FIEO-ગુજરાત સરકાર દ્વારા આયોજિત આંતરરાષ્ટ્રીય બાયર-સેલર મીટ: 2,200થી વધુ બિઝનેસ મીટિંગનું આયોજન, 500 કરોડથી વધુની એક્સપોર્ટ ઇન્ક્વાયરીઝ પ્રાપ્ત
ઉદ્યોગ પ્રતિનિધિઓ તરફથી આ બે-દિવસીય કાર્યક્રમને અદ્દભૂત પ્રતિસાદ મળ્યો હતો. કાર્યક્રમમાં 17 દેશોના 40 આંતરરાષ્ટ્રીય બાયર્સ (ખરીદદારો) અને ગુજરાત અને સમગ્ર ભારતમાં વિવિધ ક્ષેત્રોનું પ્રતિનિધિત્વ કરતા 850થી વધુ ભારતીય નિકાસકારો વચ્ચે 2,200થી વધુ વન-ટુ-વન મીટિંગ્સનું આયોજન કરવામાં આવ્યું હતું.
ડાયરેક્ટર જનરલ ઑફ ફોરેન ટ્રેડ (DGFT) અજય ભાદૂ (આઇએએસ) અને ગુજરાત સરકારના સૂક્ષ્મ, લઘુ અને મધ્યમ ઉદ્યોગો (MSME) કમિશનર સંદીપ જે. સાગલેએ બાયર-સેલર મીટમાં હાજર રહીને બાયર્સ અને સેલર્સ બંને સાથે સંવાદ કર્યો અને વૈશ્વિક વેપાર સંબંધોને વેગ આપવા અને ગુજરાતની નિકાસ ક્ષમતાને પ્રોત્સાહન આપવા માટેના પ્રયાસોની પ્રશંસા કરી.
FIEOના પ્રમુખ એસ. સી. રાલ્હને જણાવ્યું કે, બે-દિવસીય આંતરરાષ્ટ્રીય બાયર-સેલર મીટમાં કાપડ, ફાર્માસ્યુટિકલ્સ, રસાયણો, કૃષિ અને ફૂડ પ્રોસેસિંગ અને એન્જિનિયરિંગ ગુડ્સ જેવા મુખ્ય ક્ષેત્રો કેન્દ્રસ્થાને હતા. આ આયોજન વૈશ્વિક વેપાર જોડાણો વધારવા અને સપ્લાય ચેઇન ભાગીદારીને મજબૂત બનાવવા માટે એક મજબૂત માધ્યમ બન્યું હતું. આ ઉપરાંત, તેણે ગુજરાતને અગ્રણી નિકાસ કેન્દ્ર તરીકે સ્થાપિત કરવામાં મહત્વની ભૂમિકા ભજવી હતી.
