આજે શેરબજારમાં શું કરશો?

બ્રોકરેજ હાઉસની ભલામણો

મોતીલાલ ઓસવાલ બ્રોકરેજ હાઉસે Notthen ARC- નોર્ધન આર્કના શેર્સમાં કવરેજ શરૂ કરવાની ભલામણ કરી છે. ટાર્ગેટ ભાવ રૂ. 360નો આપ્યો છે.

બ્રોકરેજ હાઉસ એમકે ગ્લોબલે IDFC First Bank-આઈડીએફસી ફર્સ્ટ બેન્કના શેર્સમાં લેવાલી કરવાની ભલામણ કરી છે. ટાર્ગેટ ભાવ રૂ. 80નો આપવામાં આવ્યો છે. જોકે મોતીલાલ ઓસવાલ બ્રોકરેજ હાઉસ તેમાં લેણ કરવા કે વેચવાલી કરવામાંથી એક પણ સલાહ આપતું નથી. અત્યારે જેવી છે તેવી સ્થિતિ જાળવી રાખવાની ભલામણ ખરે છે.

મોતીલાલ ઓસવાલ બ્રોકરેજ હાઉસે CIE Automotive-સીઆઈઈ ઓટોમોટીવના શેર્સમાં લેણ કરવાની ભલામણ કરી છે. શેરનો ટાર્ગેટ ભાવ રૂ. 539નો નક્કી કરવામાં આવ્યો છે.

ગઈકાલે ધરાશાયી થયેલું શેરબજાર આજે બાઉન્સબેક કરશે?

મંગળવારે ભારતીય શેરબજારમાં ભારે વેચવાલી જોવા મળી હતી. આઈટી શેરોમાં વેચાણના દબાણને કારણે રોકાણકારોના મનોબળ પર અસર પડી અને બંને મુખ્ય સૂચકાંક 1 ટકા કરતાં વધુ તૂટી ગયા હતા. BSE Sensex દિવસ દરમિયાન 1,068.74 પોઈન્ટ અથવા 1.28 ટકા ઘટીને 82,225.92 પર બંધ રહ્યો હતો. NIFTY 50 પણ 25,327.60 સુધી તૂટ્યો હતો, પરંતુ અંતમાં થોડો સુધરી 25,424.65 પર બંધ રહ્યો હતો. દિવસના આરંભથી તેમાં 288.35 પોઈન્ટ અથવા 1.12 ટકાનો ઘટાડો જોવા મળ્યો હતો.  શેરબજારના વિશ્લેષકોનું માનવું છે કે હાલની અસ્થિરતા (volatility) ટૂંકા ગાળામાં યથાવત રહી શકે છે. બજારમાં તેજી લાવવાના પ્રયત્નો સામે વેચવાલીનું દબાણ આવવાની શક્યતા છે.

વૈશ્વિક રોકાણકારોની દ્રષ્ટિ

BNP Paribas એ પોતાના ઇન્ડિયા સ્ટ્રેટેજી નોટમાં જણાવ્યું છે કે હોંગકોંગ અને સિંગાપુરમાં 45 રોકાણકારો સાથેની મુલાકાત દરમિયાન ભારત અંગે થોડી સકારાત્મકતા જોવા મળી હતી. નવેમ્બર 2025ની સરખામણીમાં રોકાણકારો ભારતીય ઈક્વિટીઝને વધુ સ્વીકારતા થયા છે. છતાં, રોકાણકારો હાલમાં કોરિયા, તાઈવાન અને જાપાન જેવા બજારોમાં વધુ તકો જોઈ રહ્યા છે.
નિફ્ટી આઉટલુક (ટેકનિકલ વિશ્લેષણ)

એનરિચ મનીના નિષ્ણાતોના જણાવ્યા મુજબ શેરબજારનો રિલેટીવ સ્ટ્રેન્ગ્થ ઇન્ડેક્સ-RSI લગભગ 45 નજીક હોવાથી કમજોરીનો સંકેત આપે છે. MACD હજી નેગેટિવ ઝોનમાં છે. રેલી દરમિયાન સતત વેચવાલી જોવા મળે છે.

મહત્વના લેવલની વાત કરવામાં આવે તો 25,500–25,600ની સપાટીએ પ્રતિકાર જોવા મળી રહ્યો છે. 25,600 ઉપર બ્રેકઆઉટ આવે તો 25,700 સુધી શોર્ટ કવરિંગ શક્ય છે. 25,300 નીચે સસ્ટેઇન્ડ મૂવ જોવા મળી શકે છે અને બજાર 25,200 અથવા નીચા સ્તર સુધી ઘટાડો બતાવી શકે છે.

Religare Broking Ltdના મતાનુસાર બજાર 25,400 સપોર્ટ મહત્વપૂર્ણ છે. 25,400 નીચે તૂટે તો બજાર 25,245 (200-Day EMA) સુધી આવી શકે છે. ત્યારબાદ 25,100 મોટો સપોર્ટ છે. બજારમાં ઉપરની તરફ 25,600–25,800 ઝોનમાં તરત જ પ્રતિકાર જોવા મલી શકે છે. નિષ્ણાતો સલાહ આપી રહ્યા છે કે હાલના સમયમાં રોકાણકારોએ પસંદગીયુક્ત શેરોમાં હળવી પોઝિશન રાખવી જોઈએ.

સેન્સેક્સ આઉટલુક

કોટક સિક્યોરિટીઝના ઇક્વિટી રિસર્ચ વિભાગના વડા શ્રીકાંત ચૌહાણનું કહેવું છે કે સેન્સેક્સ 82,000 (200-Day SMA) મહત્વપૂર્ણ સપોર્ટ ધરાવે છે. 82,000 ઉપર ટકી રહે તો સેન્સેક્સમાં 82,500–82,800 સુધી ઉછાળો જોવા મળી શકે છે. 82,000 નીચે તૂટે તો ઘટીને 81,700–81,500 સુધી જઈ શકે છે. સમગ્રતયા બજારમાં અસ્થિરતા યથાવત છે. ટેકનિકલ રીતે બજાર નબળું દેખાય છે, પરંતુ મહત્વના સપોર્ટ લેવલ જાળવાય તો ટૂંકા ગાળામાં રિકવરી આવી શકે છે. રોકાણકારોએ સાવચેત અભિગમ અપનાવી પસંદગીયુક્ત સ્ટોક્સમાં મર્યાદિત રોકાણ કરવું જોઈએ.