુખનું જશુભાઈ પટેલનું કહેવું છે કે વાસ્તવમાં નસ દબાવાને કારણે થતી પીડામાં રાહત આપવા માટે મૂળ ગાબાપેન્ટિન નામની દવામાંથી સેંકડો કંપનીઓ જુદાં જુદાં બ્રાન્ડ નેમથી દવાઓ બનાવે છે. માણસ પથારી વશ હોય ત્યારે આ દવા લેવામાં આવે છે. નાર્કોટિક્સ દવાના શિડ્યુલમાં આ દવાને લેવામાં આવેલી નથી. તેમનું કહેવું છે કે આર્ટિફિશિયલ ઇન્ટેલિજન્સના પ્રિસ્ક્રિપ્શનનો દુરુપયોગ કરવામાં આવી રહ્યો છે. તેનાથી દવા ખરીદીને નશો કરવા માટે ઉપયોગ કરવામાં આવી રહ્યો છે. તેનાથી યુવાધન અવળે રવાડે ચઢી રહ્યું છે.

તેનો બેફામ ઉપયોગ કરવામાં આવી રહ્યો છે. કોઈ સિનિયર સિટીઝનને પણ આ દવા આપવામાં આવે છે. માણસ એકદમ પથારીવશ હોય તેવા કિસ્સામાં આ દવા આપવામાં આવે છે. આ દવાની 75 મિલીગ્રામની ગોળી લેનારને ડૉક્ટર સલાહ આપે છે કે આ દવા લીધા પછી રાતના ઊઠવાનું થાય તો તરત ઊભા થવું નહિ. આ દવા લેનાર ઝડપથી ઊભા થાય તો તે પડી જાય તેવી સંભાવના રહેલી છે. પરંતુ આ યુવાનો તો એક સાથે ત્રણ ત્રણ કે ચાર ચાર ગોળીઓ સ્પ્રાઈટ નામના ઠંડાપીણામાં નાખીને લઈ લે છે.

આ દવાનો નશો કરવા માટે તેઓ આર્ટિફિશિયલ ઇન્ટેલિજન્સથી પ્રિસ્ક્રિપ્શન બનાવી લઈને તેની ખરીદી કરી લે છે. કેટલાક ડૉક્ટર્સ પાસે ગાબાપેન્ટિનના જેનરિક પ્રોડક્ટ્સ આવે છે. આ પ્રોડક્ટ્સને ડૉક્ટર પાસેથી કે કમ્પાઉન્ડર પાસેથી પણ મેળવી લેવામાં આવે છે. જેનરિક પ્રોડક્ટ્સ મોંઘા પણ મળે છે. તેમાં માર્જિન પણ સારા હોય છે. તેથી કંપનીઓ તેનું આ રીતે વેચાણ થતું હોય તો તેની સામે આંખ આડા કાન કરે છે. જેનરિકમાં મલ્ટીનેશનલ કંપનીઓના પ્રોડક્ટ્સ કરતાંય વધુ વેચાય છે. તેથી  જેનરિક દવા બનાવનારાઓ પણ આ દવા બનાવ્યા કરે છે. ડૉક્ટરને પણ બલ્કમાં આપી દે છે.

ગાબાપેન્ટિનના ઓવરડોઝથી મૃત્યુ પણ થઈ શકે

ગાબાપેન્ટિનનો ઓવરડોઝ લેનારાઓને ચક્કર આવવાની, નશામાં ચૂર રહેતા હોવાની, એક જ વસ્તુ ડબલ દેખાવાની, બોલવામાં લોચા પડવાની, ઝાડા થવાની, ઉબકાં આવવાની, ઉલટી થવાની, શરીરની હલચલ પરનો અંકુશ ગુમાવી દેવાની, બ્લડ પ્રેશર ઘટી જવાની, હૃદયના ધબકારા વધી જવાની, શ્વાસ લેવામાં તકલીફ પડવાની, કીડનીની તકલીફ ધરાવનારા યુવાનો કોમામાં સરકી જવાની સમસ્યાનો સામનો કરવો પડી શકે છે. ગાબાપેન્ટિનનો ઓવરડોઝ કરનારાઓનું ક્યારેક મૃત્યુ પણ થાય છે. ગાબાપેન્ટિનનો સતત ઓવરડોઝ કરવાથી મૃત્યુ થવાનું જોખમ વધતુ જાય છે.  દારુ સાથે ગાબાપેન્ટિન લેવાથી વધુ જોખમી સાબિત થાય છે. શ્વાસોચ્છ્વાસની પ્રક્રિયા ધીમી પડી જાય છે.