હાઈકોર્ટનો આદેશ ‘૬ વર્ષમાં સ્ટેમ્પ ડ્યૂટી ન વસૂલાય તો ભૂલી જાવ’, છતાં GIDCના ઉદ્યોગકારોને ૩૦ વર્ષ જૂની નોટિસો ફટકારી કનડગત!

પ્લોટના પાંચ હાથબદલા થયા હોય તો પાંચેયની વ્યાજ-પેનલ્ટી છેલ્લા માલિક પાસેથી વસૂલવાનું વિચિત્ર તગાદું: ઉદ્યોગો મુશ્કેલીમાં

ગુજરાત હાઈકોર્ટનો સ્પષ્ટ ચૂકાદો છે કે જો સરકાર છ વર્ષ સુધી સ્ટેમ્પ ડ્યૂટી ન વસૂલે તો તે લેણું ભૂલી જવાનું હોય છે. આમ છતાં, ગુજરાતની જુદી જુદી જીઆઈડીસી (GIDC)માં ૨૫થી ૩૦ વર્ષ પહેલાં પ્લોટ ખરીદનારા ઉદ્યોગકારોને અત્યારે સ્ટેમ્પ ડ્યૂટીની નોટિસો ફટકારીને વ્યાજ અને પેનલ્ટી સહિત કરોડો રૂપિયાની ઉઘરાણી શરૂ કરાતા ભારે હોબાળો મચી ગયો છે. સરકારી બાબુઓની આ જોહુકમીને કારણે નાના અને મધ્યમ કક્ષાના ઉદ્યોગો (MSMEs) બંધ થવાની આરે આવી ગયા છે.

એક કરોડની લોન સામે બે કરોડની પેનલ્ટી: વિચિત્ર સરકારી ગણિત!

સૌથી વધુ આઘાતજનક અને અન્યાયી બાબત એ છે કે, જે પ્લોટના વિતેલા વર્ષોમાં ચારથી પાંચ વખત હાથબદલા (માલિકી ફેરફાર) થઈ ચૂક્યા છે, તેમાં અગાઉના તમામ માલિકો વતીથી સ્ટેમ્પ ડ્યૂટી, વ્યાજ અને પેનલ્ટીની સંયુક્ત રકમ અત્યારના છેલ્લા પ્લોટ ધારક પાસેથી માગવામાં આવી રહી છે!

કરોડો રૂપિયાની અવાસ્તવિક ડિમાન્ડ: માત્ર ૧૦૦૦ ચોરસ વારના નાના પ્લોટ માટે પણ આજની તારીખે તંત્ર દ્વારા દંડ અને વ્યાજ મળીને રૂા. ૨ થી ૩ કરોડની ડિમાન્ડ કાઢવામાં આવી રહી છે. પરિણામે, ધંધાના વિસ્તરણ માટે રૂા. ૧ કરોડની બેંક લોન લેવા ઈચ્છતા ઉદ્યોગપતિએ લોનની રકમ કરતાં બમણો એટલે કે રૂા. ૨ કરોડથી વધુનો દંડ ભરવાની નોબત આવી પડી છે!

બેંક લોન માટે ‘ફોર્મ ટુ-આર’ માગતા જ ફાઈલો અટકાવી દેવાય છે

જીઆઈડીસીમાં પ્લોટ ધરાવતા ઉદ્યોગકારોને જ્યારે બિઝનેસ વધારવા માટે લોનની જરૂર પડે, ત્યારે તેમણે જમીન મોર્ટગેજ (ગીરો) રાખવા માટે GIDC પાસેથી ‘ફોર્મ ટુ-આર’ (Form 2-R) મેળવવું પડે છે. પ્લોટ માલિકો જ્યારે આ ફોર્મ લેવા જાય છે, ત્યારે અધિકારીઓ ત્રણ દાયકા જૂની સ્ટેમ્પ ડ્યૂટી બાકી હોવાનું કહીને ફાઈલો દબાવી દે છે.

વાસ્તવમાં ૩૦ વર્ષ પહેલાં જ્યારે પ્લોટની ખરીદી થઈ ત્યારે સરકાર તરફથી આવા કોઈ લેણાં કાઢવામાં આવ્યા નહોતા. હવે અચાનક ઉદ્યોગકારોની મજબૂરીનો ફાયદો ઉઠાવીને બ્લેકમેઇલિંગ જેવી વસૂલાત શરૂ કરાતા ઉદ્યોગ જગતમાં તીવ્ર આક્રોશ છે.

‘ઇઝ ઓફ ડૂઇંગ બિઝનેસ’ માત્ર કાગળ પર?

એક તરફ રાજ્ય અને કેન્દ્ર સરકાર ‘ઇઝ ઓફ ડૂઇંગ બિઝનેસ’ (વેપારની સરળતા)ની મોટી-મોટી વાતો કરી રહી છે, તો બીજી તરફ જૂના પુરાણા લેણાંના નામે ઉદ્યોગોનું ગળું ટૂંપવામાં આવી રહ્યું છે. ડિપાર્ટમેન્ટના અધિકારીઓ પ્લોટના દરેક પાછલા ટ્રાન્સફરને ગણીને વર્તમાન માલિક પર કાયદાકીય જવાબદારી થોપી રહ્યા છે. આ નીતિને કારણે નવી રોજગારી ઊભી કરનારા ઉદ્યોગો માટે પોતાનું અસ્તિત્વ ટકાવવું પણ કઠિન બન્યું છે.

રજૂઆતો બહેરા કાને અથડાઈ, વેપારીઓ લાચાર

આ ગંભીર અન્યાય અંગે ઉદ્યોગ મંડળો દ્વારા સરકારમાં વારંવાર લેખિત અને મૌખિક રજૂઆતો કરવામાં આવી છે, પરંતુ હજી સુધી બહેરા કાને અથડાઈ હોય તેમ કોઈ નક્કર પરિણામ આવ્યું નથી. સરકારી અધિકારીઓ વેપાર-ઉદ્યોગની તકલીફોને સમજવા કે કોઈ બાંયધરી આપવા પણ તૈયાર નથી. મહિનાઓ સુધી ફાઈલો ક્લિયર ન થવાને કારણે બેંકો પાસેથી ધિરાણ લઈને ઉદ્યોગ ક્ષેત્રે નવું રોકાણ કરવાના આયોજનો સંપૂર્ણપણે ટલ્લે પણ ચઢી ગયા છે.