ડીજિટલ અરેસ્ટ કેસોમાં CBIના 20 રાજ્યોમાં 89 સ્થળોએ દરોડા, 3 ની ધરપકડ
ડીજિટલ અરેસ્ટ કેસોમાં CBIના 20 રાજ્યોમાં 89 સ્થળોએ દરોડા, 3 ની ધરપકડ
ગુજરાતના એક કેસમાં ઠગોએ પોલીસ અધિકારીઓ તરીકે ઓળખ આપીને પીડિતને ત્રણ મહિના સુધી ડિજિટલ અરેસ્ટ કર્યા અને રૂ. 19.24 કરોડની છેતરપિંડી કરી
સેન્ટ્રલ બ્યુરો ઓફ ઇન્વેસ્ટિગેશને આજે ‘ઓપરેશન ચક્ર-VI’ શરૂ કરીને ડિજિટલ અરેસ્ટ ત્રણ કેસોમાં 20 રાજ્યોમાં 89 સ્થળોએ દરોડા પાડીને ત્રણ આરોપીઓની ધરપકડ કરી છે. સીબીઆઈના સૂત્રોનું કહેવું છે કે તેમના ઓપરેશન ચક્ર-સિક્સનો મૂળભૂત હેતુ રૂ. 42.36 કરોડની ઠગાઈ પાછળના નાણાકીય વ્યવહારો (મની ટ્રેઇલ) અને વ્યાપક સિન્ડિકેટ્સને નિશાન બનાવવાનો છે. સીબીઆઈએ પીડિતો પાસેથી છેતરપિંડી કરાયેલા નાણાં મેળવવા, તેને લેયરિંગ કરવા એટલે કે છાવરવાના કામ કરવા સાથે સંકળાયેલા અને વહેંચણી કરવામાં સંડોવાયેલા ત્રણ લોકોની ધરપકડ પણ કરી છે.
સીબીઆઈએ જણાવ્યું કે ભારતની સુપ્રીમ કોર્ટે તેને આવા ગુનાઓમાં સામેલ લોકો અને તેને સુવિધા આપતા વ્યાપક નેટવર્ક સામે સંગઠિત કાર્યવાહી કરવા નિર્દેશ આપ્યો છે. આ ગુનેગારોએ મળીને ડિજિટલ એરેસ્ટના ત્રણ જુદાં જુદાં કેસોમાં મળીને રૂ. 42.36 કરોડની છેતરપિંડી કરી છે. સીબીઆઈએ વિવિધ રાજ્યોમાંથી ડિજિટલ અરેસ્ટ સંબંધિત કેટલાક કેસો પોતાના હાથમાં લીધા છે. તાજેતરના ઓપરેશનમાં આવરી લેવાયેલા ત્રણ કેસોમાં, પીડિતોને એકથી ત્રણ મહિના સુધી ડિજિટલ અરેસ્ટ હેઠળ રાખવામાં આવ્યા હતા અને કુલ રૂ. 42.36 કરોડની છેતરપિંડી કરવામાં આવી હતી.
તેમાંથી એક કેસ બિટ્સ પીલાનીનો છે, જ્યાં પોલીસ અધિકારીઓનો સ્વાંગ રચીને ઠગો દ્વારા એક પીડિતને ત્રણ મહિના સુધી ડિજિટલ અરેસ્ટ હેઠળ રાખી રૂ. 7.67 કરોડની છેતરપિંડી કરવામાં આવી હતી. ગુજરાતના અન્ય એક કેસમાં ઠગોએ પોલીસ અધિકારીઓ તરીકે ઓળખ આપીને પીડિતને ત્રણ મહિના સુધી ડિજિટલ અરેસ્ટ કર્યા અને રૂ. 19.24 કરોડની છેતરપિંડી કરી હતી. તેમ જ ત્રીજો કેસ કર્ણાટકનો છે, જ્યાં પીડિતને એક મહિના સુધી ડિજિટલ અરેસ્ટ હેઠળ રાખી રૂ. 15.45 કરોડની છેતરપિંડી કરવામાં આવી હતી.
ભારતના રાજ્યોમાં તપાસચાલુ કરી
સીબીઆઈએ તપાસના ભાગરૂપે 20 રાજ્યોમાં ફેલાયેલા 89 સ્થળોએ એકસાથે તલાશી લીધી હતી. તલાશીનો હેતુ છેતરપિંડીના નાણાંના પ્રવાહને ટ્રેસ કરવાનો, સિન્ડિકેટના લાભાર્થીઓ અને સંચાલકોની ઓળખ કરવાનો અને પુરાવા નષ્ટ થાય તે પહેલાં તેને સુરક્ષિત કરવાનો હતો. એજન્સીએ જણાવ્યું હતું કે આ ઓપરેશન બેંક ખાતાઓ અને ઓનલાઈન એકાઉન્ટ એક્સેસ ડેટાની તપાસ સહિત વિગતવાર નાણાકીય અને તકનીકી વિશ્લેષણ પર આધારિત હતું. તલાશી દરમિયાન, સીબીઆઈની ટીમોએ બેંકિંગ દસ્તાવેજો, ખાતા સબંધી રેકોર્ડ્સ, ડિજિટલ ઉપકરણો અને અન્ય મહત્વપૂર્ણ પુરાવા જપ્ત કર્યા હતા. રાજ્યની સરહદો પાર ઓપરેટ થતા ડિજિટલ અરેસ્ટ નેટવર્કને કથિત રીતે ટેકો આપતા વ્યાપક નાણાકીય અને તકનીકી માળખાને સ્થાપિત કરવા માટે જપ્ત કરાયેલ સામગ્રીની ફોરેન્સિક તપાસ કરવામાં આવી રહી છે.
