રાજેશ એક્સપોર્ટે 15.15 લાખ કરોડના ખોટા વ્યવહારો બતાવ્યા છેઃ સેબી
કંપનીના પ્રમોટર રાજેશ મહેતાને આગામી આદેશ સુધી સીધી કે આડકતરી રીતે કંપનીના શેર ખરીદવા, વેચવા કે અન્ય કોઈ વ્યવહાર કરવા પર રોક લગાવી દીધી
રાજેશ એક્સપોર્ટ્સ દ્વારા નાણાકીય વર્ષ 2020-21 થી 2024-25 દરમિયાન તેની પેટાકંપનીઓના લગભગ 15.15 લાખ કરોડ રૂપિયાના વ્યવહારો ખોટી રીતે દર્શાવ્યા છે, જે કંપનીની કુલ આવકના લગભગ 99.80 ટકા જેટલા થાય છે. સેબીએ કંપનીના પ્રમોટર રાજેશ મહેતાને આગામી આદેશ સુધી સીધી કે આડકતરી રીતે કંપનીના શેર ખરીદવા, વેચવા કે અન્ય કોઈ વ્યવહાર કરવા પર રોક લગાવી દીધી છે. સેબી દ્વારા લેવામાં આવેલા કેટલાક પગલાં નીચે મુજબ છે.
રાજેશ એક્સપોર્ટે મોટા અને ખોટા વહેવારો બતાવીને સંભવચઃ આઈજીએસટી, સીજીએસટી, સ્ટેટ જીએસટી, ડ્યૂટી ડોબેક, રોડટેપ, એક્સપોર્ટ પ્રમોશન ગેરન્ટી સ્કીમ અને એવડવાન્સ લાઈસન્સના ખોટા લાભ લીધા હોવાની પણ શક્યતા રહેલી છે. પરિણામે આગામી દિવસોમાં તેની સામેની તપાસમાં ઘણી એજન્સીઓએ સક્રિય થવું પડે તેવી સંભાવના રહેલી છે.
મોટા પાયે અનિયમિતતા: સેબીનો આદેશ જણાવે છે કે કંપનીએ ખૂબ જ મોટા પાયે આવક વધારે બતાવી હતી, ભંડોળની અયોગ્ય હેરફેર કરી હતી અને નાણાકીય માહિતી જાહેર કરવામાં નિષ્ફળ રહી હતી.
નવો ફોરેન્સિક ઓડિટ: કંપનીના હિસાબી ચોપડાઓની તપાસ માટે નવા ફોરેન્સિક ઓડિટરની નિમણૂક કરવામાં આવશે. અગાઉના ઓડિટરમાં કંપની કે પ્રમોટરે સહકાર આપ્યો નહોતો.
અન્ય સંસ્થાઓની ભૂમિકા: સેબી આ મામલે નેશનલ ફાઇનાન્શિયલ રિપોર્ટિંગ ઓથોરિટી (NFRA) ને પણ જાણ કરશે, કારણ કે સ્ટેચ્યુટરી ઓડિટર્સની કામગીરીમાં પણ ક્ષતિઓ જણાઈ છે.
આદેશનું કારણ: માર્ચ 2024માં એક શેરધારકની ફરિયાદ બાદ તપાસ શરૂ કરવામાં આવી હતી. જેમાં બે વર્ષથી વધુ સમયથી બાકી લેણાં (trade receivables) અંગે શંકાસ્પદ નાણાકીય ગોટાળાનો આરોપ હતો.
પ્રાથમિક તપાસના તારણો
આવકમાં વધારો: સેબીનું કહેવું છે કે લગભગ 97-99 ટકા આવક વાસ્તવિક આવક કરતાં વધારે બતાવવામાં આવી હતી, જેને સેબીએ “ગંભીર અને અત્યાર સુધી ન સાંભળેલી ઘટના” ગણાવી છે.
ભંડોળની હેરફેર: સેબીએ નોંધ્યું છે કે કંપનીના નાણાં પ્રમોટર રાજેશ મહેતાના અંગત બેંક ખાતાઓ દ્વારા ફેરવવામાં આવ્યા હતા, જેનો હેતુ બેંક ખાતાઓની ગોપનીયતા જાળવવાનો અને વ્યવહારોના મૂળને છુપાવવાનો હતો.
સહકારનો અભાવ: તપાસ દરમિયાન કંપનીએ તેના ERP સિસ્ટમ અને હિસાબી પુસ્તકોની એક્સેસ આપવાનો ઇનકાર કર્યો હતો. વિદેશી પેટાકંપનીઓના ડેટા શેર કરવામાં પણ અચકાઈ હતી.
