નિફ્ટી 50 અને નિફ્ટી 500 માં ઘટાડે ખરીદી કરી શકાય
ઘટાડાની ઘટી રહેલી તાકાત પરથી મળી રહેલા સંકેતોઃ નાના નાના ઘટાડા આવે ત્યારે પણ બજારમાં લેણ કરી નફો કરી શકાય છે
મજબૂત દેશી સંસ્થાગત રોકાણ અને સતત લિક્વિડિટીના કારણે ઊંચા વેલ્યુએશન અને વિદેશી રોકાણકારોના આઉટફ્લો હોવા છતાં બજાર સ્થિર રહ્યું છે. આ પરિસ્થિતિમાં વારંવાર થતાં નાના ઘટાડામાં પણ ખરીદી કરવાનો વ્યૂહ લાભદાયક સાબિત થઈ શકે છે.
આમેય છેલ્લા કેટલાક વર્ષોમાં ભારતીય રોકાણકારો સતત ડિપ-બાયર્સ રહ્યા છે. બજારમાં થતો દરેક ઘટાડો નવી ખરીદી, સિસ્ટેમેટિક પ્લાનમાં ઇન્વેસ્ટમેન્ટ વધારવા અથવા રોકાયેલું નાણું રોકાણમાં મુકવાની તક તરીકે જોવામાં આવે છે.
પરંતુ એક મહત્વની વાત ડેટામાં છુપાયેલી છે. હાલના બુલ માર્કેટમાં મોટાભાગે નાના ઘટાડા જ જોવા મળ્યા છે, મોટા ઘટાડા ઓછા રહ્યા છે. જોકે મોટા ઘટાડામાં વધુ લાભ મળવાની સંભાવના હોય છે. 23 માર્ચ, 2020 થી શરૂ થયેલા આ બુલ રનમાં નિફ્ટી 50 એ ભારતીય બજારના ઈતિહાસમાં સૌથી મજબૂત વૃદ્ધિ દર્શાવી છે. તેની સાથે સાથે જ આ બુલરન રોકાણકારો માટે સહેલું પણ રહ્યું છે. તેમાં મોટા ઘટાડા ઓછા થયા છે. તેમ જ મોટા ડાઉનટ્રેન્ડ્સ મર્યાદિત રહ્યા છે.
સપ્ટેમ્બર 2024 ના પીક પછી થયેલા તાજેતરના ઘટાડાને અલગથી જોવામાં આવે તો તે ચિંતાજનક લાગી શકે છે. કેટલાક શેરોમાં મોટો ઘટાડો, વૈશ્વિક અનિશ્ચિતતા અને વિદેશી રોકાણ અંગેની ચિંતા યથાવત છે. પરંતુ અગાઉના ચક્રોની સરખામણીમાં, હાલના તબક્કામાં મોટા ઘટાડા ઓછા અને ઓછી વાર આવ્યા છે. ઘટાડા આવ્યા છે તે પણ મર્યાદિત રહ્યા છે. પરિણામે ઘટાડે ખરીદી કરી લેવાનો ટ્રેન્ડ લોકપ્રિય બની રહ્યો છે. આ સ્ટ્રેટેજી જ કદાચ વધુ આંકવામાં આવી રહી છે.
ઓછા ઊંડા ઘટાડા
ચાલુ બુલ માર્કેટ 2,229 દિવસથી વધુ દિવસો દરમિયાન 10થી વધુ ઘટાડા માત્ર 4 વખત થયા છે. 2003-08 દરમિયાન આવા 6 પ્રસંગો હતા, જ્યારે 2009-10 જેવી નાની સમય અવધિમાં પણ 10 વાર 10 ટકાથી વધારેનો ઘટાડો જોવા મળ્યો હતો. નિફ્ટી 500માં તો 10 ટકાથી વધુના ઘટાડાના માત્ર ત્રણવાર જ નોંધાયા છે. આ બાબત દર્શાવે છે કે લાંબા સમયગાળામાં મોટા ઝટકા ઓછા રહ્યા છે.
તેમ જ 5 ટકાથી વધુ ઘટાડા વચ્ચેનો સરેરાશ સમય પણ વધ્યો છે:
- 1998-2000: 80 દિવસ
- 2003-08: 107 દિવસ
- 2009-10: 121 દિવસ
- હાલ: 203 દિવસ
આથી સ્પષ્ટ થાય છે કે મહત્વપૂર્ણ ઘટાડા હવે પહેલા કરતાં ઘણી ઓછી વાર થાય છે. હાલના બુલ માર્કેટમાં સરેરાશ ઘટાડો લગભગ -4.6 ટકાનો છે. આ ઘટાડો 2003-08ના -7 ટકા કરતાં ઘણો ઓછો છે.
ઊંચા વેલ્યુએશન છતાં સ્થિરતા
નિફ્ટીનો સરેરાશ પીઈ-પ્રાઈસ અર્નિંગ રેશિયો હવે લગભગ 24 ગણો છે. પીક ટાઈમમાં આ રેશિયો 31 ગણો થયો છે. આ રેશિયો અગાઉની વધઘટના ચક્રોથી વધુ છે. સામાન્ય રીતે ઊંચા વેલ્યુએશન વધુ ઘટાડા લાવે એવું માનવામાં આવે છે, પરંતુ ડેટા વિપરીત બતાવે છે. 10 ટકાથી વધુ ઘટાડા વચ્ચેનો સમય હવે લગભગ 557 દિવસ થયો છે. જે અગાઉ કરતાં ઘણો વધુ છે. અગાઉ વિદેશી રોકાણકારો બજારને ચલાવતા હતા, જ્યારે હવે પરિસ્થિતિ બદલાઈ છે.
વિદેશી રોકાણકારોએ આશરે રૂ. 47,878 કરોડના નફો લઈ ગયા છે. તેમના કુલ રોકાણ સામે સ્થાનિક એટલે કે દેશી સંસ્થાગત રોકાણકારોએ રૂ.20 લાખ કરોડથી વધુ રોકાણ કર્યું છે. આ બાબત બજારને મજબૂત આધાર આપે છે.
બજાર અંગે અવલોકન
હાલના બુલ માર્કેટમાં એક સ્પષ્ટ ટ્રેન્ડ છે. નિફ્ટી 500 ના 339 શેર તેમના ટોચના સ્તરથી 20 ટકાથી વધુ નીચે છે અને તેમાંના 74 શેર 50 ટકાથી વધુ ઘટ્યા છે, છતાં ઇન્ડેક્સ લેવલે મોટા ઘટાડા ઓછા રહ્યા છે. તેથી જ દરેક ડીપ-ઘટાડે આક્રમક ખરીદી ટૂંકા ગાળામાં ફાયદાકારક બની શકે છે. પરંતુ જ્યાં મોટા ઘટાડા ઓછા હોય ત્યાં લાંબા ગાળાના રિટર્ન પર તેની અસર પડી શકે છે.
