અમ્યુકોની ગટરમાં ટ્રીટ કર્યા વિના પ્રદૂષિત પાણી ઠાલવતા એકમોને ક્લોઝર નોટિસ

અમ્યુકોની ગટરમાં ટ્રીટ કર્યા વિના પ્રદૂષિત પાણી ઠાલવતા એકમોને ક્લોઝર નોટિસ

જિન્સ વૉશિંગ અને ડ્રાયિંગની પ્રવૃત્તિ સાથે સંકળાયેલા તમામ એકમોને તત્કાળ બંધ કરી દેવાની નોટિસ આપી

બહેરામપુરાના એકમો સામે ગુજરાત પ્રદુષણ બોર્ડે પગલાં લીધાઃ ક્લોઝર નોટિસ  આપ્યા પછી વીજ જોડાણ કપાઈ ગયું હોવા છતાં ગેરકાયદે વીજજોડાણ કરીને ફેક્ટરીઓ ચલાવવામાં આવી રહી હોવા છતાં જીપીસીબીની પ્રાદેશિક કચેરીનું રહસ્યમય મૌન

અમદાવાદઃ અમદાવાદ શહેરના બહેરામપુરા વિસ્તારમાં ગુજરાત પ્રદુષણ બોર્ડે જિન્સના વૉશિંગનું કામ કરીને પ્રદૂષિત પાણી ટ્રીટ કર્યા વિના જ અમ્યુકોની ગટરમાં  ઠાલવી રહેલા અમિક્રિયેશન, શિલ્પ ક્રિયેશન, એમ.એસ. ક્રિયેશન અને અન્ની ક્રિયેશનને ક્લોઝર નોટિસ આપી છે. આ તમામ એકમો જિન્સના વૉૅશિંગ અને ડ્રાયિંગની પ્રવૃત્તિ કરી રહ્યા છે. આ પ્રક્રિયા દરમિયાન પેદા થતું પ્રદૂષિત પાણી સીધુ અમ્યુકોની ગટરમાં કોઈપણ જાતની ટ્રીટમેન્ટ કર્યા વિના જ ઠાલવી દેવામાં આવતું હોવાથી ક્લોઝરની નોટિસ આપવામાં આવી છે.

વૉટર પ્રીવેન્શન એન્ડ કંટ્રોલ ઓફ પોલ્યુશન એક્ટ ૧૯૭૪ની કલમ ૩૩ હેઠળ તમામ એકમોને ક્લોઝર નોટિસ આપવામાં આવી છે. જો કે અમ્યુકોનું ઇજનેર ખાતું પણ આ ફેક્ટરી માલિકો સાથે ભળેલું હોવાથી તેઓ તેમના દ્વારા છોડવામાં આવી રહેલા દૂષિત પાણીને મુદ્દે આઁખ આડા કાન કરતાં હોવાનું બહાર આવી રહ્યું છે. તેમાંય આઘાત પમાડે તેવી બાબત તો એ છે કે આ એકમોને ક્લોઝર નોટિસ આપીને તેમના વીજ જોડાણો કાપી દેવામાં આવ્યા હોવા છતાંય તેમણે ગેરકાયદે વીજ જોડાણ કરી દઈને બહુ ધ્યાનમાં ન આવે તે રીતે ફેક્ટરીમાં કામકાજ ચાલુ કરી દીધી હોવાનું પણ જાણવા મળી રહ્યું છે. તેમને આ કામમાં જીપીસીબીની પ્રાદેશિક કચેરીના અધિકારીઓ સપોર્ટ કરી રહ્યા હોવાનું ચર્ચાએ જોર પકડયું છે.

બીજું, રિજ્યોનલ ઓફિસના અધિકારીઓ ઇન્સ્પેક્શન કરવા માટે નીકળે કે તરત જ તેમના ડ્રાઈવર કંપનીના માલિકોને જાણ કરી દેતા હોવાથી તેઓ પહોંચે ત્યારે એકમો બંધ હાલતમાં જ હોવાનું જોવા મળે છે. ફેક્ટરી માલિકો જીપીસીબીના અધિકારીઓના ડ્રાઈવરને ફોડી રાખે છે. આ સંજોગોમાં વિજિલન્સ ડિપાર્ટમેન્ટને સાથે રાખીને સરપ્રાઈઝ ચેકિંગ કરાવવું જરુરી છે. તેમ થાય તો જ ક્લોઝર પછીય એકમો ચાલતા હોવાનું જોવા મળી શકશે.

જીપીસીબીના સૂત્રોનું કહેવું છે કે આ મહિનામાં કુલ મળીને ૧૬ જેટલા એકમોને ક્લોઝર નોટિસ આપવામાં આવી છે. નારોલમાં પણ ેડનિમના વૉશિંગના કામ કરતાં એકમો બેફામ પ્રદૂષિત પાણી છોડી રહ્યા હોવાનું જાણવા મળી રહ્યું છે. ક્લોઝરની નોટિસ મેળવનારા અન્ય એકમોમાં મેસર્સ ધ્વનિ ઇન્ડસ્ટ્રીઝ પ્રાઈવેટ લિમિટેડ, હાજી મોહમ્મદ ધનેરાવાલા, મેસર્સ હજજા ડાઇંગ એન્ડ પ્રિન્ટિંગનો પણ સમાવેશ થાય છે.   

• આશ્મા બ્લોક પ્રિન્ટિંગ (Aashma Block Printing)

• એમ. એસ. ક્રિએશન (M.S. Creation)

• અમી ક્રિએશન (Ami Creation)

• અમરજ્યોત પ્રિન્ટર્સ (Amarjyot Printers)

• અજિતનું યુનિટ (પઠાણ શાહિમખાન ફિરોઝખાન) [Unit of Ajit (Pathan Shahimkhan Firozkhan)]

• પઠાણ ઝારાગુનશાહ વજીરશાહનું યુનિટ (Unit of Pathan Zaragunshah Vajirsha)

• અરોમા વોશ (Aroma Wash)

• પઠાણ શાહજેબખાન ફિરોઝખાનનું યુનિટ (Unit of Pathan Shahjebkhan Firozkhan)

• શેખ અબ્દુલ્લા ઈસ્માઈલીભાઈનું યુનિટ (Unit of Sheikh Abdulla Isamailibhai)

• પઠાણ શાહિમખાન ફોરજખાનનું યુનિટ (Unit of Pathan Shahimkhan Forjkhan)

• બારામણી અકબરભાઈ ગનીવાલાનું યુનિટ (Unit of Baramani Akbarbhai Ganiwala)

• અમાન પાર્ક ખાતે ગેરકાયદે કાપડ પ્રોસેસિંગ યુનિટ (Illegal cloth processing unit at Aman Park)

• અલ આશિયાના પાર્ક ખાતે ગેરકાયદે કાપડ પ્રોસેસિંગ યુનિટ (Illegal Cloth processing unit at Al Aashiyanapark)

• અની ક્રિએશન (Ani Creartion)

• જીરાવાલા કેમિકલ ઈન્ડસ્ટ્રી (Jirawala Chemical Industry)

• આર. વી. વોશ (R.V. Wash)