આજે શેરબજારમાં શું કરશો?

આજે શેરબજારમાં ખરીદવા લાયક શેરમાં કરુર વૈશ્ય બેન્કના શેર્સ પર ટ્રેડર્સ અને ઇન્વેસ્ટર્સ નજર ઠેરવી શકે છે. તેના શેરનો વર્તમાન બજાર ભાવ રૂ. 295.85 છે. કરુર વૈશ્ય બેન્કના શેરનો ભાવ સુધરીને રૂ. 375ના મથાળા સુધી જઈ શકે છે. આમ વર્તમાન સપાટીથી તેમાં રૂ. 90નો વધારો આવી શકે તેમ નિષ્ણાતોનું માનવું છે. કરુર વૈશ્ય બેન્કના શેરના ભાવમાં ગત સપ્તાહમાં 12 ટકાનો સુધારો જોવા મળ્યો છે. કરુર વૈશ્ય બેન્કના શેરનો સાપ્તાહિક ટેકનિકલ ચાર્ટ દર્શાવે છે કે તેમાં તેજીની પેટર્ન રચાઈ રહી છે. લાંબા ગાળાથી તેના ભાવ વધારાને ટ્રેન્ડ લાઈનનો સપોર્ટ હતો. આ સપોર્ની મદદથી ગયા અઠવાડિયે તેમાં સુધારો આવ્યો છે.

આ તમામ પરિબળોને ધ્યાનમા લેતા ટેકનિકલ ચાર્ટ દર્શાવે છે કે તેમાં તેજીનો ટ્રેન્ડ ચાલુ થઈ ગયો છે. તેથી શેરના ભાવમાં વધુ વધારો આવી શકે છે અને રૂ. 375ના મથાળે પહોંચી શકે છે. ચાર્ટ પરથી નિર્દેશ મળે છે કે તેજીની છલાંગ લગાવતા પહેલા રૂ. 280ની સપાટી સુધીનું કરેક્શન સ્ક્રિપમાં આવી શકે છે. ત્યારબાદ શરૂ થનારી સુધારાની ચાલમાં રોકાણકારો તેમાં ઇન્વેસ્ટ કે ટ્રેડ કરવાનું આયોજન કરી શકે છે. પહેલા રૂ. 295ની ભાવ સપાટીએ કરુર વૈશ્ય બેન્કના શેરમાં લેણ કરી શકાય છે. તેમ જ રૂ. 250નો સ્ટોપલૉસ રાખીને કામકાજ કરી શકાય છે. શેરનો ભાવ વધીને રૂ. 330 અને રૂ. 350ની સપાટીએ પહોંચે ત્યારે સ્ટોપલૉસ ઉપર લઈ જઈને રૂ. 300નો કરી દેવાનો રહેશે. તેનાથીય આગળ જાય તો રૂ.350નો સ્ટોપલૉસ રાખીને કામકાજ ચાલુ રાખી શકાય છે. શેરનો ભાવ રૂ. 375ના મથાળે પહોંચે ત્યારે તેમાંથી નીકળી જવું હિતાવહ છે.

નિફ્ટીમાં આજે શું કરશો?

આજના સેન્સેક્સ અને નિફ્ટી અપડેટની વાત કરીએ તો આજના દિવસની શરૂઆતમાં વૈશ્વિક બજારોમાં નબળાઈની અસર જોવા મળી શકે છે. ક્રૂડ ઓઈલના બેરલદીઠ ભાવ $115 સુધી પહોંચતા બજાર પરનું દબાણ વધી ગયું છે. GIFT નિફ્ટી 350 પોઈન્ટ ઘટીને લગભગ 22,450 પર ટ્રેડ થઈ રહ્યો છે, જે નબળી શરૂઆતનો સંકેત આપે છે. એશિયન બજારોમાં પણ ભારે ઘટાડો નોંધાયો છે.

પશ્ચિમ એશિયામાં વધી રહેલા જીઓપોલિટિકલ તણાવને કારણે ક્રૂડના ભાવ સતત વધી રહ્યા છે. બ્રેન્ટ ક્રૂડ $115.55 પ્રતિ બેરલ સુધી પહોંચ્યું છે. છેલ્લા એક મહિનામાં તેમાં લગભગ 59 ટકાનો ઉછાળો આવ્યો હોવાનું દર્શાવે છે.

એશિયન બજારો

જાપાનનો નિક્કેઈમાં લગભગ 225 પોઈન્ટનો એટલેકે લગભગ 3.97 ટકાનો ઘટાડો જોવા મળ્યો છે. ટોપિક્સ ઇન્ડેક્સ 3.9 ટકા નીચે ગયો છે. કોરિયાનો કોસ્પી 5 ટકાથી વધુ તૂટ્યો છે. કોસ્ડાક ઇન્ડેક્સ 3.97 ટકા નીચે ઉતરી ગયો છે. હેંગ સેંગ ફ્યુચર્સ પણ નબળાઈ દર્શાવી રહ્યો છે.

અમેરિકન બજારોની વાત કરીએ તો ડાઉ જોન્સ 793 પોઈન્ટ ઘટ્યો છે. સ્ટાન્ડર્ડ એન્ડ પુઅર્સ 1.67 ટકા નીચે ઉતરી ગયો છે. નાસ્ડાક 2.15 ટકા તૂટ્યો છે. ક્રૂડ ઓઈલના ભાવ પણ વધી રહ્યા છે. બ્રેન્ટ ક્રૂડ $115 આસપાસ ટ્રેડ થઈ રહ્યું છે, જે બજારની દિશા અને દશા માટે અત્યંત મહત્વપૂર્ણ પરિબળ ગણાય છે.

સોનાં અને ચાંદીના ભાવ

આજે 24 કેરેટ સોનાનો દસગ્રામનો ભાવ રૂ. 1,47,050 પ્રતિ 10 ગ્રામ અને 18 કેરેટ સોનાનો દસગ્રામનો ભાવ રૂ. 1,10,287 બોલાઈ રહ્યો છે. તેમ જ ચાંદીના કિલોગ્રામદીઠ રૂ. 2.27 લાખ બોલાઈ રહ્યા છે.

વિદેશી ને સ્થાનિક સંસ્થાકીય રોકાણકારો

વિદેશી સંસ્થાકીય રોકાણકારો દ્વારા રૂ. 4,084 કરોડની વેચવાલી કરવામાં આવી છે. તેની સામે સ્થાનિક સંસ્થાકીય રોકાણકારોએ રૂ. 3,338 કરોડની ખરીદી કરી છે.

ડોલર અને રૂપિયો

ડોલર ઇન્ડેક્સ: 100.16નો છે. ભારતીય રૂપિયા 0.88 ટકા ઘટીને રૂ. 94.81 પ્રતિ ડોલર પર આવી ગયો છે.