ચોથા ત્રિમાસિક ગાળાના TCSનો નફો 12 ટકા વધી રૂ. 13,784 કરોડ
ચોથા ત્રિમાસિક ગાળામાં કંપનીની કુલ આવક 9.6% વધીને રૂ 70,698 કરોડ થઈ છે. 2024-25ના ચોથા ત્રિમાસિક ગાળાની સરખામણીમાં તેમાં 5.3 ટકાનો વધારો થયો છે.
નાણાંકીય વર્ષ 2025-26ના ચોથા ત્રિમાસિક ગાળા એટલે કે 31મી માર્ચ 2026ના પૂરા થયેલા ત્રિમાસિક ગાળાને અંતે ટાટા કન્સલ્ટન્સી સર્વિસિનો ચોખ્ખો નફો 12 ટકા વધીને રૂ. 13,784 કરોડનો થયો છે. કંપનીને નવા વધારે ઓર્ડર મળ્યા હોવાથી કંપનીના નફામાં વધારો થયો છે. કંપનીના ચીફ એક્ઝિક્યુટીવ ઓફિસર અને મેનેજિંગ ડિરેક્ટર કે. શ્રીવાસ્તવે જણાવ્યું હતુ કે “અમે સતત ત્રીજા ત્રિમાસિકમાં વૃદ્ધિ નોંધાવી છે, જે ત્રણ મોટા ડીલ્સ અને $12 બિલિયનના કુલ કરાર મૂલ્યને કારણે શક્ય બન્યું છે. વિવિધ બજારો અને ઉદ્યોગોમાં સારો વિકાસ જોવા મળ્યો છે. આર્થિક પડકારો હોવા છતાં, ગ્રાહકો ટેક્નોલોજીમાં રોકાણ માટે પ્રતિબદ્ધ છે.”
આવક અને આર્ટિફિશિયલ ઇન્ટેલિજન્સનો બિઝનેસ
ચોથા ત્રિમાસિક ગાળામાં કંપનીની કુલ આવક 9.6% વધીને રૂ. 70,698 કરોડ થઈ છે. 2024-25ના ચોથા ત્રિમાસિક ગાળાની સરખામણીમાં તેમાં 5.3 ટકાનો વધારો થયો છે. જોકે શેરબજારમાં ટીસીએસનું લિસ્ટિંગ થયું તે પછી પહેલાવાર 2025-26ના ચોથા ત્રિમાસિક ગાળામાં આવકમાં 2.4 ટકાનો ઘટાડો જોવા મળ્યો છે. બીજીતરફ આર્ટિફિશિયલ ઇન્ટેલિજન્સ આધારિત કંપનીની આવક 2.3 અબજ ડૉલરના મથાળાને આંબી ગઈ છે. આર્ટિફિશિયલ ઇન્ટેલિજન્સ આધારિત સોલ્યુશન્સના સતત વધી રહેલા ઉપયોગને કારણે કંપનીને આગળ વૃદ્ધિની આશા છે. આગામી વર્ષમાં પણ આ જ બાબત કંપનીને મોટી આવક જનરેટ કરી આપશે. બીજીતરફ એચ-1બી વિઝાને મુદ્દે ડોનાલ્ડ ટ્રમ્પની સરકાર સામે અમેરિકી સરકારના જ પ્રતિનિધિઓ અને કંપનીઓ દ્વારા ઊભા કરવામાં આવી રહેલા દબાણને કારણે એચ-1બી વિઝાની ફી દૂર થાય કે ઘટાડો થાય તો કંપની વધુ સારુ પરફોર્મન્સ આપે તેવી ધારણા બાંધવામાં આવી રહી છે.
કંપનીને મળતા કામકાજનું કુલ કરાર મૂલ્ય-ટોટલ કોન્ટ્રાક્ટ વેલ્યુ 29 ટકા વધીને 12 અબજ ડૉલરને વળોટી ગયું છે. કંપનીના ઓપરેટિંગ માર્જિન 25.3 ટકાની સપાટીએ સ્થિર છે. ફોરેક્સના દર બદલાઈ જતાં કંપનીની સર્વિસના એક્સપોર્ટ થકી થતી આવકમાં વધારો થઈ શકે છે. આ વધારો રૂ. 174 કરોડથી માંડીને રૂ. 959 કરોડનો થઈ શકે છે.
