અમેરિકા-ઇરાન યુદ્ધની આડઅસર હેઠળ કન્સ્ટ્રક્શન ઉદ્યોગ માટે જરૂરી કાચા માલના ભાવ વધી જતાં બાંધકામ ઉદ્યોગની કઠણાઈ વધી

અમેરિકા અને ઇરાન વચ્ચેનું યુદ્ધ ખેંચાઈ જાય તો રેરાને આપેલી ડેડલાઈન પ્રમાણે પ્રોજેક્ટ સમયસર પૂરા કરવા મુશ્કેલ, રેરા પ્રોજેક્ટ કમ્પિલેશનની ડેડલાઈન લંબાવી આપે

અમેરિકા અને ઇરાન વચ્ચેના યુદ્ધને પરિણામે સિમેન્ટ, સ્ટીલ,ટાઈલ્સ, ડીઝલ, ગેસ, લ્યુબ્રિકન્ટ્સ, સ્લાઈડિંગ વિન્ડો બનાવવામાં વપરાતા એલ્યુમિનિયમ, પેઈન્ટ્સ, પીવીસી પાઈપ્સ, વૉટર પ્રુફિંગ મટિરિયલ્સ, સિમેન્ટના બ્લોક્સ સહિતની બાંધકામમાં વપરાતી સામગ્રીના ભાવ વધી જતાં બાંધકામ ઉદ્યોગની કઠણાઈ વધી રહી છે. તેમના પ્રોજેક્ટ્સના ખર્ચમાં 10થી 20 ટકાનો વધારો થઈ ગયો છે. પરંતુ રેરાના નિયમોને કારણે તેઓ ભાવ વધારો કરી શકતા નથી. પીવીસી પાઈપ્સ, એલ્યુમિનિયમની પેનલ અને મોરબીની ટાઈલ્સનો સપ્લાય જ વચગાળામાં સાવ અટકી ગયો હતો. તેનાથી પ્રોજેક્ટમાં વિલંબ થઈ રહ્યો છે.

મોરબીનો ટાઈલ્સ ઉદ્યોગ ઠપ થઈ જતાં ટાઈલ્સનો સપ્લાય પણ અટકી ગયો હતો. તેમ જ તેનો સપ્લાય પણ વિલંબથી મળી રહ્યો છે. પરિણામે પ્રોજેક્ટના કામકાજ સમયસર પૂરા કરવામાં કઠણાઈ નડી રહી છે. યુદ્ધ લંબાઈ જાય તો રિયલ એસ્ટેટ રેગ્યુલેટરી ઓથોરિટીને આપેલી ખાતરી મુજબ પ્રોજેક્ટ પૂરા કરવા પણ મુશ્કેલ બની જશે. પરિણામે કોરોના કાળમાં કોઈના પણ અંકુશ બહારની સ્થિતિ નિર્માણ થઈ હતી તેવી જ સ્થિતિ અત્યારે નિર્માણ થઈ હોવાથી ફોર્સ મેજ્યોર હેઠળ ચાલુ પ્રોજેક્ટ્સને તેમની ડેડલાઈન લંબાવી આપવાની માગણી પણ કરવામાં આવી છે.

ક્રેડાઈ અમદાવાદ ગાહેડના સૂત્રોનું કહેવું છે કે પ્રોજેક્ટના કામકાજ ઠપ થયા હોવાથી મજૂર વર્ગ પણ તેમના વતન જવા નીકળી ગયો હોવાથી સપ્લાય સમયસર ચાલુ થયા પછીય કામકાજ સમયસર પૂરું કરવામાં તકલીફ પડી શકે છે. તેથી ચાલી રહેલા બાંધકામના દરેક પ્રોજેક્ટને ઓછામાં ઓછું છ માસનું એક્સટેન્શન આપવામાં આવે તેવી માગણી કરતો પત્ર પણ મુખ્યમંત્રી ભૂપેન્દ્ર પટેલને આપવામાં આવ્યો છે.

