નવરાત્રી પર્વ: રાજ્યભરમાં ૨૨ હજારથી વધુ ગરબા સ્થળોએ ગુજરાત પોલીસનો ચુસ્ત બંદોબસ્ત

ખૈલૈયાઓના રક્ષણ માટે મહિલા પોલીસની ‘શી-ટીમ’થી લઈને સાયબર સેલના કુશળ અધિકારીઓ સજ્જ

અમદાવાદ: આસ્થા અને ઉલ્લાસના મહાપર્વ નવરાત્રી દરમિયાન સમગ્ર રાજ્યમાં સુરક્ષિત વાતાવરણ જળવાઈ રહે તે માટે ગુજરાત પોલીસે કડક સુરક્ષા પ્લાન અમલી બનાવ્યો છે. રાજ્યભરના ૩૬૪ પાર્ટી પ્લોટ, ૨,૭૨૨ જાહેર ગરબા અને ૧૬,૫૨૭ શેરી ગરબા સહિત ૨૨ હજારથી વધુ સ્થળોએ લાખો ખેલૈયાઓની સુરક્ષા માટે પોલીસ, હોમગાર્ડ અને TRB ના જવાનોને તૈનાત કરવામાં આવ્યા છે.

ગૃહ રાજ્યમંત્રી શ્રી હર્ષ સંઘવીના માર્ગદર્શન અને રાજ્ય પોલીસ વડા શ્રી જ્ઞાનેન્દ્રસિંહ મલિકના આદેશથી મહાનગરોથી માંડીને ગ્રામીણ વિસ્તારો સુધી ‘થ્રી લેયર’ સુરક્ષા વ્યવસ્થા અને સતત પેટ્રોલિંગ ગોઠવવામાં આવ્યું છે.

📌 મહિલા સુરક્ષા અને આયોજકો માટે કડક ગાઈડલાઈન

• ટ્રેડિશનલ ડ્રેસમાં ‘શી-ટીમ’: ગરબા ગ્રાઉન્ડમાં ખેલૈયાઓના વેશમાં ટ્રેડિશનલ ડ્રેસ તથા સાદા કપડાંમાં ‘શી-ટીમ’ (She-Team) તૈનાત રહેશે. છેડતી, અસભ્ય વર્તન કે હેરાનગતિ કરનારા તત્વો સામે સ્થળ પર જ કડક કાનૂની કાર્યવાહી કરવામાં આવશે.

• આયોજકો માટે ફરજિયાત નિયમો: ગરબાના તમામ આયોજકો માટે અલગ એન્ટ્રી-એક્ઝિટ ગેટ, સમગ્ર પરિસરમાં સીસીટીવી (CCTV) કેમેરા, ડોરફ્રેમ અને હેન્ડ હેલ્ડ મેટલ ડિટેક્ટર તેમજ બ્રેથ એનાલાઈઝરની વ્યવસ્થા ફરજિયાત બનાવવામાં આવી છે.

• સાયબર સેલની કડક નજર: સોશિયલ મીડિયા પર અફવાઓ, વાંધાજનક ટિપ્પણીઓ કે ધાર્મિક વૈમનસ્ય ફેલાવનારા તત્વો પર સાયબર સેલ દ્વારા ૨૪ કલાક મોનિટરિંગ કરાશે અને આઈ.ટી. એક્ટ હેઠળ તાત્કાલિક એફઆઈઆર નોંધી ધરપકડ કરવામાં આવશે.

નાગરિકો તથા ખેલૈયાઓને કોઈપણ શંકાસ્પદ પ્રવૃત્તિ કે કટોકટીના સમયે તાત્કાલિક ઈમરજન્સી હેલ્પલાઈન ‘૧૧૨’ અથવા સ્થાનિક પોલીસ કંટ્રોલ રૂમનો સંપર્ક કરવા અપીલ પણ કરવામાં આવી છે.