ગુજરાત ચેમ્બરનો વાર્ષિક ટ્રેડ એક્સ્પો ગુજરાતના વિકાસનો નવો માર્ગ ખોલશે

ગુજરાત ચેમ્બરનો GATE-2 બિઝનેસ-ઇન્ડસ્ટ્રીઝ માટે તૈયાર કરવામાં આવી રહેલો લેન્ડસ્કેપ

ત્રણ દિવસના એક્સપોમાં સોનાલી બેન્દ્રે, રાકેશ બેદી જેવા કલાકારો અને દેશના અગ્રણી ઉદ્યોગપતિઓ ઉપસ્થિત રહેશે

રોજગારી નિર્માણની મહત્તમ સંભાવના ધરાવતા અતિનાના અને નાના ઉદ્યોગોના વિકાસ પર જ ધ્યાન કેન્દ્રિત કરવામાં આવશે

ગાંધીનગર હેલીપેડ પર યોજાનારા ગેટ એક્સ્પો-2માં હાજર રહેવા માટે 24000થી વધુ લોકોએ નામનું રજિસ્ટ્રેશન કરાવી લીધું

ભારતના વિકાસના વિઝન 2047ને સાકાર કરવાના પ્રયાસના એક ભાગરૂપે ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝ દ્વારા આ વખતે યોજવામાં આવનારા ગેટ-2 બિઝનેસ એક્સ્પોમાં ગુજરાત અને ભારતમાંથી 450થી વધુ સાહસિકોએ તેમના સ્ટોલમાં તેમના પ્રોડક્ટ્સ એક્ઝિબિટ કરશે. આ ગેટ-2 એક્સ્પો આગામી વીસથી પચ્ચીસ વર્ષમાં ઉદ્યોગની પ્રગતિની દિશાનો અણસાર પણ આપશે. ગુજરાતના વેપાર ઉદ્યોગના 25 વર્ષના વિઝન સાથે વૈશ્વિક સ્તરની ગુજરાતની મહત્વાકાંક્ષાને પણ સાકાર કરવાનો માર્ગ દેખાડશે, એમ ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝના પ્રમુખ સંદીપ એન્જિનિયરે આજે પત્રકારો સાથે વાતચીત કરતાં જણાવ્યું હતું.

તેમણે જણાવ્યું હતું કે ગેટ-2 એક્સ્પોના માધ્યમથી વૈશ્વિક સ્તરના ઉદ્યોગ સાહસોનું નિર્માણ કરવાનો પ્રયાસ કરવામાં આવશે. ઘોડાવત ગ્રુપના ચેરમેન સંજય ઘોડાવત શૂન્યથી શિખર સુધીની યાત્રા પૂરી કરવાના માર્ગનો આ સમારોહમાં ચિતાર આપશે. તેમ જ સેમિકન્ડક્ટરના યુગમાં પ્રવેશી રહેલા ગુજરાત અને ભારતના સાહસિકોએ સેમિકન્ડક્ટરના સેક્ટરમાં કઈ રીતે આગામી સફર પૂરી કરવા સક્રિય થવાનું છે તેનું માર્ગદર્શન પણ આપવામાં આવશે. આર્ટિફિશિયલ ઇન્ટેલિજન્સ અને ડીપ ટેક સેક્ટરમાં ઇન્વેસ્ટમેન્ટ કરવાથી પ્રગતિના નવા દ્વાર ખૂલશે તેની સમજણ પણ એક્સપર્ટ્સ આપશે. તેમ જ સ્પોર્ટ્સના બિઝનેસમાં ખૂલી રહેલી નવી તકનો લાભ કઈ રીતે લઈ શકાય તેનું માર્ગદર્શન પણ મળી રહેશે. સ્ટાર્ડ અપ ફંડિંગ અને વેન્ચર કેપિટાલિસ્ટનો સપોર્ટ મળી રહે તેના પ્રયાસો પણ ગેટ-2 એક્સપોના માધ્યમથી કરવામાં આવશે. આ સાથે જ ગેટ-2 એક્સપોમાં એક બિઝનેસને બીજા બિઝનેસ સાથે જોડાવાની તક પણ મળશે. એક બિઝનેસને બીજા બિઝનેસ સાહસિક સાથે સહયોગ સાધવાની તક પણ મળશે. નવતર સાહસિકોને પણ તેમના પ્રોડક્ટ્સને ડિસ્પ્લે કરવાનો મોકો મળશે.

