અમ્બ્રેલા ઓર્ગેનાઈઝેશનની મદદથી નાની સહકારી બેન્કો ખાતેદારોને આધુનિક સેવા આપશે
- અમ્બ્રેલા ઓર્ગેનાઈઝેશન નાની સહકારી બેન્કોની કોમ્પ્યુટરથી માંડીને આધુનિક સુવિધા માટેના દરેક ઉપકરણો બજાર કરતાં સસ્તા દામે પૂરા પાડશે.
અર્બન કોઓપરેટીવ બેન્ક્સ-UCB માટેનું અમ્બ્રેલા ઓર્ગેનાઈઝેશન માટે જોઈતું રૂ. 300 કરોડનું ભંડોળ એકત્રિત થઈ જતાં NUCFDC કાર્યરત બની ગયું છે. તેની સાથે જ ભારતના નાણાકીય ઇકોસિસ્ટમના મહત્વપૂર્ણ ઘટક એવા UCBને મજબૂત અને આધુનિક બનાવવા સરકારની મહેચ્છા પૂર્ણ થવા આવી છે. હિતધારકોની લાંબા સમયથી NUCFDCની રચના કરવાની માગણી કરી રહ્યા હતા. તેમની આ માગણીને આખરે પ્રતિસાદ મળ્યો છે.
અર્બન કોઓપરેટિવ બેંકો (UCBs) માટે અમ્બ્રેલા ઓર્ગેનાઇઝેશન તરીકે સ્થાપિત નેશનલ અર્બન કોઓપરેટિવ ફાઇનાન્સ એન્ડ ડેવલપમેન્ટ કોર્પોરેશન લિમિટેડ (NUCFDC) હવે રૂ. 300 કરોડનું લઘુત્તમ નિયમનકારી મૂડીભંડોળ એકઠું કર્યા બાદ સંપૂર્ણ રીતે કાર્યરત બની ગયું છે, એમ કેન્દ્રના નાણાં રાજ્ય મંત્રી પંકજ ચૌધરીએ લોકસભામાં તાજેતરમાં આપેલા એક જવાબમાં પ્રસ્તુત માહિતી આપી હતી.
સહકારી બેન્કની હજારો શાખાઓ અને લાખો જમાકર્તાઓને શહેરી તથા અર્ધશહેરી વિસ્તારોમાં સેવા આપતી બેન્કો પાસેની સિસ્ટમ આધુનિક સમયની જરૂરિયાતને પરિપૂર્ણ કરે તેવી નથી. આધુનિક ટેકનોલોજી સિસ્ટમ વસાવવા માટેના અને તેની જાળવણી માટેના ઊંચા ખર્ચ અને સંયુક્ત સેવાઓની મર્યાદિત ઉપલબ્ધિના કારણે મુશ્કેલીઓ અનુભવી રહી હતી.
એક દાયકાથી વધુ સમય પહેલાં રિઝર્વ બેંક ઓફ ઇન્ડિયા (RBI)ના નિષ્ણાત જૂથોએ નાની નાની સહકારી બેન્કો પણ આધુનિક ટેક્નોલોજીનો ઉપયોગ કરે તેવી ભલામણ કરી હતી, આ ભલામણ કરવાનો હેતુ સંયુક્ત ઇન્ફ્રાસ્ટ્રક્ચર અને સંકલિત સહાય દ્વારા સમગ્ર ક્ષેત્રને એકસાથે આગળ લાવવાનો હતો. નવું અમ્બ્રેલા ઓર્ગેનાઈઝેશનની કેન્દ્રિય પ્લેટફોર્મ તરીકે ડિઝાઇન તૈયાર કરવામાં આવી છે. તેથી UCB ઝડપથી બદલાતી નાણાકીય દુનિયામાં અસરકારક રીતે સ્પર્ધા કરી શકશે.
નવી દિલ્હીમાં રજિસ્ટર્ડ ઓફિસ અને મુંબઈમાં કોર્પોરેટ ઓફિસ ધરાવતી NUCFDC RBI સાથે નોન-બેંકિંગ ફાઇનાન્સ કંપની તરીકે નોંધાયેલ છે અને તે ક્ષેત્ર માટે સ્વ-નિયમનકારી સંસ્થા તરીકે પણ કાર્ય કરશે.
નવી ટેક્નોલોજી મળી જતાં નાની સહકારી બેન્કો પણ અત્યાધુનિક સુવિધા તેમને કસ્ટમર્સને પૂરી પાડી શકશે. આ સંસ્થા નાની અને મધ્યમ UCBને મૂડી ખર્ચ ઘટાડવામાં, અદ્યતન ટેકનોલોજી મેળવવામાં અને સ્કેલની અર્થવ્યવસ્થા હાંસલ કરવામાં મદદ કરશે.
અમ્બ્રેલા ઓર્ગેનાઈઝેશને પહેલેથી જ સાયબર ઇન્શ્યોરન્સ, કાનૂની સલાહ અને જોખમ આધારિત આંતરિક ઓડિટ જેવી નોન-ફંડ સેવાઓ શરૂ કરી દીધી છે. હવે આગામી મહિનાઓમાં ફંડિંગ સપોર્ટ તથા અન્ય નાણાકીય ઉત્પાદનો રજૂ કરવાની તેની યોજના છે. સંયુક્ત ટેકનોલોજી ઇન્ફ્રાસ્ટ્રક્ચર વિકસાવવું તેનો મુખ્ય ઉદ્દેશ હોવાથી કોર બેંકિંગ સિસ્ટમ આધુનિક બનશે, સાયબર સુરક્ષા મજબૂત થશે અને ગ્રાહકોને વધુ સારી ડિજિટલ સેવાઓ મળશે.
નિષ્ણાતોનું કહેવું છે કે NUCFDCની શરૂઆત અર્બન કોઓપરેટિવ બેંકો માટે નવા અધ્યાયની શરૂઆત છે, કારણ કે નાની સહકારી બેન્કો સ્થાનિક સમુદાય, માઇક્રો એન્ટરપ્રાઇઝ અને મધ્યમ આવક ધરાવતા પરિવારોના ફાઈનાન્શિયલ ઇક્લુઝન મહત્વની ભૂમિકા ભજવતી આવી છે.
NUCFDCનું કાર્યરત થવું સહકારી બેંકિંગ ક્ષેત્રને ભારતની નાણાકીય વ્યવસ્થાનો મજબૂત અને સમાવેશક આધારસ્તંભ બનાવવા સરકારના વિશાળ દ્રષ્ટિકોણને દર્શાવે છે, જેથી સમુદાય કેન્દ્રિત ભાવના જાળવી રાખતાં આધુનિક પડકારોને સામનો કરી શકાશે.