તેની સાથે જ બાંધકામના પ્રોજેક્ટ માટે જરૂરી કાચા માલનો કૃત્રિમ ભાવ વધારાને નિયંત્રિત કરીને તર્કસંગત બનાવવા માટે પણ યોગ્ય પગલાં સરકાર તરફથી લેવામાં આવે તેવી માગણી કરવામાં આવી છે. સિમેન્ટ, સ્ટીલ, ટાઈલ્સ, એલ્યુમિનિયમ પેનલ, પેઈન્ટ્સ, પીવીસી પાઈપ્સ, વૉટરપ્રુફિંગ મટિરિયલ, સિમેન્ટ બ્લોક્સ વાજબી ભાવથી પૂરતા પ્રમાણમાં મળી રહે તેવી વ્યવસ્થા નિર્માણ કરવાની માગણી પણ બાંધકામ ઉદ્યોગ દ્વારા કરવામાં આવી રહી છે.

કાચા માલના ભાવમાં થયેલો વધારો અને સપ્લાયમાં થતા વિલંબથી દંડ થવાની ધાસ્તી

બાંધકામનો સપ્લાયર્સને બલ્ક ઓર્ડર આપવામાં આવે તો ભાવ વધી જવાની દહેશતને કારણે સપ્લાયર્સ સપ્લાય આપવાના ભાવથી બંધાવા તૈયાર જ નથી. પહેલા બેચાર ટકાનો ભાવ વધારો આવતો હતો. હવે 10થી 15 ટકાનો ભાવ વધારો આવી જાય છે. બિલ્ડિંગ મટિરિયલ્સના સપ્લાયના ઓર્ડર સામાન્ય રીતે નવથી બાર મહિના સુધીના હોય છે. તેથી તેઓ સપ્લાયના નિશ્ચિત ભાવથી બંધાવા તૈયાર જ નથી. પરિણામે પ્રોજેક્ટ વિલંબમાં મૂકાય છે. પ્રોજેક્ટના વિલંબ માટે દંડ કરવામાં આવે છે. પ્રોજેક્ટમાં વિલંબ કરે તો એમસીએલઆર વત્તા પ્રવર્તમાન રેટ પ્રમાણે બિલ્ડરને પેનલ્ટી કરવામાં આવે છે.

• ટીએમટી બારના ટનદીઠ ભાવમાં 5 ટકાનો એટલે કે રૂ. 2900નો વધારો થયો છે.
• સિમેન્ટની 50 કિલોની થેલીના ભાવમાં 11.86 ટકાનો એટલે કે રૂ. 35નો વધારો થયો છે.
• એએસી બ્લોકના ક્યુબિક મીટરદીઠ ભાવમાં 8.33 ટકા એટલે કે રૂ. 280નો વધારો થયો છે.
• એલ્યુમિનિયમ વિન્ડોની પેનલના ભાવમાં કિલોએ રૂ. 59નો એટલે કે 13.17 ટકાનો વધારો થયો છે.
• એલ્યુમિનિયમની પાઈપના કિલોદીઠ ભાવમાં રૂ. 137 એટલે કે 44.34 ટકાનો વધારો થયો છે.
• એમ.એસ. પાઈપના ભાવમાં 6.64 ટકાનો એટલે કે રૂ. 4નો વધારો થયો છે.
• જીઆઈપાઈપ્સના કિલોદીઠ ભાવમાં રૂ. 17નો એટલે કે 21.79 ટકાનો વધારો થયો છે.
• સ્ટેઈનલેસ સ્ટીલના મટિરિયલના કિલોદીઠ ભાવમાં રૂ. 59નો એટલ કે 14.71 ટકાનો વધારો થયો છે.
• ગ્લાસના ચોરસમીટરદીઠ ભાવમાં રૂ.8થી 12નો વધાર થયો છે. તેમાં સરેરાશ 7.40 ટકાનો વધારો થયો છે.
• ટાઈલ્સના ચોરસફૂટ દીઠ ભાવમાં રૂ.10નો એટલે કે 22.73 ટકાનો વધારો થયો છે.
• પ્લમ્બિંગ પાઈપ્સના ભાવમાં કિલોદીઠ રૂ. 208નો એટલે કે 38.36 ટકાનો વધારો થયો છે.
• 5 ટનના એરકન્ડિશનરના એક યુનિટના ભાવમાં રૂ.3000નો એટલે કે 8.57 ટકાનો વધારો થયો છે.