ફાર્મા સેક્ટર્સના શેર્સમાં હવે તેજીના સંકેત

લ્યુપિન અને ઓરોબિન્દો ફાર્મા લાભદાયી રોકાણ બની શકે

ચાર્ટિસ્ટો 2026માં બંને શેર્સ મજબૂત તેજી તરફી ચાલ દર્શાવે તેવો નિર્દેશ જ આપી રહ્યા છે

આગામી મહિનાઓમાં ફાર્મા સેક્ટરની કંપનીઓમાં તેજીનો વક્કર જોવા મળી શકે છે. 2025-26ના નાણાંકીય વર્ષના નવેમ્બર માસના અંત સુધીમાં નિફ્ટી ફિફ્ટીમાં 50 ટકાનો વધારો જોવા મળ્યો છે. બીજીતરફ નિફ્ટી ફાર્મામાં 2.36 ટકાની નરમાઈ જોવા મળી છે. અમેરિકાએ ચાલુ કરેલા ટેરિફ વૉરને પરિણામે ભારતની ફાર્મા કંપનીઓની દવાની નિકાસ પર અવળી અસર પડવાની સંભાવના સાથે ફાર્મા સેક્ટરના શેર્સના પરફોર્મન્સ પર અવળી અસર જોવા મળી રહી છે. અમેરિકાના ટેરિફને કારણે ભારતીય દવાઓની અમેરિકા ખાતેની નિકાસમાં મોટું ગાબડું પડી જવાની દહેશત ઊભી થઈ છે. અમેરિકાની ટેરિફની જાહેરાત પછી ફાર્મા સેક્ટર અને ઇન્ફોર્મેશન ટેક્નોલોજી સેક્ટર-આઈટી સેક્ટરમાં નરમાઈ જોવા મળી હતી. બીજીતરફ ઓટોમોબાઈલ અને બેન્કિંગ સેક્ટરમાં તેજીની ચાલ જોવા મળી હતી. હવે ફરીથી ફાર્મા સેક્ટર અને આઈટી સેક્ટર તરફનો ઝોક વધી રહ્યો હોવાનો નિર્દેશ મળી રહ્યો છે.

Aurobindo Pharma: બુલિશ રિવર્સલ બ્રેકઆઉટ

Aurobindo Pharmaનો શેરમાં 2023થી તેજીની ચાલ શરૂ થઈ હતી. રૂ. 390ની ભાવ સપાટી પરથી ઓરોબિન્દો ફાર્માના શેર્સમાં તેજીની ચાલ શરૂ થઈ હતી. ત્યારબાદના બે વર્ષમાં ઓરોબિન્દો ફાર્માના શેર્સમાં રોકાણ કરનારાઓને 298 ટકાનું વળતર મળ્યું છે. આજે ઓરોબિન્દો ફાર્માના શેરનો ભાવ રૂ. 1580 લાઈફ ટાઈમ હાઈ લેવલે પહોંચી ગયો છે. ઓરોબિન્દો ફાર્માના શેરના ભાવમાં ઓગસ્ટ 2024 થી એપ્રિલ 2025 દરમિયાન સતત સુધારો જોવા મળ્યો છે. આ ગાળામાં શેરના ભાવમાં 36 ટકાનો સુધારો જોવા મળ્યો છે. ઓરોબિન્દો ફાર્માના શેર્સમાં તાજેતરમાં બુલિશ રિવર્સલ પેટર્ન જોવા મળી રહી છે. તેમાં ડિસેન્ડિંગ ટ્રાયંયગ અને રાઉન્ડિંગ બોટમમાંથી બ્રેકઆઉટ આપ્યો હોવાનું જોવા મળી રહ્યું છે.

