અમૂલ બ્રાન્ડનું ટર્નઓવર 11 ટકા વધી 2025-26ને અંતે રૂ. 1 લાખ કરોડ થયું
રાષ્ટ્રીય સ્તરે અમૂલના મોડલને વિસ્તૃત કરીને અમે સાબિત કરી રહ્યા છીએ કે ‘અમૂલ મોડલ’ આર્થિક લોકશાહી માટે એક શાશ્વત માર્ગદર્શિકા સમાન છે.
આધુનિક ગ્રાહકોની બદલાઈ રહેલી ડિમાન્ડને કેન્દ્રમાં રાખીને અમૂલ આગળ વધી રહી હોવાથી તેના ટર્નઓવરમાં વધારો આવી રહ્યો છે
ગુજરાત કોઓપરેટીવ મિલ્ક માર્કેટિંગ ફેડરેશન લિમિટેડ-જીસીએમએમએફની દેખરેખ હેઠળ ચાલતી અમૂલની કંપનીઓએ 2025-26ના અંતે રૂ. 1 લાખ કરોડને વળોટી ગયું છે. ડેરી ક્ષેત્રની અગ્રણી કંપની અમૂલ પાંચમી એપ્રિલ 2026ના જાહેર કર્યું છે કે ગયા નાણાકીય વર્ષ દરમિયાન તેના કુલ ટર્નઓવરમાં 11 ટકા વધારો નોંધાયો છે. તેમ જ ડેરી ઉત્પાદનોની સતત વધી રહેલી ડિમાન્ડને કારણે તેમનું ટર્નઓવર રૂ. 1 લાખ કરોડના માઇલસ્ટોનને પાર કરી ગયું છે.
અમૂલ બ્રાન્ડનું કુલ ટર્નઓવર નાણાકીય વર્ષ 2025-26 દરમિયાન રૂ. 1 લાખ કરોડથી વધુ રહ્યું છે. અમૂલ બ્રાન્ડની કુલ આવક 2024-25ના નાણાંકીય વર્ષમાં રૂ. 90,000 કરોડની હતી. તેમાં 2025-26ના વર્ષમાં 11 ટકાનો વધારો થયો છે. અમૂલ બ્રાન્ડ હેઠળ પ્રોડક્ટ્નું વેચાણ ગુજરાત કોઓપરેટીવ મિલ્ક માર્કેટિંગ ફેડરેશન લિમિટેડનું કરે છે. અમૂલની બ્રાન્ડમાં 1200થી વધુ પ્રોડક્ટનો પોર્ટફોલિયો છે. તેમ જ વિતરણ માટેનું વ્યાપક નેટવર્ક ધરાવે છે. આધુનિક ગ્રાહકોની બદલાઈ રહેલી ડિમાન્ડને કેન્દ્રમાં રાખીને અમૂલ આગળ વધી રહી હોવાથી તેના ટર્નઓવરમાં વધારો આવી રહ્યો હોવાનું જીસીએમએમએફના સૂત્રોનું કહેવું છે. આમ તો 18 જિલ્લા સહકારી સંસ્થાઓ તેમના પોતાના જિલ્લામાં અમૂલની બ્રાન્ડ હેઠળ ઉત્પાદનો વેચે છે તેનો જીસીએમએમની આવકમાં સમાવેશ કરવામાં આવ્યો નથી.
જીસીએમએમએફના ચેરમેન અશોક ચૌધરીનું કહેવું છે કે રૂ. 1 લાખ કરોડના બ્રાન્ડ ટર્નઓવરનો આંક પાર કરવો લાખો ગ્રાહકોના વિશ્વાસ જીતવા સમાને છે. તેમ જ અમારી સંસ્થા સાથે દાયકાઓથી સંકળાયેયાલ36 લાખ ડેરી ખેડૂતોના અવિરત પરિશ્રમનું પ્રતિબિંબ છે.
અમૂલના ઉપાધ્યક્ષ ગોર્ધનભાઈ ધામેલિયાનું કહેવું છે કે રૂ. 1 લાખ કરોડના માઇલસ્ટોન સુધીની અમારી સફર સહકારી ભાવનાની સ્પષ્ટ જીત છે. રાષ્ટ્રીય સ્તરે અમારા મોડલને વિસ્તૃત કરીને, અમે સાબિત કરી રહ્યા છીએ કે ‘અમૂલ મોડલ’ આર્થિક લોકશાહી માટે એક શાશ્વત માર્ગદર્શિકા સમાન છે.
કંપનીના મેનેજિંગ ડિરેક્ટર જયેન મહેતાનું કહેવું છે કે ફેડરેશને માત્ર વૈશ્વિક સ્તરે પોતાના ઓપરેશન્સને વિસ્તારવાનું ચાલુ રાખ્યું નથી, પરંતુ ખેડૂતોની માલિકીની સંસ્થા શું હાંસલ કરી શકે તેની વ્યાખ્યા પણ વિસ્તારીને બતાવી રહ્યું છે. અમે ટેક્નોલોજી અને વૈશ્વિક વેપારના લાભો સીધા ઉત્પાદકો સુધી પહોંચે તેની ખાતરી આપી રહ્યા છીએ.
