NSE IPO માટે 4થી 4.5 ટકા શેર ઓફર ફોર સેલ હેઠળ વેચવાની તૈયારીમાં
NSE પાસે હાલ 1.91 લાખ શેરધારકો છે અને અમારો પ્રયાસ રહેશે કે IPO માટે તેમાંથી 4થી 4.5 ટકા શેર ઉપલબ્ધ કરાવવામાં આવશે.
ગ્રેટર નોઇડા: નેશનલ સ્ટોક એક્સચેન્જ (NSE) પોતાના આવનારા પ્રારંભિક જાહેર ઇશ્યૂ (IPO)માં હાલના શેરધારકો પાસેથી 4થી 4.5 ટકા જેટલા શેર ‘ઓફર ફોર સેલ’ (OFS) મારફતે બજારમાં મૂકવાની તૈયારીમાં છે. આ માહિતી NSEના મુખ્ય કાર્યકારી અધિકારી આશિષ કુમાર ચૌહાને શનિવારે આપી હતી.
વર્લ્ડ ફોરમ ઓફ એકાઉન્ટ્સની બેઠક દરમિયાન મીડિયા સાથે વાત કરતાં ચૌહાને જણાવ્યું હતું કે, “NSE પાસે હાલ 1.91 લાખ શેરધારકો છે અને અમારો પ્રયાસ રહેશે કે IPO માટે તેમાંથી 4થી 4.5 ટકા શેર ઉપલબ્ધ કરાવવામાં આવશે.” તેમણે ઉમેર્યું હતું કે જો આટલા પ્રમાણમાં શેર ઉપલબ્ધ ન થાય તો IPO માટે નવા શેર જારી કરવાની શક્યતા પણ નકારી શકાય નહીં. હાલની સ્થિતિ પ્રમાણે NSEનું IPO બજારમાં આવવા માટે હજી 7થી 8 મહિના લાગી શકે છે.
NSEના શેર કયા સ્ટોક એક્સચેન્જ પર લિસ્ટ થશે તે અંગે પૂછતાં ચૌહાને સંકેત આપ્યો હતો કે NSE સિવાયની તમામ શક્ય એક્સચેન્જ પર લિસ્ટિંગ થઈ શકે છે, કારણ કે કોઈપણ એક્સચેન્જના શેર તે જ એક્સચેન્જ પર ટ્રેડ થઈ શકતા નથી. નોંધનીય છે કે NSEએ પ્રથમ વખત 2016માં IPO માટે અરજી કરી હતી, પરંતુ રેગ્યુલેટરી તપાસ તેજ થતાં તે પાછી ખેંચી લેવામાં આવી હતી.
હવે SEBI દ્વારા No-Objection Certificate (NOC) મળતાં NSEનું IPO ફરી એક વખત વાસ્તવિકતા તરફ આગળ વધી રહ્યું છે. NSEના ચેરમેન શ્રીનિવાસ ઇન્જેટીએ સોશિયલ મીડિયા પર કહ્યું હતું કે, “આ સાથે અમે અમારા તમામ સ્ટેકહોલ્ડર્સ માટે મૂલ્ય સર્જનના નવા અધ્યાયની શરૂઆત કરી રહ્યા છીએ.” આ મંજૂરી NSEના 26મા સ્થાપના દિવસના એક દિવસ પહેલાં મળી છે, જે દિવસે NSEએ ભારતમાં ઇન્ટરનેટ ટ્રેડિંગની શરૂઆત કરી હતી.
SEBI તરફથી મળેલી મંજૂરી છતાં NSE સામે ચાલતા co-location અને dark fibre કેસોની સેટલમેન્ટ પ્રક્રિયા હજી ચાલી રહી છે. NSEએ જૂન 2025માં આ કેસો સેટલ કરવા માટે અરજી કરી હતી અને આશરે રૂ.1,400 કરોડ ચૂકવવાની ઓફર કરી છે. NSEએ અગાઉથી પોતાના હિસાબમાં રૂ.1,297 કરોડની જોગવાઈ કરી છે તથા રૂ.100 કરોડનો ડિપોઝિટ પણ જમા કરાવ્યો છે.
આ રેગ્યુલેટરી પ્રગતિના કારણે NSEના અનલિસ્ટેડ શેરોમાં છેલ્લા કેટલાક મહિનામાં 10થી 15 ટકા સુધીનો ઉછાળો જોવા મળ્યો છે. ખાનગી માર્કેટ પ્લેટફોર્મ્સ પર NSEના શેરની કિંમત આશરે રૂ.2,050 આસપાસ બતાવવામાં આવી રહી છે, જેના આધારે કંપનીનું માર્કેટ કેપિટલાઇઝેશન લગભગ ₹5 લાખ કરોડ સુધી પહોંચી ગયું છે.