ટેકનિકલ ચાર્ટમાં ઓરોબિન્દો ફાર્માના શેર્સની કિંમત હવે મહત્વના રેઝિસ્ટન્સ લેવલની આસપાસ હોવાનું જણાઈ રહ્યું છે. ઓરોબિન્દોના શેર્સનું ટ્રેડિંગ અત્યારે 200 દિવસની વધઘટની સરેરાશ કિંમત પર થઈ રહ્યું છે. ઓરોબિન્દો ફાર્માના શેર્સનો આરએસઆઈ-રિલેટીવ સ્ટ્રેન્ગ્થ ઇન્ડેક્સ 60નો બતાવી રહ્યો છે. રિલેટીવ સ્ટ્રેન્ગ્થ ઇન્ડેક્સ તાજેતરમાં શેરના ભાવમાં આવેલા વધારા કે ઘટાડાની ઝડપ અને તીવ્રતાનો નિર્દેશ આપે છે. તેમ જ શેર ઓવર બોટ કે ઓવર સોલ્ડ (જરૂર કરતાં વધુ ખરીદાયો છે કે જરૂર કરતાં વધુ વેચાયો છે તેનો પણ નિર્દેશ આપે છે. આરએસઆઈ 70થી ઉપર જાય તો શેર ઓવર બોટ થયેલો ગણાય છે. તેમ જ 30થી નીચે આરએસઆઈ હોય તો તે ઓવરસોલ્ડ  થયેલો ગણાય છે. અત્યારે ઓરોબિન્દો ફાર્માનો આરએસઆઈ 60નો છે. આમ તે ઓવર સોલ્ડ કે ઓવર બોટ નથી. આમ ઓરોબિન્દો ફાર્માનું રેટિંગ ન્યુટ્રલ-તટસ્થ જણાય છે. તેથી તેના શેરના ભાવમાં નવો ઊછાળો આવવાની સંભાવનાનો નિર્દેશ પણ મળે છે. કોઈપણ શેર ઓવર સોલ્ડ કે ઓવર બૉટ હોય તો તેમાં લેવાલી કરવાનો સમય આવી ગયો હોવાનું નિર્દેશ મળે છે. જોકે કેટલીકવાર આરએસઆઈ ખોટા સિગ્નલ પણ આપતો હોવાનુ જોવા મળે છે. અલબત્ત અત્યારે ઓરોબિન્દો ફાર્માના શેર્સમાં મજબૂત તેજીની ચાલનો નિર્દેશ આપી રહ્યો હોવાનું ચાર્ટ એનાલિસ્ટ જણાવી રહ્યા છે. તેથી 2026ના વર્ષમાં તેમાં તેજીની નવી ચાલ જોવા મળી શકે છે.

Lupin: બુલિશ રિવર્સલ બ્રેકઆઉટ

બીજીતરફ લ્યુપિન લેબોરેટરીના શેરમાં પણ તેજીતરફી રિવર્સલ બ્રેક આઉટ જોવા મળી રહ્યો છે. બુલિશ રિવર્સલ બ્રેકઆઉટ દર્શાવે છે કે શેર્સના ભાવ આગળ વધવામાં આવી રહેલા પ્રતિકારની ભાવ સપાટીને વળોટીને શેરનો ભાવ ઉપર જવા માંડ્યો છે. પરિણામે ચાર્ટમાં એક પેટર્ન બને છે. આ પેટર્ન શેરના ભાવમાં ઘટાડાનો ટ્રેન્ડ પૂરો થયો હોવાનો અને વધારાનો ટ્રેન્ડ ચાલુ થઈ રહ્યો હોવાના નિર્દેશ આપે છે. ચાર્ટની આ ગતિ દર્શાવે છે કે શેર વેચવાલીના દબાણનો પ્રતિકાર કરીને લેવાલી માટેનું દબાણ નિર્માણ કરી રહ્યો છે. આમ ઉપરની તરફનો બ્રેકઆઉટ નિશ્ચિત હોવાનો નિર્દેશ તેના પરથી મળે છે. તેમ જ તેના ટ્રેડિંગ વોલ્યુમમાં વધારો થઈ રહ્યો હોવાનો નિર્દેશ આપે છે. રોકાણકારોને તેની સ્ક્રિપમાં વધુ રસ પડી રહ્યો હોવાનો સંકેત પણ તેના પરથી મળી રહ્યો છે.

