વિદેશમાં ભારતીય દવાની ગુણવત્તા કે વેપારની ફરિયાદનું હવે ઓનલાઇન ટ્રેકિંગ થશે: DGFT 

ભારતીય ફાર્મા નિકાસકારો પોતાની ફરિયાદ પર સરકારી સ્તરે શું કાર્યવાહી થઈ રહી છે તે ઘરબેઠા ઓનલાઈન જોઈ શકશે.

ભારતથી વિદેશમાં દવાઓ પહોંચાડતા નિકાસકારો માટે કેન્દ્ર સરકારના વાણિજ્ય મંત્રાલય હેઠળના ડાયરેક્ટરેટ જનરલ ઓફ ફોરેન ટ્રેડે એક અતિ મહત્વનો અને રાહતરૂપ નિર્ણય લીધો છે. વિદેશી બજારમાં ભારતીય દવાની ગુણવત્તા અંગેની ફરિયાદો કે વેપારી વિવાદોને લગતી ફરિયાદોનું નિવારણ લાવવા માટે હવે એક નવી અને પારદર્શક સિસ્ટમ અમલમાં મૂકવામાં આવી છે. આ નિર્ણયથી ભારતીય ફાર્મા નિકાસકારો પોતાની ફરિયાદ પર સરકારી સ્તરે શું કાર્યવાહી થઈ રહી છે તે ઘરબેઠા ઓનલાઈન જોઈ શકશે.

શું ફેરફાર કરવામાં આવ્યો?

અત્યાર સુધી જ્યારે કોઈ વિદેશી ખરીદદાર કે કંપની ભારતીય દવા કંપની સામે ગુણવત્તા કે ડિલિવરી અંગે ફરિયાદ કરતી હતી ત્યારે વિદેશમાં આવેલી ભારતીય એમ્બેસી તે બાબતને ત્યાંના અધિકારીઓ સમક્ષ મૂકતી હતી. પરંતુ આ ફરિયાદનું આગળ શું થયું, તે નિકાસકારને સમયસર જાણવા મળતું નહોતું અને વારંવાર ઈમેલ કે અનૌપચારિક ફોલોઅપ કરવા પડતા હતા. હવે નવા નિયમ મુજબ એટલે કે હેન્ડ બુક ઓફ પ્રોસિરજની 2023ની કલમ 8.04(iii) માં સુધારો કર્યા મુજબ વિદેશમાં આવેલી ભારતીય એમ્બેસી અને વાણિજ્ય મંત્રાલયના સંબંધિત વિભાગોએ ફરિયાદ પર શું કાર્યવાહી કરી તે અંગે નિયમિતપણે ડીજીએફટી-ડિરેક્ટોરેટ જનરલ ઓફ ફોરેન ટ્રેડના પોર્ટલ પર લાઈવ અપડેટ આપવું ફરજિયાત બનશે.

નિકાસકારો જોઈ શકશે: નિકાસકાર કંપની પોતાની લોગિન આઈડીથી પોર્ટલ પર જોઈ શકશે કે તેમની ફરિયાદ કયા તબક્કે પહોંચી છે. માત્ર ફરિયાદ વિદેશી અધિકારીઓને મોકલી આપીને કામ પૂરું નહીં થાય, પરંતુ જ્યાં સુધી તે ફરિયાદનો ઉકેલ કે આખરી નિર્ણય ન આવે ત્યાં સુધી સરકારી વિભાગોએ તેને ટ્રેક કરવી પડશે. 

ફાર્મા ક્ષેત્ર માટે આ નિર્ણય કેમ અત્યંત મહત્વનો છે?

ભારત દુનિયાભરમાં દવાઓનો મોટો નિકાસકાર દેશ છે. ઘણી વખત વિદેશી ખરીદદારો કે ત્યાંના ટેક્સ અને હેલ્થ રેગ્યુલેટર્સ નાના-મોટા કારણોસર માલ અટકાવી દેતા હોય છે અથવા ગુણવત્તાના મુદ્દે વિવાદ ઊભો કરતા હોય છે. આ પરિસ્થિતિમાં વિદેશમાં સ્થિત ભારતીય એમ્બેસી (દૂતાવાસ) સીધી રીતે ત્યાંની સરકાર સાથે વાતચીત કરીને યોગ્ય ઉકેલ લાવી શકે છે. હવે સરકાર પોતે દરેક તબક્કાની ઓનલાઈન માહિતી પોર્ટલ પર મૂકશે, જેથી વિદેશી વેપારમાં પારદર્શિતા વધશે અને સમયનો બગાડ અટકશે. સરકારના આ પગલાથી ભારતીય ફાર્મા નિકાસકારોનો સમય અને નાણાં બચશે, તેમજ વિદેશી બજારમાં ભારતીય બ્રાન્ડ અને દવાઓની ગુણવત્તા પ્રત્યેનો વિશ્વાસ વધુ મજબૂત બનશે.