ટ્રમ્પની ઈરાનને ચેતવણી: મારી હત્યા થઈ તો ઈરાનને સંપૂર્ણ નાશ કરી દઈશું
અમારા નેતા સામે આક્રમક વલણ અપનાવવામાં આવશે તો અમે તેના માત્ર હાથ કાપી નાખીશું નહીં, પરંતુ તેમની આખી દુનિયાને આગ લગાવી દઈશું
વોશિંગ્ટનઃ ઈરાન તેમની હત્યા કરાવવાનો પ્રયાસ કરશે તો અમેરિકા ઈરાનને સંપૂર્ણ રીતે નાશ કરી નાખશે. દુનિયાના નકશા પરથી ઇરાનનું અસ્તિત્વ જ મિટાવી દેશે, એવી ચેતવણી મંગળવારે અમેરિકાના પ્રમુખ ડોનાલ્ડ ટ્રમ્પે આપી છે. ટ્રમ્પે NewsNation ચેનલના “Katie Pavlich Tonight” કાર્યક્રમમાં આપેલા ઈન્ટરવ્યૂ દરમિયાન પ્રસ્તુત ચેતવણી આપતા કહ્યું હતું કે, “મેં ખૂબ સ્પષ્ટ સૂચનાઓ આપી દીધી છે કે જો મને કંઈ પણ થાય, તો તેઓ ઈરાનના અસ્તિત્વને જ ધરતી પરથી મિટાવી દેશે.”
અમેરિકા અને ઈરાન વચ્ચે તણાવ વધી રહ્યો છે ત્યારે ડોનાલ્ડ ટ્રમ્પે આ નિવેદન આપ્યું છે. થોડા દિવસો પહેલા જ ટ્રમ્પે ઈરાનના સર્વોચ્ચ નેતા આયાતોલ્લાહ અલી ખામેનીના લગભગ 40 વર્ષથી ચાલતા શાસનનો અંત લાવવા માટે આવાહન કર્યું હતું.
આ નિવેદન બાદ ઈરાને પણ ટ્રમ્પને ચેતવણી આપી હતી કે તેઓ દેશના સર્વોચ્ચ નેતા ખામેની સામે કોઈ પગલું ભરે જ નહિ. ઈરાનની સશસ્ત્ર દળોના પ્રવક્તા જનરલ અબોલફઝલ શેકરચીએ કહ્યું હતું કે, “ટ્રમ્પ જાણે છે કે જો અમારા નેતા સામે આક્રમક વલણ અપનાવવામાં આવશે, તો અમે માત્ર તે હાથ કાપી નાખીશું નહીં, પરંતુ તેમની આખી દુનિયાને આગ લગાવી દેશું.”
ટ્રમ્પે અગાઉ પણ કહ્યું હતું કે તેમણે પોતાના સલાહકારોને સ્પષ્ટ સૂચના આપી છે કે જો તેમની હત્યા પાછળ ઈરાનનો હાથ હશે, તો ઈરાનને સંપૂર્ણ રીતે નષ્ટ કરી દેવામાં આવે.