આમ તો Lupin-લ્યુપિન લેબોરેટરીઝના શેરમા રોકાણ કરનારાઓને માર્ચ 2023 થી જાન્યુઆરી 2025 સુધીમા સારુ વળતર છૂટ્યું છે. માર્ચ 2023માં રૂ. 630ની સપાટીએથી તેજીનીચાલ બતાવનાર શેર્સનો ભાવ આજે રૂ. 2400 સુધી પહોંચી ગયો છે. આમ રોકાણકારોને પ્રચંડ તેજીનો લાભ મળ્યો છે. ત્યારબાદ લ્યુપિનના શેરના ભાવમાં 26 ટકાનું કન્સોલિડેશન આવ્યું છે. કોન્સોલિડેશનના તબક્કામાં શેરનો ભાવ ઉપર કે નીચે બહુ જતો નથી. ટેકનિકલ શબ્દોમાં કહીએ તો સાંકડી ભાવ રેન્જ-નેરો રેન્જમાં તેનો ભાવ અથડાતો રહે છે. પરંતુ પ્રવર્તમાન ભાવ સપાટીએ શેરના ભાવનું નવું અપર બોટમ બનાવે છે. ત્યારબાદ તે શેરના ભાવ નવી ઊંચાઈ જવા માટે સુધારા તરફી કે વધારા તરફી ચાલ બતાવે છે. આમ નવેસરથી ભાવ વધારા માટેની ચાલ શરૂ કરવા માટેનો પાયો ઊભો કરવાની પ્રક્રિયાને કોન્સોલિડેશન તરીકે ઓળખાવવામાં આવે છે. હવે Lupinના શેરે પણ ડિસેન્ડિંગ (ઘટાડા તરફી) ટ્રાયંગલમાંથી બ્રેકઆઉટ આપીને આગળ વધવાની શરૂઆત કરી દીધી છે. અત્યારે લ્યુપિનના શેરનો ભાવ 200-DMA દિવસની સરેરાશ વધઘટના ભાવની ઉપરની સપાટીએ સ્થિર છે. આ ભાવે તેનું ટ્રેડિંગ ચાલી રહ્યું છે. લ્યુપિનના શેરનો રિલેટિવ સ્ટ્રેન્ગ્થ ઇન્ડેક્સ 60ની ઉપર છે. તેના ભાવમાં અને વોલ્યુમમાં વધારો જોવા મળી રહ્યો છે. આ બધી જ બાબતો 2026માં નવા અપટ્રેન્ડનો સંકેત આપે છે. લ્યુપિનમાં સુધારાની ચાલનો સંકેત આપતા ત્રણ પરિબળો અત્યારે સક્રિય હોવાનું ચાર્ટ પરથી જણાઈ રહ્યું છે. એક, ડિસેન્ડિંગ ટ્રાયઙ્ગલમાંથી બ્રેકઆઉટ કરીને શેરનો ભાવ આગળ વધી ગયો છે. બ્રેકઆઉટ સમયે શેરના વોલ્યુમમાં તેજી જોવા મળી રહી છે. આરએસઆઈ 60ની ઉપર હોવાથી ચાર્ટમાં મજબૂત તેજીનો એન્ગલ રચાઈ રહ્યો છે.

ભારતીય અર્થતંત્રના કુલ સ્તાનિક ઉત્પાદન- GDPના તાજેતરમાં આંકડા જાહેર થયા પછી ભારતીય માર્કેટ વૈશ્વિક બજારોની તુલનામાં મજબૂત સ્થિતિમાં હોવાનો નિર્દેશ મળી રહ્યો છે. આમ ફંડામેન્ટલની દ્રષ્ટિએ તથા ટેક્નિકલ ચાર્ટને દ્રષ્ટિએ બંને શેરના ભાવમાં તેજીનો નિર્દેશ મળી રહ્યો છે. બીજીતરફ ઇન્ડેક્સ ઑલ-ટાઈમ હાઈ નજીક હોય, ત્યારે સેક્ટર સિલેક્શન ખૂબ મહત્વનું બને છે. ફાર્મા સેક્ટરે અગાઉ બજારની તેજીમાં ભાગ નહીં લીધો હોય તો પણ હવે નવી તેજીની ચાલનો તે હિસ્સો બની રહે તેવા ભરપૂર નિર્દેશો મળી રહ્યા છે. Auropharma અને Lupin—બંને ટેક્નિકલ બ્રેકઆઉટ, બુલિશ RSI અને વધતા વોલ્યુમ સાથે 2026 માટે મજબૂત ઉમેદવાર છે. આ બંને સ્ટૉક્સ વૉચલિસ્ટમાં રાખવા લાયક છે.