પગાર વધારો અને કર્મચારી માહિતી
ટીસીએસના તમામ કર્મચારીઓ માટે 1 એપ્રિલથી વાર્ષિક પગાર વધારો અમલમાં આવી જશે. કંપનીના ટોપ પરફોર્મર્સને દસ ટકાથી વધુનો પગાર વધારો મળી શકે છે. કંપનીની સાથે અત્યારે કામ કરતાં કર્મચારીઓની સંખ્યા 5,84,519ની છે. તદુપરાંત 2025-26ના ચોથા ત્રિમાસિક ગાળામાં બીજા નવા 2,356 કર્મચારીઓ ઉમેરાયા છે. તેમના પગારનો ખર્ચ પણ વધશે. કંપનીનો જોબ છોડીને બીજી કંપનીમાં જોબ માટે જનારા કર્મચારીઓની ટકા વારી અંદાજે 13.7 ટકા જેટલી છે. ટીસીએસના માનવ સંસાધન વિભાગના વડા સુદીપ કનુમલનું કહેવું છ કે કંપની ભવિષ્ય માટે તૈયાર વર્કફોર્સ મેળવવા માટે નવું રોકાણ કરી રહી છે.
પ્રાદેશિક બજારોનું પ્રદર્શન
પ્રાદેશિક બજારોના કામકાજમાં વાર્ષિક 23 ટકાનો ઘટાડો જોવા મળ્યો છે. તેમાં ત્રિમાસિક ધોરણે માત્ર 1.7 ટકાની વૃદ્ધિ જોવા મળી છે. બીજીતરફ લેટિન અમેરિકાના બજારમાં 2.9 ટકાનો ઘટાડો આવ્યો છે. બ્રિટનના બજારમાં 1.2 ટકાનો ઘટાડો આવ્યો છે. જોકે પશ્ચિમ એશિયાના દેશોના તથા આફ્રિકાના દેશોના કામકાજમાં 7.8 ટકાની વૃદ્ધિ જોવા મળી છે. બીજીતરફ બેન્કિંગ, ફાઈનાન્શિયલ સર્વિસ અને ઇન્સ્યોરન્સના સેક્ટરમાં કંપનીના કામકાજ સતત વધી રહ્યા છે. કન્ઝ્યુમર બિઝનેસ, લાઈફ સાયન્સ અને હેલ્થકેર ક્ષેત્રોમાં પણ ટીસીએસના કામકાજમાં વૃદ્ધિ ચાલુ જ રહી છે.
મધ્યપૂર્વ સંઘર્ષનો અસર
ટીસીએસના ચીફ એક્ઝિક્યુટિવ ઓફિસરનું કહેવું છે કે ઇરાઇ અને અમેરિકા-ઇઝરાયલ વચ્ચે થયેલા સંઘર્ષને કારણે અત્યાર સુધી સુધી માત્ર મુસાફરી અને ટ્રાન્સપોર્ટ પર અસર છે. પરંતુ સપ્લાય ચેઇનમાં વિક્ષેપ થાય તો ભવિષ્યમાં અસર થઈ શકે છે. તેની કંપનીના આગામી મહિનાઓના પરફોર્મન્સ પર અસર આવી શકે છે.
ડેટા સેન્ટર અને AI ડિમાન્ડ
ટીસીએસના એક્ઝિક્યુટીવ ડિરેક્ટર આરતી સુબ્રમનિયનનું કહેવું છે કે હવે દેશ અને વિદેશમાં હાયપર વૉલ્ટ ડેટા સેન્ટર માટેની ડિમાન્ડમાં જબરદસ્ત વધારો આવી રહ્યો છે. પરિણામે કંપનીને આ મોરચે નવા કામકાજ મળી શકે છે. બે, 100થી 200 મેગાવોટની ક્ષમતાવાલા આર્ટિફિશિયલ ઇન્ટેલિજન્સના પ્રોજેક્ટ્સમાં ગ્રાહકોનો રસ વધવા માંડ્યો છે. ત્રીજું, એન્ટરપ્રાઈસ ટ્રાન્સફોર્મેશન, ડિજિટલ એન્જિનિયરિંગ અને ક્લાઉડ મોર્ડનાઈઝેશનના ક્ષેત્રોમાં મજબૂત વૃદ્ધિ જોવા મળી રહી છે.
