આરોગ્ય વીમાનું ભારતભરનું પ્રીમિયમ રૂ. 1.2 લાખ કરોડને આંબી ગયું
પ્રી-ઓથોરાઇઝેશન રિક્વેસ્ટ એક જ કલાકમાં મંજૂર કરવાનો ફાઈનલ ઓથોરાઇઝેશન ત્રણ કલાકમાં પૂર્ણ કરી દેવાનું ઇન્સ્યોરન્સ રેગ્યુલેટરી ડેવલપમેન્ટ ઓથોરિટીએ ફરજિયાત કર્યું
ભારતમાં હેલ્થ ઈન્શ્યોરન્સ ક્ષેત્ર સતત મજબૂત વૃદ્ધિ નોંધાવી રહ્યું છે. 2024-25 દરમિયાન કુલ હેલ્થ ઈન્શ્યોરન્સ પ્રીમિયમ રૂ. 1.2 લાખ કરોડને પાર પહોંચી ગયું છે. આ ક્ષેત્ર લગભગ 9 ટકા વૃદ્ધિ દરે વિકસી રહ્યું છે, એમ નાણાં ખાતાએ જાહેર કર્યુ છે. આ વૃદ્ધિ પાછળના મુખ્ય કારણોમાં આરોગ્ય અંગે લોકોની જાગૃતિમાં થયેલો વધારો જવાબદાર છે. હેલ્થકેર ફાઇનાન્સિંગની વધુ સુવિધા અને તબીબી ખર્ચ સામે નાણાકીય સુરક્ષા મેળવવાની વધતી માંગનો સમાવેશ થાય છે.
વીમાના ક્લેઈમ પ્રોસેસ કરવાના નવા નિયમો
પોલિસીધારકોને ઝડપી સેવા મળે તે માટે ઇન્સ્યુરન્સ રેગ્યુલેટરી એન્ડ ડેવલપમેન્ટ ઓથોરીટી ઓફ ઇન્ડિયા-ઈરડાઈએ કેશલેસ હેલ્થ ઈન્શ્યોરન્સ ક્લેઈમ માટે ચોક્કસ સમયમર્યાદા નક્કી કરી છે. એક, પ્રી-ઓથોરાઇઝેશન રિક્વેસ્ટ કરવામાં આવે તો તેને એક જ કલાકમાં મંજૂરી આપી દેવી જરૂરી છે. બે, વીમા ક્લેઈમ સાથે હોસ્પિટલમાં સારવાર લેવા માટે જાય તે પૂર્વે એટલે કે ફાઈનલ ઓથોરાઇઝેશન ત્રણ કલાકમાં પૂર્ણ કરી દેવું ફરજિયાત કરવામાં આવ્યું છે. આ નિયમોનો હેતુ વિલંબ ઘટાડવો અને દર્દીઓને સમયસર સારવાર મળી રહે તે સુનિશ્ચિત કરવો છે.
હેલ્થઇન્સ્યોરન્સ લેનારાઓના પ્રીમિયમ કેમ વધ્યા?
હેલ્થ ઈન્શ્યોરન્સ પ્રીમિયમમાં વધારો નીચેના પરિબળો પર આધારિત છે. એક, ઉંમર વધતા પોલિસીધારકોએ વધુ પ્રીમિયમ ચૂકવવું પડી રહ્યું છે. બે, તેમણે વધુ મોટી રકમનો આરોગ્ય વીમો લીધો હોવાથી હેલ્થ ઇન્સ્યોરન્સના પ્રીમિયમ વધ્યા છે. ત્રીજું, તેમણે આરોગ્ય વીમા હેઠળ વધુ કવરેજ માગ્યું હોવાથી વીમાના પ્રીમિયમ વધ્યા છે. ચોથું, તેમણે ખરીદેલી નવી અને સુધારેલી પોલિસીમાં વિશેષ ફીચર્સનો ઉમેરો કરવામાં આવ્યો હોવાથી પ્રીમિયમ વધ્યા છે. પાંચમું, મેડિકલ ખર્ચમાં એટલે કે હોસ્પટલ્સ દ્વારા આપવામાં આવતી સારવારના ખર્ચમાં થયેલો વધારો પણ આરોગ્ય વીમાના પ્રીમિયમમાં થયેલા વધારા માટે જવાબદાર છે. આ તમામ પરિબળો મળીને હેલ્થ ઈન્શ્યોરન્સ ક્ષેત્રને ઝડપી ગતિએ આગળ ધપાવી રહ્યા છે.
