હવે એકવારમાં બેન્ક એકાઉન્ટમાં રોકડેથી રૂ. 50,000થી વધુ જમા કરાવશો તો પાનકાર્ડ નહિ માગે
PAN કી નિયમોમાં ફેરફાર થતાં રોજિંદી લેવડદેવડ પર પડશે અસરઃ વર્ષે બચત ખાતામાં રૂ. 10 લાખથી વધુ રોકડેથી જમા કરાવે તો જ પાનકાર્ડ આપવો પડશે
બેન્કના બચતા ખાતામાં પહેલા એકવારમાં રૂ.50,000થી વધુ રોકડેથી જમા કરાવવા માટે પાનકાર્ડ નંબર લખવો ફરજિયાત હતો, પરંતુ આવકવેરા ધારા હેઠળ સીબીડીટીએ તૈયાર કરેલા નવા નિયમો હેઠળ હવે એક નાણાકીય વર્ષમાં એક કે વધુ બેંક ખાતામાં કુલ રૂ. 10 લાખ કે તેથી વધુ રોકડ જમા કે ઉપાડ કરશો ત્યારે જ PAN કાર્ડ આપવો ફરજિયાત રહેશે. નવા પ્રસ્તાવથી દૈનિક ગણતરી બદલે વાર્ષિક કુલ રકમ આધારે નિયમ લાગુ થશે, જેથી સામાન્ય બેંકિંગ વ્યવહારોમાં કાગળકામ ઓછું થશે, એમ ટેક્સ કન્સલ્ટન્ટ પ્રમોદ પોપટનું કહેવું છે. કરન્ટ એકાઉન્ટમાં અલગ લિમિટ હોય છે. કરન્ટ એકાઉન્ટ અંગે કોઈ ફોડ પાડવામાં આવ્યો નથી.
બીજીતરફ વાહન એટલે કે મોટર વાહન કે પછી સ્કૂટરની કિંમત રૂ. 5 લાખથી વધુ હોય તો જ PAN કાર્ડ આપવું પડશે. હાલમાં કોઈપણ કિંમતના વાહન માટે PAN ફરજિયાત છે. આ ફેરફારથી ઓછી કિંમતના વાહન ખરીદદારોને રાહત મળશે.
હોટેલ, રેસ્ટોરાં, બેન્ક્વેટ હોલ, કન્વેન્શન સેન્ટર અથવા ઇવેન્ટ મેનેજરને ચુકવણી રૂ. 1 લાખથી વધુ થશે ત્યારે જ PAN ફરજિયાત રહેશે. અત્યારે ₹50,000થી વધુ બિલ પર PAN આપવું પડે છે.
રિયલ એસ્ટેટ ડીલમાં નવી મર્યાદા નક્કી કરવામાં આવી છે. સ્થાવર મિલકતની ખરીદી કે વેચાણ કે પછી ભેટ તરીકે આપવામાં આવી હોય અથવા સંયુક્ત વિકાસ માટે લેવામાં આવી હોય તો તેને માટે PAN કાર્ડ આપવાની હાલની મર્યાદા રૂ. 10 લાખ છે તે વધારીને રૂ. 20 લાખ કરવાની દરખાસ્ત છે. આ ફેરફાર મિલકતના વધતા ભાવોને ધ્યાનમાં રાખીને કરવામાં આવ્યો છે.
કરદાતાઓના ઇન્સ્યોરન્સના ખાતાં માટે PAN કાર્ડ ફરજિયાત કરી દેવામાં આવ્યો છે. હવે કોઈપણ ઇન્સ્યોરન્સ કંપનીમાં ખાતું ખોલતી વખતે PAN આપવું જ પડશે. અત્યારે જીવનવીમાનું વાર્ષિક પ્રીમિયમ રૂ. 50,000થી વધુ હોય તેવા કિસ્સાઓમાં જ પાનકાર્ડ આપવો પડતો હતો. હવે દરેક વીમા માટે પાનકાર્ડ ફરજિયાત કરી દેવામાં આવ્યો છે.
નવા પ્રસ્તાવો મુજબ અનેક નાણાકીય લેવડદેવડ માટેની મર્યાદા વધારવામાં આવી છે, જેથી નાની ટ્રાન્ઝેક્શનમાં રાહત મળે અને મોટી રકમના વ્યવહારો પર કડક નજર રાખી શકાશે. આ ડ્રાફ્ટ નિયમો હાલ જાહેર પ્રતિસાદ માટે ખુલ્લા રાખવામાં આવ્યા છે અને આગામી વર્ષે અમલમાં આવનાર ઇન્કમ ટેક્સ એક્ટ 2025 સાથે સુસંગત છે.
પાનકાર્ડ અંગેના ડ્રાફ્ટ નિયમોના બીજા મુદ્દાઓ
• એમ્પ્લોયર દ્વારા મળતા લાભોની મર્યાદા વધારવી
• ક્રિપ્ટો ટ્રાન્ઝેક્શનની ફરજિયાત જાણકારી ઇન્કમ ટેક્સ વિભાગને આપવી
• CBDC (ડિજિટલ રૂપિયા)ને માન્ય ઇલેક્ટ્રોનિક પેમેન્ટ તરીકે માન્યતા
CBDTએ બજેટ 2026 પછી પ્રસ્તુત મુસદ્દાની જાહેરાત કરવામાં આવી છે. આગામી માર્ચ મહિનાની શરૂઆતમાં ફાઈનલ નિયમો જાહેર કરવામાં આવે તેવી શક્યતા છે.
