ઓડિટ રિપોર્ટ ફાઈલ કરવાની તારીખ ચૂક્યા તો રૂ. 75000ની ફી ભરવી પડશે
બજેટના માધ્યમથી નિર્મલા સીતારમણે નવી જોગવાઈ દાખલ કરી
દંડની જોગવાઈ સામે અપીલમાં જવાની જોગવાઈ હોવાથી પેનલ્ટીને બદલે ફી શબ્દ ઉમેરવામાં આવ્યો
ફી ચૂકવ્યા વિના વિલંબથી ઓડિટ રિપોર્ટ ફાઈલ કરી શકાશે જ નહિ, વિલંબ માફ કરવાની આવકવેરા અધિકારીઓની સત્તા છીનવાઈ
અમદાવાદઃ નાણાં મંત્રી નિર્મલા સીતારમણે ઓડિટ રિપોર્ટ ફાઈલ કરવામાં વિલંબ કરનારાઓને છેલ્લી તારીખ વીતિ ગયા પછી ઓડિટ રિપોર્ટ ફાઈલ કરનારે રૂ. 75000ની ફી ચૂકવવી પડશે. તેમાં બીજી સ્પષ્ટતા એ કરવામાં આવી છે. કે હવે આ પેનલ્ટી નહિ, પરંતુ ફી ગણવામાં આવશે. પેનલ્ટીને કાયદાકીય કોર્ટમાં પડકારી શકાતી હતી, તેથી પેનલ્ટી કર્યા પછી કોર્ટ કેસ થતાં હતા. તેને પડકારવામાં આવતી હતી, પરંતુ ફી સામે કોઈ જ કોર્ટમાં જવાની ગુંજાયશ નહિ. પહેલી એપ્રિલ 2026થી નવી જોગવાઈ લાગુ પડશે.
ઓડિટ રિપોર્ટ ફાઈલ કરવાની છેલ્લી તારીખ વીતિ ગયા પછી રૂ. 75000ની ફી ભરવી પડશે, પરંતુ, તેની ઉપર પણ એક મહિનો કે વધુ સમય થઈ જાય અને ઓડિટ રિપોર્ટ ફાઈલ કરવામાં નહિ આવ્યો હોય તો તે કંપનીને કે પછી પ્રોફેશનલ્સે રૂ. 1.5 લાખની ફી ચૂકવવી પડશે.,એમ આવકવેરાના કાયદાના જાણકાર મૃદંગ વકીલનું કહેવું છે. જૂની કાયદાકીય જોગવાઈ મુજબ ઓડિટ રિપોર્ટ ફાઈલ કરવાની તારીખ ચૂકી જનારાઓ તરફથી આવકવેરા અધિકારી સમક્ષ કરવામાં આવતી રજૂઆતમાં યોગ્ય લાગે તો અધિકારી પોતે જ ડિલે કોન્ડોન કરી દેતા હતા. પરિણામે કંપનીઓને આ સમસ્યા નડતી નહોતી. તેથી વિલંબ પછીય પેનલ્ટી થતી નહોતી. પરંતુ આ વખતના બજેટમાં અધિકારી પાસેથી પેનલ્ટી વેવ કરવાની સત્તા જ છીનવી લેવામાં આવત હતી. જૂની પ્રોવિઝનમાં કંપનીના કુલ ટર્નઓવરના અડધા ટકા કે પછી રૂ. 1.5 લાખ બેમાંથી જે ઓછું હોય તેટલી પેનલ્ટી કરવામાં આવતી હતી.
પહેલી ફેબ્રુઆરી 2026ના રજૂ કરવામાં આવેલા બજેટમાં કરવામાં આવેલી જોગવાઈ મુજબ 30મી સપ્ટેમ્બર સુધીમાં ઓડિટ રિપોર્ટ ફાઈલ ન થાય તો પહેલી ઓક્ટોબરે રૂ. 75000ની ફી લાગી જશ. પહેલી ઓક્ટોબર કે તે પછી ઓડિટ રિપોર્ટ ફાઈલ કરવા માટે પહેલા ફી પેટે રૂ. 75000 જમા કરાવવા ફરજિયાત છે.આ ફી જમા ન કરાવે તો તેવા સંજોગોમાં તેમના ઓડિટ રિપોર્ટ અપલોડ થઈ શકતા નથી. એક મહિનાથી વધુ વલિંદ થાય તો રૂ. 1.50 લાખ ભરવા જ પડે છે. ત્યારબાદ જ ઓડિટ રિપોર્ટ ફાઈલ થઈ શકશે.
આમ આ બજેટમાં આકારણી અધિકારીને પોતાની વિવેકબુદ્ધિ પર નિર્ણય લેવાની જૂની જોગવાઈને રદ કરી દેવામાં આવી છે. તેમ જ તેની સામે ફરજિયાત ફી ચૂકવવાની જોગવાઈ લાવી દેવામાં આવી છે. પરિણામે 30મી સપ્ટેમ્બર રાત્રે બાર વાગ્યા પહેલા રિપોર્ટ ફાઈલ કરી દેવો પડશે.
ઓડિટ રિપોર્ટ કોણે ફાઈલ કરવા પડે
ઓડિટ રિપોર્ટ ફાઈલ કરવાને પાત્ર વ્યક્તિઓ અને કંપનીઓમાં 10 કરોડથી વધુનું ટર્નઓવર ધરાવતી કંપનીઓ, ભાગીદારી પેઢીઓ, માલિક, પ્રોપરાયટર, એલએલપીને ઓડિટ રિપોર્ટ ફાઈલ કરવા પડે છે. તેમ જ પ્રોફેશનલ્સમાં આવકના 50 ટકાથી ઓછો નફો બતાવલા લોકોને ઓડિટ રિપોર્ટ ફાઈલ કરવા પડે છે. તેમ જ 10 કરોડથી ઓછું ટર્નઓવર ધરાવતી કંપનીએ રોકડમાં ટ્રાન્ઝેક્શન 5 ટકાથી વધુ કર્યો હોય તો તેમને માટે પણ ઓડિટ રિપોર્ટ ફાઈલ કરવો ફરજિયાત છે. પરિણામે હવે દરેક વ્યક્તિ સમયસર ઓડિટ રિપોર્ટ ફાઈલ કરતાં થઈ જશે. અત્યાર સુધી ઓડિટ રિપોર્ટ ફાઈલ કરવામાં સુસ્તી દાખવનારાઓ ડિલે થવા માટે કારણો આપી દેતા હતા અને અધિકારીઓ સાથે સમજી લેતા હતા તેથી આ જોગવાઈ હોવા છતાં ઓડિટ રિપોર્ટ ફાઈલ થવામાં અસાધારાણ વિલંબ થતો હતો. હવે તેમાં વિલંબ થવાની શક્યતા ઘટી જશે. છતાંય વિલંબ કરનારાઓ રૂ. 75,000થી રૂ. 1.5 લાખની ફી ફરજિયાત ચૂકવવી જ પડશે.