ગુજરાત કોઓપરેટીવ મિલ્ક માર્કેટિંગ ફેડરેશન લિમિટેડ વિશ્વની સૌથી મોટી ખેડૂતોની માલિકીની ડેરી સહકારી સંસ્થા છે, જેમાં 36 લાખ ખેડૂતો જોડાયેલા છે અને જે 50થી વધુ દેશોમાં અમૂલ દૂધ અને દૂધ ઉત્પાદનોનું માર્કેટિંગ કરે છે. અમૂલ દરરોજ સાડા ત્રણ કરોડ લિટર દૂધ એકત્રિત કરે છે અને દર વર્ષે 24 અબજથી વધુ પૅકમાં અમૂલના ઉત્પાદનો એટલે કે દૂધ, માખણ, ચીઝ, ઘી, આઇસ્ક્રીમનું વિતરણ કરે છે.
અમૂલના મોડલથી ખેડૂતને પણ તગડો નફો મળી રહ્યો છે. અમૂલનો સૌથી મોટો ફાયદો એ છે કે દલાલો-વચેટિયાઓ દૂર થઈ રહ્યા છે. ખેડૂતોને તેમના દૂધની સીધી કિંમત મળે છે. ઉદાહરણ આપીને વાત કરીએ તો બજારમાં લિટરદીઠ રૂ. 60ના ભાવે વેચાતા દૂધમાંથી ખેડૂતોને રૂ. 50થી 51 મળે છે. આમ લગભગ 80–85 ટકા કિંમત સીધી ખેડૂતોના ખાતામા જ જાય છે. દેશના બીજા રાજ્યોની તુલનાએ ગુજરાતના ખેડૂતોને દૂધના ભાવ અંદાજે 30થી 50 ટકા ઊંચા મળે છે. આમ અમૂલ મોડેલ હેઠળ ખેડૂતોને દૂધના ભાવ વધારે મળે છે.
દૂધથી ખેડૂતની માસિક આવક
સરેરાશ નાના દૂધ ઉત્પાદક ખેડૂતને દર મહિને અંદાજે રૂ. 7500થી 9,000ની આવક માત્ર દૂધ થકી જ થાય છે. છેલ્લા 7 વર્ષમાં ખેડૂત આવક 3 થી 4 ગણી વધી છે. દૂધ ખરીદીના ભાવ ખાસ્સા વધી ગયા છે. કંપનીને થતો નફો ખેડૂતને જ વધારે ભાવ તરીકે પાછો મળી રહ્યો છે. આમ અમૂલ વધારે કમાય, તો ખેડૂતને પણ વધારે ચૂકવે છે. અમૂલના આ મોડેલનો પ્રોફિટ શેરિંગ મોડેલ તરીકે ઓળખાવવામાં આવે છે.
આ લાભ ગુજરાતના આશરે 36 લાખ ખેડૂતો સીધો મળી રહ્યો હોવાનું કહી શકાય તેમ છે. ભારતના સહકારી ડેરીના નેટવર્કમાં 1.6 કરોડથી વધુ દૂધ ઉત્પાદકો અમૂલ સાથે જોડાયેલા છે. આમ રોજ રોજ કરોડો રૂપિયાની આવક ગ્રામ્ય અર્થતંત્રમાં જાય છે. તેમ જ ખેડૂતો તરફ દૈનિક રોકડ પ્રવાહ સતત ચાલુ જ રહે છે. અમૂલનું સમગ્ર માળખું ત્રિસ્તરીય છે. આ માળખું પહેલા ગામથી શરૂ થઈને જિલ્લા સુધી વિસ્તરે છે. જિલ્લાથી આગળ જઈને સમગ્ર રાજ્યમાં વિસ્તરી રહ્યું છે. અમૂલ બજાર સાથે સીધી લિન્ક-જોડાણ ધરાવે છે. તેથી રોજ તેને પણ આવક થયા જ કરે છે. ખેડૂતોને દૈનિક અને અઠવાડિયાના ધોરણે તેમના નાણાંની ચૂકવણી કરી દેવામાં આવે છે. દૂધમાંથી માખણ, ચીઝ, ઘી સહિતના ડેરી ઉત્પાદનો બનાવવામાં આવે છે. આમ મૂલ્ય વૃદ્ધિ કરીને પણ અમૂલ આવક વધારે છે. ખેડૂતોની આવકમાં વૃદ્ધિ કરવામાં ફાળો આપે છે. ક્લાઈમેટ ચેન્જની અસર હેઠળ ખેડૂતનો પાક સાવ નિષ્ફળ જાય તો પણ દૂધથી આવક ચાલુ જ રહે છે.
ગુજરાતમાં અમૂલ મોડલના કારણે દૂધ એક નિયમિત આવક સ્ત્રોત બની ગયું છે. ઘરમાં માત્ર એક કે બે ગાય રાખનારા નાના ખેડૂત પણ કમાઈ શકે છે. દૂધ ગામડાંની મહિલાઓ માટે ખાસ આવકનો સ્ત્રોત બની ગયું છે. આમ સ્ત્રીઓના સશક્તિકરણમાં પણ અમૂલ ફાળો આપી રહી છે. સમગ્રતયા અમૂલને કારણે ગુજરાતના ખેડૂતો સમૃદ્ધ બની રહ્યા છે. સહકારથી સમૃદ્ધિનું આ બહુ જ મોટું દ્રષ્ટાંત છે.
