સ્તન કેન્સર સ્ક્રીનિંગમાં નવીન ટેક્નોલોજીનો આવતા ચિકીત્સા અને સારવાર સરળ બનશે
સ્તન કેન્સરની સારવાર માટે હવે નવતર સ્ક્રીનિંગ ટેક્નોલોજીઓ વિકસી રહી હોવાથી સ્તન કેન્સરની સારવાર અત્યંત સરળ, સુલભ અને આરામદાયક બની જશે. આ ટેક્નોલોજીને વૈજ્ઞાનિક રીતે માન્યતા મળી ચૂકી છે. સ્તન કેન્સરની સારવાર માટેના આ પોર્ટેબલ સોલ્યુશન્સ હવે મોટા હોસ્પિટલો અને ડાયગ્નોસ્ટિક સેન્ટર્સની બહાર પણ સ્તનના સ્વાસ્થ્યની પ્રાથમિક તપાસ શક્ય બનાવી રહ્યા હોવાનું UE LifeSciencesના છે, સહ-સ્થાપક અને સીઓઓ ભૌમિક સંઘવીએ જણાવ્યું હતું.
નવતર ટેક્નોલોજી ખાસ કરીને શહેરી ક્લિનિક્સ, વર્કપ્લેસ વેલનેસ પ્રોગ્રામ્સ, સમુદાય આરોગ્ય કેન્દ્રો અને અર્ધ-શહેરી વિસ્તારોમાં ખૂબ ઉપયોગી છે. પરંપરાગત ઈમેજિંગ સુવિધાઓ ઉપલબ્ધ ન હોય તેવા વિસ્તારોમાં પણ નવતર ટેક્નોલોજીની મદદથી સરળતાથી સ્તન કેન્સરની સારવાર કરી શકાશે.
યુવા મહિલાઓ અને ડેન્સ બ્રેસ્ટ ટિશ્યુ ધરાવતી મહિલાઓ માટે નિયમિત મેમોગ્રાફી હંમેશા અસરકારક નથી. આ પ્રકારના કિસ્સાઓમાં રેડિએશન-ફ્રી અને પેઇન-ફ્રી સ્ક્રીનિંગ સોલ્યુશન્સ અત્યંત જરૂરી બને છે.
ભૌમિક સંઘવીનું કહેવું છે કે ભારત મેડિકલ ઇનોવેશનનું મહત્વપૂર્ણ કેન્દ્ર બની રહ્યું છે. ભારતમાં વૈજ્ઞાનિક ક્ષમતા અને વાસ્તવિક આરોગ્ય પડકારોની સમજણ સાથે સસ્તાં અને સુલભ સોલ્યુશન્સ વિકસાવવામાં આવી રહ્યા છે.
iBreastExam જેવી ડિવાઇસ સ્ક્રીનિંગ પ્રક્રિયામાં ક્રાંતિ લાવી રહી છે. આ FDA-મંજૂર હેન્ડહેલ્ડ ઉપકરણ છે, જે પ્રાથમિક આરોગ્ય કર્મચારીઓને થોડા મિનિટોમાં, કોઈ દુખાવા કે રેડિએશન વગર સ્તનમાં ગાંઠ શોધવામાં મદદ કરે છે. આ ડિવાઇસ ટિશ્યુની કઠોરતા માપવા માટે ટેક્ટાઇલ સેન્સર ટેક્નોલોજીનો ઉપયોગ કરે છે. તેના માધ્યમથી સ્તનમાંના શંકાસ્પદ વિસ્તારો એટલે કે કેન્સરની ગાંઠ હોય તેવા વિસ્તારોને ઝડપથી ઓળખી શકાય છે. આમ ઝડપી ચિકીત્સા થઈ શકે છે અને સારવાર કરીને પરિણામ પણ મેળવી શકાય છે.
નવતર ટેક્નોલોજીની મદદથી કરવામાં આવેલા એક ક્લિનિકલ મૂલ્યાંકનમાં ટેક્નોલોજીએ 15 મહિલાઓમાં BI-RADS 4 સ્કોર દર્શાવ્યો હતો. તેમાંથી ત્રણ કેસમાં પ્રારંભિક તબક્કાના સ્તન કેન્સર(સ્ટેજ I અને DCIS)ને પુષ્ટિ મળી હતી. આ કેસોમાં સ્પર્શથી સ્તન કેન્સરની ગાંઠ ઓળખી શકાય તેવી જ નહોતી.
આ નવતર ટેક્નોલોજીને મહિલાઓ તરફથી પણ ખૂબ જ પોઝિટિવ પ્રતિસાદ મળ્યો છે. આ ટેક્નોલોજીની મદદથી સ્તન કેન્સરની ચકાસણી કરાવનારી 97 ટકા મહિલાઓએ આ પ્રક્રિયાને સ્વીકાર્ય ગણાવી હતી અને અન્યને તેનો આશરો લેવાની ભલામણ પણ કરી હતી. 98% મહિલાઓએ સ્થાનિક આરોગ્ય કેન્દ્રોમાં આ સુવિધા ઉપલબ્ધ હોવી જોઈએ તેવી ઈચ્છા વ્યક્ત કરી હતી.
સ્તન કેન્સર જો શરૂઆતના તબક્કામાં ઓળખાય તો જીવન બચાવવાની સંભાવના વધી જાય છે અને સારવારનો ખર્ચ તથા માનસિક ભાર ઘટે છે. છતાં, ઘણી મહિલાઓ હજુ પણ મોડા તબક્કામાં નિદાન થાય છે. આ માટેના મુખ્ય કારણોમાં જાગૃતિનો અભાવ, સ્ક્રીનિંગ સુવિધાઓની અછત, સામાજિક સંકોચ અને દુખાવાનો ભય સામેલ છે.
ઇન્ડિયન કાઉન્સિલ ઓફ મેડિકલ રિસર્ચ-નેશનલ સેન્ટર ફોર ડીસીઝ ઇન્ફોર્મેટિક્સ એન્ડ રીસર્ચના ડેટા મુજબ ભારતમાં લગભગ 2.1 લાખ સ્તન કેન્સરના કેસોના વિશ્લેષણમાં માત્ર 30 ટકા કેસમાં જ શરૂઆતના તબક્કામાં જ સ્તન કેન્સર હોવાનું ઓળખી શકાયું હતું. આ પરિસ્થિતિ દર્શાવે છે કે મહિલાઓ સુધી સ્ક્રીનિંગ સુવિધાઓ પહોંચાડવાની તાત્કાલિક જરૂર છે.
ભૌમિક સંઘવીએ જણાવ્યું કે સમુદાય આધારિત સ્ક્રીનિંગ પ્રોગ્રામ્સ અને પોર્ટેબલ ડાયગ્નોસ્ટિક ટૂલ્સના માધ્યમથી વધુ મહિલાઓ સુધી આરોગ્ય સેવાઓ પહોંચાડી શકાશે. 25,000થી વધુ મહિલાઓ પર થયેલા આંતરરાષ્ટ્રીય અભ્યાસો દર્શાવે છે કે આ ટેક્નોલોજીનો આશરો લેવાથી સ્તન કેન્સરનું વહેલું નિદાન કરવામાં મદદ મળે છે.
