વેપારીઓ ખાંડની સંગ્રહખોરીથી દૂર રહેઃ ખાંડના વેપારીઓ માટે સ્ટોક મર્યાદા ૩૦ દિવસ અને ૪,૦૦૦ ક્વિન્ટલ કરી
સરકારે ખાંડના વેપારીઓ માટે સ્ટોક મર્યાદા ૩૦ દિવસ અને ૪,૦૦૦ ક્વિન્ટલ નક્કી કરી
દેશમાં ખાંડનો પૂરતો સ્ટોક ઉપલબ્ધ છે. તેમણે સંસ્થાકીય ખરીદદારો તેમજ જથ્થાબંધ અને છૂટક વેપારીઓને તાજેતરના ભાવવધારા વચ્ચે સટ્ટાકીય ખરીદીથી દૂર રહેવા વિનંતી કરી હતી.
સરકારનો નવા આદેશનો અમલ પહેલી ઓગસ્ટ 2026થી 30મી નવેમ્બર 2026 સુધી ચાલુ રહેશે
ખાંડના ભાવ નિયંત્રણમાં રાખવાના પ્રયાસોના ભાગરૂપે સરકારે મંગળવારે આદેશ આપ્યો છે કે ખાંડનો કોઈ પણ વેપારી ૩૦ દિવસથી વધુ સમય માટે સ્ટોક રાખી શકશે નહીં. આ સાથે જ ૪,૦૦૦ ક્વિન્ટલની મહત્તમ સ્ટોક મર્યાદા પણ લાગુ કરવામાં આવી છે. આ આદેશ ૧ ઓગસ્ટ, ૨૦૨૬થી અમલમાં આવશે અને ૩૦ નવેમ્બર, ૨૦૨૬ સુધી લાગુ રહેશે.
એક ગેઝેટ નોટિફિકેશનમાં, ખાદ્ય અને ગ્રાહક બાબતોના મંત્રાલયે આવશ્યક ચીજવસ્તુ ધારા, ૧૯૫૫ની કલમ ૩ અને સુગર (કંટ્રોલ) ઓર્ડર, ૨૦૨૫ હેઠળ મળેલી સત્તાનો ઉપયોગ કરીને આ નિયંત્રણ લાગુ કર્યું છે. નોટિફિકેશનમાં જણાવવામાં આવ્યું છે કે, કેન્દ્ર સરકાર આ સાથે જ નિર્દેશ આપે છે કે ખાંડનો કોઈ પણ વેપારી માલ મળ્યાની તારીખથી ૩૦ દિવસથી વધુ સમય માટે સ્ટોક રાખી શકશે નહીં અને દેશમાં ક્યાંય પણ ૪,૦૦૦ ક્વિન્ટલથી વધુ ખાંડનો સ્ટોક રાખી શકશે નહીં.
અપૂરતા ચોમાસાની આગાહી વચ્ચે ખાંડના ભાવ નિયંત્રણમાં રાખવા માટે કેન્દ્ર સરકારે ખાંડની નિકાસ પર પહેલાથી જ પ્રતિબંધ મૂકી દીધો છે. આ આદેશ સરકારી ખાતામાં રહેલા સ્ટોક, અથવા જાહેર વિતરણ વ્યવસ્થા હેઠળ વાજબી ભાવની દુકાનો દ્વારા વિતરણ કરવા માટે રાજ્ય સરકાર અથવા તેના દ્વારા અધિકૃત અધિકારી દ્વારા નામાંકિત વેપારીઓ પાસે રહેલા સ્ટોકને લાગુ પડશે નહીં. મંત્રાલયે જણાવ્યું હતું કે રાજ્ય સરકારો અથવા કેન્દ્રશાસિત પ્રદેશોના વહીવટીતંત્રે સ્ટોક મર્યાદા અને ટર્નઓવરની સમયસીમા નક્કી કરવી જોઈએ, પરંતુ શરત એ રહેશે કે તે આ આદેશમાં દર્શાવેલ મર્યાદા કે સમયગાળાથી વધુ ન હોવી જોઈએ.
સ્ટોક રાખવાનો સમયગાળો ગણવા માટે, વેપારીને માલ મળ્યાની તારીખનો પણ સમાવેશ કરવામાં આવશે. મંત્રાલયે તમામ વેપારીઓને પોર્ટલ પર ખાંડના સ્ટોકની સ્થિતિ જાહેર કરવા અને તેને નિયમિતપણે અપડેટ કરવા જણાવ્યું છે. મે મહિનામાં, ભારતે સ્થાનિક ઉપલબ્ધતા વધારવા અને ભાવ અંકુશમાં રાખવાના હેતુથી આ વર્ષે ૩૦ સપ્ટેમ્બર સુધી ખાંડની નિકાસ પર તાત્કાલિક અસરથી પ્રતિબંધ મૂકી દીધો હતો. સરકારે સપ્ટેમ્બરે પૂરા થતા ૨૦૨૫-૨૬ના માર્કેટિંગ વર્ષ માટે લગભગ ૧૬ લાખ ટન ખાંડની નિકાસ કરવાની મંજૂરી આપી છે.
ઇન્ડિયન સુગર મિલર્સ એસોસિએશન (ISMA) એ ઇથેનોલ ઉત્પાદન માટે ખાંડનો ઉપયોગ કર્યા પછી ૨૦૨૫-૨૬ માર્કેટિંગ સીઝન માટે કુલ ઉત્પાદન ૨૯.૩ મિલિયન ટન રહેવાનો અંદાજ મૂક્યો છે, જે ૨૦૨૪-૨૫માં નોંધાયેલા ૨૬.૧૨ મિલિયન ટન કરતાં વધુ છે. ૧૭ જુલાઈના રોજ, ખાંડ ઉદ્યોગના સંગઠનો ISMA અને NFCSF એ ભારપૂર્વક જણાવ્યું હતું કે દેશમાં ખાંડનો પૂરતો સ્ટોક ઉપલબ્ધ છે. તેમણે સંસ્થાકીય ખરીદદારો તેમજ જથ્થાબંધ અને છૂટક વેપારીઓને તાજેતરના ભાવવધારા વચ્ચે “સટ્ટાકીય ખરીદી” (સટ્ટાખોરી)થી દૂર રહેવા વિનંતી કરી હતી.
