રજિસ્ટ્રેશન કેન્સલ થયું હોય તેવા વેપારીઓ સાથે સોદા કરનારાઓના ક્રેડિટ લેજર બ્લોક કર્યા
- કાયદેસર નોટિસ આપવી ફરજિયાત હોવા છતાંય વેપારીઓની જાણ બહાર તેમની ઇલેક્ટ્રોનિક ક્રેડિટ લેજરમાં જમા પડેલી ઇનપુટ ટેક્સ ક્રેડિટ ગેરકાયદે બ્લોક કરી દેવામાં આવી
- ઇલેક્ટ્રોનિક ક્રેડિટ લેજર બ્લોક કરતાં પહેલા નોટિસ આપવી ફરજિયાત છે: રાજ્યના જીએસટી અધિકારીઓની ગરબડિયા પ્રવૃત્તિ
અમદાવાદઃ તાજેતરમાં જ જે વેપારીઓના જીએસટી રજિસ્ટ્રેશન નંબર રદ કે કેન્સલ થયા હોય કે કરાવવામાં આવ્યા હોય તેવા વેપારીઓ સાથે સોદા કરનાર અને વેપાર ધંધો ચાલુ હોય તેવા વેપારીઓના જીએસટીના પોર્ટલ પરના ઇલેક્ટ્રોનિક ક્રેડિટ લેજરમાંની રકમને બ્લોક કરી દેવામાં આવી રહી છે.
જીએસટી કચેરીના અધિકારીઓનું વેપારીનું ઇલેક્ટ્રોનિક ક્રેડિટ લેજરમાં પડેલી ઇનપુટ ટેક્સ ક્રેડિટ બ્લોક કરી દેવાનું વલણ ગેરકાયદેસર અને અન્યાયકર્તા છે. ગુડ્સ એન્ડ સર્વિસ ટેક્સ એક્ટની કલમ 16 પ્રમાણે ક્રેડિટ વેપારીને મળવા પાત્ર છે. વેપારીઓના ઇલેક્ટ્રોનિક ક્રેડિટ લેજર બ્લોક કરવાનું પગલું નિયમ નંબર 86 બીપ્રમાણે ઇલેક્ટ્રોનિક ક્રેડિટ લેજરમાંથી ક્રેડિટ બ્લોક કરી રહ્યા છે. વેપારીએ ખોટી રીતે ટેક્સ ક્રેડિટ મેળવી હોય તો નિયમનો ભંગ થાય છે. આ નિયમનો ભંગ થાય તો જ તે ક્રેડિટને બ્લોક કરી શકાય છે.
વેપારીએ ખોટી રીતે ઇનપુટ ટેક્સ ક્રેડિટ મેળવી હોય તો જ બ્લોક કરી શકાય તેમ હોવા છતાંય નોટિસ આપ્યા વિના મનસ્વી રીતે ક્રેડિટ બ્લોક કરી રહ્યા છે. વેપારીઓ પાસે ડિમાન્ડ નોટિસ ન હોવા છતાં અને કોઈપણ પ્રકારનો ઓર્ડર પાસ કરવામાં ન આવ્યો હોવા છતાં ઇલેક્ટ્રોનિક ક્રેડિટ લેજર બ્લોક કરી દે છે.
વેપારી સામે કલમ 73 કે કલમ 74 હેઠળ ઓર્ડર થયો હોય અને વેપારી અપીલમાં ન ગયા હોય તેવા કિસ્સાઓમાં જીએસટી અધિકારીઓ ઇલેક્ટ્રોનિક ક્રેડિટ લેજર બ્લોક કરી શકાય છે. સમગ્ર ગુજરાતમાં ક્રેડિટ લેજર બ્લોક કર્યા હોવાની બૂમ ઊઠી છે.
ગુજરાત રાજ્યના જીએસટી કચેરીના અધિકારીઓના આ વલણને પરિણામે અમદાવાદ ગુજરાતની વેપારી આલમમાં હોબાળી મચી ગયો છે. બીજું, ક્રેડિટ લેજર બ્લોક ન કર્યા હોય તેવા અધિકારીઓ સાથે ચર્ચા કરવા માટે ગુજરાતના જીએસટી કમિશનર આરતી કંવરે આજે જીએસટીના અધિકારીઓની એક બેઠક પણ બોલાવી હોવાનું જાણવા મળી રહ્યું છે.
અમદાવાદ અને ગુજરાતના વેપારીઓને આમંત્રણ
સન્માનનીય વેપારીઓ તેમના વેપાર કે બિઝનેસને લગતી સમસ્યાઓની વિગતો વાઈબ્રન્ટ ઉદ્યોગ વેબસાઈટને તેના વોટ્સ એપ નંબર 6355436394 પર મોકલી આપી શકે છે. આપની સમસ્યાને લગતી માહિતી યોગ્ય પુરાવા સાથે મોકલવા વિનંતી છે. આ પુરાવાઓને યોગ્ય ચકાસણી કરીને તેના પરથી અહેવાલ તૈયાર કરીને પ્રગટ કરવામાં આવશે. આપના નામને ગુપ્ત રાખવાની અમે આપને ખાતરી આપીએ છીએ. વેપારીઓની સમસ્યા માટે અમે સંઘર્ષ કરવા તૈયાર છીએ. આપના સહકારથી અમે સફળતાની સીડી પર એક કદમ ઉપર ચઢી શકીશું.
