ચાર મહિના સુધી પેટ્રોલ-ડિઝલ કે રાંધણગેસની અછતની જરાય ચિંતા કરશો નહિઃ ભારત સરકાર
અમદાવાદઃ ભારતની ઊર્જા પુરવઠા સ્થિતિ સંપૂર્ણ રીતે સુરક્ષિત અને નિયંત્રણમાં છે. હાલ દેશમાં લગભગ બે મહિના જેટલો ક્રૂડ ઓઇલનો સ્ટોક ઉપલબ્ધ છે અને આગામી બે મહિના માટેનો સપ્લાય પણ પહેલેથી જ સુનિશ્ચિત કરવામાં આવ્યો છે. એટલે કે કુલ મળીને લગભગ 4 મહિના માટે ક્રૂડ ઓઇલ ઉપલબ્ધ છે, એમ ભારત સરકારે જણાવ્યું છે.
ભારદની જનતાને તકલીફ ન પડે તે માટે ભારતમાં રાંધણગેસનું ઉત્પાદન રોજનું વધારીને 50,000 ટનના રેકોર્ડ સ્તરે પહોંચાડવામાં આવ્યું છે. આમ આ ઉત્પાદન દેશની રાંધણગેસની કુલ જરૂરિયાતના 60 ટકાથી વધારે છે. આ કારણે દરરોજની આયાત જરૂરિયાત ઘટીને લગભગ 30,000 ટન રહી ગઈ છે. ભારત સરકારના પેટ્રોલિયમ અને કુદરતી ગેસના ખાતાના જણાવ્યા મુજબ “દેશના તમામ પેટ્રોલ પંપ પર પૂરતો સ્ટોક છે. પેટ્રોલ, ડીઝલ અથવા LPGની કોઈ પણ જગ્યાએ અછત નથી. લોકો ગેરમાર્ગે દોરતી ખોટી માહિતીથી ગભરાય નહીં.”
મજબૂત સ્ટોક સ્થિતિ
ભારત પાસે કુલ 74 દિવસની સ્ટોરેજ ક્ષમતા છે, જેમાં હાલ લગભગ 60 દિવસનો વાસ્તવિક સ્ટોક ઉપલબ્ધ છે. તેમાં ક્રૂડ ઓઇલ, પેટ્રોલિયમ ઉત્પાદનો અને સ્ટ્રેટેજિક સ્ટોરેજનો સમાવેશ થાય છે. જ્યારે પશ્ચિમ એશિયા સંકટ ચાલુ છે, ત્યારે પણ દેશના તમામ રિફાઇનરી 100 ટકાથી વધુ ક્ષમતા સાથે કાર્યરત છે. ભારત સરકારે ઉમેર્યું કે, “દરેક ભારતીય માટે ઓછામાં ઓછા 2 મહિના સુધી સતત સપ્લાય ઉપલબ્ધ છે અને આગામી 2 મહિના માટેની ખરીદી પણ પહેલેથી જ નક્કી થઈ ગઈ છે.” બીજું, હોર્મુઝની ખાડીમાંથી ભારતીય જહાજોને સલામત રીતે પસાર થવા દેવાની ઇરાને છૂટ આપી હોવાથી હવે નવો સપ્લાય પણ ચાલુ થઈ જશે. તેથી પેટ્રોલ-ડિઝલ કે રાંધણગેસની અછત થવાની સંભાવના બહુ જ ઓછી થઈ જાય તેમ જણાઈ રહ્યું છે.
રાંધણગેસનું ઉત્પાદન અને આયાત
લિક્વિડ પેટ્રોલિયમ ગેસ-રાંધણગેસના કન્ટ્રોલ ઓર્ડર હેઠળ સ્થાનિક રિફાઇનરીઓએ ઉત્પાદન 40 ટકા વધારીને દરરોજ 50,000 ટન કર્યું છે, જ્યારે દેશની કુલ જરૂરિયાત લગભગ 80,000 ટનની આસપાસની છે. આથી આયાતની જરૂરિયાત ઘટીને 30,000 ટન પ્રતિદિન રહી છે. તેની સાથે જ લગભગ 8 લાખ ટન રાંધણગેસનો કાર્ગો પહેલેથી જ અમેરિકા, રશિયા, ઓસ્ટ્રેલિયા અને અન્ય દેશોમાંથી ભારત તરફ આવી રહ્યા છે. આ સપ્લાય દેશના રાંધણગેસની આયાત કરવા માટેના દેશના બાવીસ ટર્મિનલ્સ પર પહોંચશે.
