કપાસની આયાત વધીને 60 લાખ ગાંસડીના રેકોર્ડ સ્તરે પહોંચવાની શક્યતા

કપાસની આયાત વધીને 60 લાખ ગાંસડીના રેકોર્ડ સ્તરે પહોંચવાની શક્યતા

ફાર્મ ટુ ફેશન અને ફેશન ટું ફોરેનનું વડા પ્રધાન નરેન્દ્ર મોદીનું સપનું વધારે સારી રીતે સાકાર થઈ શકશે.

કપાસના સ્થાનિક વપરાશમાં વધારો થઈ રહ્યો છે અને આ સિઝનમાં તે 348 લાખ ગાંસડીએ પહોંચવાનું અનુમાન હોવાથી નિકાસને અસર પહોંચી છે. ભારતથી કપાસની નિકાસ 18 લાખ ગાંસડીથી ઘટીને 15 લાખ ગાંસડી થઈ ગઈ છે. પરિણામે મૂલ્ય વર્ધન-વેલ્યુ એડિશનની પ્રવૃત્તિ ભારતમાં વધી ગઈ હોવાનો નિર્દેશ મળી રહ્યો છે. તેથી ગારમેન્ટ અને ફેબ્રિક્સની નિકાસ વધી શકે છે. તેમ જ ફાર્મ ટુ ફેશન અને ફેશન ટું ફોરેનનું વડા પ્રધાન નરેન્દ્ર મોદીનું સપનું વધારે સારી રીતે સાકાર થઈ શકશે.

વેપારી સંસ્થા ‘કોટન એસોસિએશન ઓફ ઇન્ડિયા’ (CAI) એ સપ્ટેમ્બરે પૂરી થતી 2025-26ની સિઝન માટે કપાસની આયાતના અનુમાનમાં 13 લાખ ગાંસડીનો વધારો કરીને તેને 60 લાખ ગાંસડી (પ્રત્યેક 170 કિલો)ની નવી ઊંચાઈએ પહોંચાડ્યો છે. 11 ટકા ડ્યુટી મુક્તિનો લાભ લઈને વપરાશકાર ક્ષેત્ર દ્વારા રેકોર્ડ વિદેશી ખરીદી કરવામાં આવી રહી હોવાના કારણે આ તારણ કાઢવામાં આવ્યું છે. અગાઉ વેપારી સંસ્થાએ આ વર્ષ માટે 47 લાખ ગાંસડી આયાત થવાનો અંદાજ મૂક્યો હતો.

બુધવારે કપાસ ઉત્પાદનનો તાજેતરનો અંદાજ જાહેર કરતા CAI એ જણાવ્યું હતું કે 2025-26 દરમિયાન કપાસની આયાત ગયા વર્ષની સરખામણીએ 19 લાખ ગાંસડી વધુ રહેશે. CAI ના પ્રમુખ વિનય એન. કોટક અને CAI ક્રોપ કમિટીના ચેરમેન અતુલ એસ. ગણાત્રાએ એક નિવેદનમાં જણાવ્યું હતું કે, જૂનના અંત સુધીમાં ભારતીય બંદરો પર આશરે 51 લાખ ગાંસડી આવી પહોંચી હોવાનો અંદાજ હોવાનું બિઝનેસ લાઈનને જણાવવામાં આવ્યું છે.

હાલમાં જૂનથી ઓક્ટોબરના ગાળા માટે કપાસની આયાત જકાતમુક્ત (ડ્યુટી-ફ્રી) છે. ગણાત્રાએ જણાવ્યું હતું કે સપ્ટેમ્બરના અંત સુધીમાં વધુ 10 થી 15 લાખ ગાંસડીની આયાત થવાની ધારણા છે. તેમણે ઉમેર્યું કે મિલો વધુ આયાત કરી રહી છે અને 11 ટકા ડ્યુટી-ફ્રી લાભ ગુમાવવા માંગતી નથી.

વધુ આયાતનું અનુમાન કરવાની સાથે, CAI એ 2025-26 સિઝન માટે નિકાસના અંદાજમાં 3 લાખ ગાંસડીનો ઘટાડો કર્યો છે, જે અગાઉના 18 લાખ ગાંસડીના અનુમાનથી ઘટીને 15 લાખ ગાંસડી થયો છે. ગયા વર્ષે કપાસની નિકાસ 18 લાખ ગાંસડી હતી. ચાલુ સિઝનમાં 30 સપ્ટેમ્બર સુધીના ગાળામાંથી જૂનના અંત સુધીમાં આશરે 11.25 લાખ ગાંસડી રવાના કરવામાં આવી છે. માલની આવકના આધારે, CAI એ ઉત્પાદન અનુમાન 3 લાખ ગાંસડી વધારીને 337 લાખ ગાંસડી (પ્રત્યેક 170 કિલો) કર્યું છે.

વપરાશમાં વધારો

‘કન્ફેડરેશન ઓફ ઇન્ડિયન ટેક્સટાઇલ ઇન્ડસ્ટ્રી’ (CITI) ના અહેવાલના આધારે, CAI એ 2025-26 દરમિયાન ભારતનો કુલ કપાસ વપરાશ અગાઉના 338 લાખ ગાંસડીના અંદાજથી 10 લાખ ગાંસડી વધારીને 348 લાખ ગાંસડી કર્યો છે. 30 જૂન સુધીમાં વપરાશ 261 લાખ ગાંસડી હોવાનો અંદાજ હતો.

CAI એ 2025-26 ની સિઝન માટે કપાસના કુલ પુરવઠાનો અંદાજ 452.59 લાખ ગાંસડી મૂક્યો છે, જે ગયા વર્ષે 393.59 લાખ ગાંસડી હતો. 2025-26 માટેના કુલ પુરવઠામાં 55.59 લાખ ગાંસડીનો શરૂઆતનો સ્ટોક (ઓપનિંગ સ્ટોક), 337 લાખ ગાંસડીનું નવું ઉત્પાદન અને 60 લાખ ગાંસડીની આયાત સમાવિષ્ટ છે. 2024-25 સિઝન માટે વપરાશમાં થયેલા અનુરૂપ વધારા સાથે સ્ટોકની સરભર (રિકોન્સિલિયેશન) કરવાના નિર્ણય બાદ શરૂઆતના સ્ટોકમાં 5 લાખ ગાંસડીનો ઘટાડો કરવામાં આવ્યો છે.