ઓટોમોબાઈલ, મોબિલિટી, બેન્કિંગ, ફાઈનાન્શિયલ સર્વિસિસ અને ઇન્સ્યોરન્સ, ડિજિટલ ઇન્ફ્રાસ્ટ્રક્ચર, આર્ટિફિશિયલ ઇન્ટેજિલન્સ અને ઇન્ફોર્મેશન ટેક્નોલોજી, એજ્યુકેશન અને સ્કીલ ડેવપલમેન્ટ, હેલ્થકેર અને ફાર્માસ્યૂટિકલ્સ, કોમનવેલ્થ ગેમ્સના આયોજનને કેન્દ્રમાં રાખી ઇન્ફ્રાસ્ટ્રક્ચર અને રિયલ એસ્ટેટના ડેવલપમેન્ટ પર પણ એક્સપો ફોકસ કરશે. તદુપરાંત નાના અને મધ્યમ ઉદ્યોગોને વધારે પ્રોત્સાહન આપી શકાય તે માટે તેમને બહુ જ નજીવી કિંમત લઈને તેમના પ્રોડક્ટ્સને એક્ઝિબિટ કરવાની તક પૂરી પાડવામાં વી છે. રિન્યુએબલ એનર્જી અને ગ્રીન ટેક્નોલોજી પણ આ એક્સપોના કેન્દ્રમાં રહશે. સ્ટાર્ટઅપ્સ અને નવસંસ્કરણ-ઇન્નોવેશનને પ્રોત્સાહન આપવાની સાથે સાથે જ ટુરિઝમને વેગ આપવાના અને હોસ્પિટાલિટી ઉદ્યોગના ફલકને વિસ્તારવા માટેનું આયોજન કરવામાં આવ્યું હોવાનું સંદીપ એન્જિનિયરે જણાવ્યું હતું. મહિલા બિઝનેસ સાહસિકોની સાથે સાથે ઇલેક્ટ્રોનિક્સ અને સેમિકન્ડક્ટર્સ ઉદ્યોગના વિકાસ પર ફોકસ કરવામાં આવશે.

આ સમારોહનું વર્ચ્યુઅલ ઉદઘાટન કેન્દ્રિય ગૃહ અને સહકારિતા મંત્રી અમિત શાહ કરશે. તેમ જ ઉદઘાટના ગુજરાતના મુખ્યમંત્રી ભૂપેન્દ્ર પટેલ કરશે. ત્રણ દિવસના આ એક્સપોમાં હિન્દી ફિલ્મ અભિનેત્રી સોનાલી બેન્દ્રે અને અભિનેતા રાકેશ બેદી ઉપરાંત દેશના અગ્રણી ઉદ્યોગપતિઓ ઉપસ્થિત રહેશે. આ સમારોહમાં ઝાયડસ લાઈફ સાયન્સ લિમિટેડના ચેરમેન પંકજ પટેલ પણ ઉપસ્થિત રહેશે.

ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝ દ્વારા ગાંધીનગર હેલિપેડ એક્ઝિબિશન સેન્ટર પર 16મીથી 18મી એપ્રિલ દરમિયાન આ એક્સ્પો યોજવામાં આવશે. 2025માં યોજવામાં આવેલા ગેટ-1માં 16000 વિઝિટર્સે એક્સપોની મુલાકાત લીધી હતી. આ વખતે આ સંખ્યા 30,000ને વળોટી જાય તેવી ધારણા છે. અત્યાર સુધીમાં 24000થી વધુ બિઝનેસમેન્ટ અને ઉદ્યોગ સાહસિકોએ ગેટ-2ના એક્સપોની મુલાકાત લેવા માટે તેમના નામ રજિસ્ટર કરાવી દીધા છે.