ઠગાઈના નાણાં સંભાળવા બદલ ત્રણની ધરપકડ
ઓપરેશન દરમિયાન સીબીઆઈએ ત્રણ આરોપીઓની ધરપકડ કરી હતી. તેમની પૂછપરછમાં છેતરપિંડીની રકમ મેળવવામાં, લેયરિંગ કરવામાં એટલે કે છાવરવામાં અને નાણાંની વહેંચવામાં તેમની ચોક્કસ ભૂમિકા બહાર આવી હોવાનું કહેવાય છે. હરિયાણાના નિવાસી આકાશના બેંક ખાતામાં છેતરપિંડીના રૂ. 1.95 કરોડ જમા થયા હોવાનું બહાર આવ્યું હતું. સીબીઆઈએ જણાવ્યું કે તેણે પોતે ખાતું ખોલાવ્યું હતું અને તે જ દિવસે નાણાં અન્ય ખાતાઓમાં ટ્રાન્સફર કર્યા હતા, જે મની લોન્ડરિંગમાં તેની સીધી અને સભાન ભૂમિકા દર્શાવે છે.
કોલકાતાના રાજા કર્મકારના પેઢીના ખાતામાં છેતરપિંડીની રકમના રૂ. 1.5 કરોડ જમા થયા હોવાનું બહાર આવ્યું હતું. ત્રીજી આરોપી, જ્યોતિ રાણીના ખાતામાં છેતરપિંડીની રકમનો એક ભાગ જમા થયો હતો. સીબીઆઈના જણાવ્યા અનુસાર તેણે રકમનો એક ભાગ રોકડમાં ઉપાડી લીધો હતો અને બાકીની રકમ અન્ય ખાતાઓમાં ટ્રાન્સફર કરી હતી, આમ નાણાંના સ્ત્રોતને છુપાવવા માટે તેને જુદાં જુદાં ખાતાઓમાં વિભાજિત કરી દેવામાં ભાગ લીધો હતો. વ્યાપક નેટવર્ક સાથે જોડાયેલા અન્ય કથિત આરોપીઓને ઓળખવા અને ઝડપી પાડવા એજન્સી પ્રયાસો ચાલુ રાખી રહી છે.
સીબીઆઈએ જણાવ્યું કે તે સુપ્રીમ કોર્ટના નિર્દેશો અનુસાર ડિજિટલ અરેસ્ટ ગુનાઓ અને સંગઠિત સાયબર ક્રાઈમ નેટવર્ક સામે નિર્ણાયક કાર્યવાહી કરવા માટે વચનબદ્ધ છે. એજન્સીએ ઉમેર્યું કે તમામ ત્રણ કેસોની તપાસ ચાલુ છે, અને જપ્ત કરાયેલા બેંકિંગ અને ડિજિટલ પુરાવાની વધુ તપાસથી છેતરપિંડી પાછળના વ્યાપક નેટવર્કને પકડવામાં મદદ મળવાની પણ આશા છે.
Tags: 20 states raid 20 રાજ્યોમાં તપાસ 89 locations CBI 89 સ્થળોએ દરોડા Bank fraud India BITS Pilani cyber fraud BITS પીલાની સાયબર કેસ CBI cyber crackdown CBI news update CBI raids CBI કાર્યવાહી CBI દરોડા CBI સમાચાર Cyber crime Gujarat Cyber crime news Cyber criminals arrest cyber fraud india Cyber fraud Kolkata Cyber Safety Cyber Scam Alert Cyber scam Haryana Digital arrest Digital Arrest Scam Digital arrest syndicate Digital detention scam Financial fraud investigation Gujarat digital arrest Karnataka fraud case money laundering Money trailing Online money scam Operation Chakra-VI Supreme Court cyber ruling ઓનલાઈન ઠગાઈ ઓપરેશન ચક્ર 6 ઓપરેશન ચક્ર-VI કર્ણાટક છેતરપિંડી કેસ ગુજરાત ડિજિટલ અરેસ્ટ ડિજિટલ અટકાયત ડિજિટલ અરેસ્ટ ડિજિટલ અરેસ્ટ નેટવર્ક ડિજિટલ અરેસ્ટ સ્કેમ નાણાકીય છેતરપિંડી બેંક ફ્રોડ ભારત મની લોન્ડરિંગ સાયબર ક્રાઈમ ગુજરાત સાયબર ક્રાઈમ સમાચાર સાયબર ગુનેગારોની ધરપકડ સાયબર ઠગાઈ હરિયાણા સાયબર ફ્રોડ કોલકાતા સાયબર ફ્રોડ ભારત સાયબર સુરક્ષા સાયબર સ્કેમ એલર્ટ સુપ્રીમ કોર્ટ નિર્દેશ
