સોના-ચાંદીના ફ્યુચર્સમાં ફરી તેજી આવી શકે
કિંમતી ધાતુઓના બજારમાં મજબૂત સપોર્ટ લેવલ તેજીવાળાઓને મદદરૂપ બની શકે
ગત સપ્તાહ દરમિયાન આંતરરાષ્ટ્રીય બજારમાં સોનાના ભાવ $4,540 પ્રતિ ઔંસ રહ્યા હતા. તેમાં 0.7 ટકાનો વધારો નોંધાયો હતો, જ્યારે ચાંદીના ભાવ $75.3 પ્રતિ ઔંસ રહ્યા હતા. ચાંદી 0.3 ટકા ઘટી હતી. ભારતીય કોમોડિટી બજારમાં સ્થિતિ થોડી નબળી રહી હતી. એમસીએક્સ પર ઓગસ્ટ ડિલિવરીનું સોનું રૂ. 1,60,911 પ્રતિ 10 ગ્રામ બોલાયુ હતું. તેમાં 0.3 ટકાનો ઘટાડો જોવા મળ્યો હતો. જુલાઈ ડિલિવરીની ચાંદી રૂ. 2,66,998 પ્રતિ કિલોગ્રામ રહી હતી. તેમા 1.8 ટકાનો ઘટાડો જોવા મળ્યો હતો.
એમસીએક્સ સોનું રૂ.1,60,911 પ્રતિ 10 ગ્રામ
ઓગસ્ટ ફ્યુચર્સનું સોનું 13 મેના રોજ રૂ. 1,68,101ની સર્વોચ્ચ સપાટીએ પહોંચ્યા બાદ સતત ધીમે ધીમે ઘટતું રહ્યું છે. જોકે ગયા સપ્તાહના અંત તરફ સોનામાં સુધારો જોવા મળ્યો હતો. તેનું મુખ્ય કારણ ₹1,59,700ની આસપાસ આવેલી 21-દિવસની મૂવિંગ એવરેજનો મજબૂત સપોર્ટ જોવા મળી રહ્યો છે.
આ ઉપરાંત રૂ. 1,57,500ની સપાટીએ પણ મહત્વપૂર્ણ સપોર્ટ ઉપલબ્ધ છે. આ સપોર્ટ લેવલોના આધારે સોનાના ફ્યુચર્સમાં નજીકના ગાળામાં ફરી તેજી આવવાની સંભાવના છે અને ભાવ રૂ. 1,66,000 સુધી પહોંચી શકે છે. પરંતુ જો રૂ. 1,57,500નો સપોર્ટ તૂટી જાય તો ઘટાડો વધીને રૂ. 1,52,000 સુધી જઈ શકે છે.
ટ્રેડિંગ વ્યૂહરચના – સોનું
સોનામાં રૂ.1,59,500ની સપાટીએ લેવાલી કરી શકાય છે. રૂ. 1,54,800નો સ્ટોપ લોસ રાખીને હોલ્ડિંગ જાળવી રાખી શકાય છે. જ્યારે ભાવ રૂ.1,63,000 પહોંચે ત્યારે સ્ટોપ લોસ વધારીને રૂ. 1,61,000 કરવો જરૂરી છે. તેમ જ રૂ. 1,66,000ની ભાવ સપાટીએ સોનું પહોંચે ત્યારે નફો બુક કરી લેવાનો રહેશે.
MCX ચાંદી કિલોદીઠ રૂ. 2,66,998
જુલાઈ ફ્યુચર્સની ચાંદી છેલ્લા કેટલાક સપ્તાહોથી મુખ્યત્વે રૂ. 2,65,000 અને રૂ.2,78,000 વચ્ચે ફરતી જોવા મળી રહી છે. 28 મેના રોજ થોડા સમય માટે ભાવ રૂ. 2,61,000 સુધી ઘટ્યા હતા, પરંતુ ત્યારબાદ ફરી સુધારો જોવા મળ્યો હતો. ચાંદી માટે મુખ્ય સપોર્ટ લેવલ રૂ. 2,61,000 અને રૂ. 2,54,600 છે. રૂ. 2,54,600નું સ્તર ખાસ મહત્વનું છે કારણ કે ત્યાં 50-દિવસની મૂવિંગ એવરેજ અને લાંબા ગાળાની ટ્રેન્ડલાઇન એક સાથે આવી રહી છે. તેથી આ સપાટી મજબૂત આધાર તરીકે કામ કરી શકે છે.
ચાંદીમાં તેજીની શક્યતા
સોના-ચાંદી બજારના વિશ્લેષકોના મત મુજબ ચાંદી વર્તમાન સ્તરેથી અથવા રૂ. 2,54,600 સુધીના ઘટાડા પછી ફરી ઉછાળો લઈ શકે છે. ફરી એકવાર તેજીનો ટ્રેન્ડ શરૂ થાય તો ભાવ રૂ. 2,85,000 પ્રતિ કિલોગ્રામ સુધી પહોંચી શકે છે. પરંતુ જો રૂ. 2,54,600ની સપાટી તૂટી જાય તો દૃષ્ટિકોણ મંદી તરફ વળી શકે છે અને ભાવ રૂ. 2,38,000 સુધી ઘટી શકે છે.
ચાંદીમાં ટ્રેડિંગનો વ્યૂહ
ચાંદીમાં રૂ. 2,61,000ની સપાટીએ લેણ કરી શકાય છે. તેમાં પ્રારંભિક સ્ટોપ લોસ રૂ. 2,52,000નો રાખી શકે છે. ચાંદીનો ભાવ રૂ.2,78,000 પહોંચે ત્યારે સ્ટોપ લોસ વધારીને રૂ. 2,69,000 કરવો જોઈએ. ત્યારબાદ ચાંદીનો કિલોદીઠ ભાવ રૂ. 2,85,000ની ઉપર પહોંચે તેવો નફો બુક કરી લેવાનો રહેશે.
સોના અને ચાંદી બંનેના ફ્યુચર્સ હાલમાં મહત્વપૂર્ણ ટેકનિકલ સપોર્ટ લેવલની નજીક છે. સોનું અત્યારે રૂ. 1,59,700 અને રૂ. 1,57,500ની સપાટેટેકો ધરાવે છે. સોનું વધીને રૂ. 1,66,000 સુધી જઈ શકે છે. તેમ જ સોનું રૂ. 1,57,500 નીચે તૂટે તો ઘટીને રૂ. 1,52,000 સુધી આવી શકે છે.
ચાંદી રૂ. 2,61,000 અને રૂ. 2,54,600ની સપાટીએ ટેકો ધરાવે છે. ચાંદીનો ભાવ સુધરીને રૂ.2,85,000 સુધી જઈ શક છે. તેમ જ ચાંદી રૂ. 2,54,600 નીચે તૂટે તો ઘટીને રૂ. 2,38,000 સુધી આવી શકે છે. ટેકનિકલ ચાર્ટ મુજબ બંને કિંમતી ધાતુઓમાં હાલ રિબાઉન્ડ (પુનઃ તેજી)ની સંભાવના વધુ દેખાઈ રહી છે, જોકે સપોર્ટ લેવલ જળવાઈ રહે તે મહત્વપૂર્ણ રહેશે.
