ગ્રીન એનર્જી સેક્ટરના શેર્સ હવે મલ્ટીબેગ બને તેવી સંભાવના

મલ્ટીબેગર બનવાની સંભાવના ધરાવતા બે શેર્સમાં રોકાણકારો સમજી વિચારીને નિર્ણય લે તો તેના ભાવમાં તગડો વધારો થવાની સંભાવના હોવાનું નિષ્ણાતો માને છે

શેરબજારમાં દરેક તબક્કે નવા નવા સેક્ટરના શેર્સનો ઉદય થવાની ઘટના બન્યા જ કરે છે. તેમાં ચઢાવ ઉતાર પણ આવ્યા જ કરે છે. આવનારા મહિનાઓ અને વરસો હવે ગ્રીન એનર્જીના શેર્સની ડિમાન્ડના અને તેના ભાવમાં જબરદસ્ત વધારાના રહેવાની સંભાવના છે. પરિણામે વહેલો તો તે પહેલો લાભ લણનાર બની શકે છે. નીચી ભાવ સપાટીએ એન્ટ્રી લઈને લાંબા ગાળા માટે રોકાણને પકડી રાખનારને તગડો લાભ થવાની શક્યતાને નિષ્ણાતો જોઈ રહ્યા છે. આ માન્યતા છે ભારતના વોરન બફેટ તરીકે ઓળખાતા સુપર ઇન્વેસ્ટર વિજય કેડિયાની. ફાઈનાન્શિયલ એક્સપ્રેસમાં આપેલા અહેવાલમાં તેમણે બે નવી સ્મોલ-કેપ કંપનીઓમાં રોકાણ કર્યું છે. એક એન્જિનિયરિંગ કંપની છે, જેને તેમણે જૂન 2024માં વેચી દીધી હતી અને હવે ફરીથી ખરીદી છે, જ્યારે બીજી એક એવી એનર્જી કંપની છે જે પાવર ટ્રાન્સમિશન માટે એન્ડ-ટુ-એન્ડ સોલ્યુશન્સમાં વૈશ્વિક નેતા છે. ડિસેમ્બર 2025 ત્રિમાસિકના એક્સચેન્જ ફાઇલિંગમાં જણાવ્યા  મુજબ માર્કેટ માસ્ટર વિજય કેડિયાએ પોતાના પોર્ટફોલિયોમાં બે નવા સ્ટોક ઉમેર્યા છે. હાલમાં તેમનો પોર્ટફોલિયો રૂ.1,133 કરોડથી વધુનો છે અને તેમાં કુલ 17 શેર્સનો સમાવેસ થાય છે.

તેમણે જે બે કંપનીઓના શેર્સ ખરીદ્યા તેમાંથી એક કંપની એન્જિનિયરિંગ સેક્ટરની કંપની છે. આ કંપનીમાં તેઓ એક વર્ષથી વધુ સમય સુધી રોકાયેલા હતા અને જૂન 2024 દરમિયાન તેમણે કંપનીમાંનો તેમનો શેર હિસ્સો ઘટાડીને 1 ટકાથી નીચે લાવી દીધો હતો. હવે ફરીથી તેમણે તેમાં 1.01 ટકા હિસ્સો ખરીદ્યો છે. બીજી કંપની પાવર ટ્રાન્સમિશન, સબસ્ટેશન અને ટેલિકોમ ઇન્ફ્રાસ્ટ્રક્ચર માટે વૈશ્વિક સ્તરે એન્ડ-ટુ-એન્ડ સોલ્યુશન આપતી કંપની છે.

આ બંને કંપનીઓમાં એક સામાન્ય બાબત છે. છેલ્લા પાંચ વર્ષમાં તેમના નફામાં મજબૂત વૃદ્ધિ જોવા મળી છે. હાલમાં મોટા ડિસ્કાઉન્ટ પર ટ્રેડ થઈ રહેલા શેર કિંમત. શું વિજય કેડિયા મોટા ટર્નઅરાઉન્ડ પર દાવ લગાવી રહ્યા છે? ચાલો વિગતવાર જોઈએ.

1949માં સ્થપાયેલી પટેલ એન્જિનિયરિંગ લિ. ડેમ, બ્રિજ, ટનલ, રોડ, પાઇલિંગ વર્ક્સ, ઔદ્યોગિક માળખાં અને હેવી સિવિલ એન્જિનિયરિંગ પ્રોજેક્ટ્સમાં કાર્યરત છે. કંપની હાઇડ્રો, સિંચાઇ, વોટર સપ્લાય, અર્બન ઇન્ફ્રાસ્ટ્રક્ચર અને ટ્રાન્સપોર્ટ ક્ષેત્રમાં સક્રિય છે. રૂ.2,960 કરોડની માર્કેટ કેપ ધરાવતી આ કંપનીમાં વિજય કેડિયાની હિસ્સેદારી માર્ચ 2023થી જૂન 2024 સુધી હતી. ડિસેમ્બર 2025ના ત્રિમાસિક ફાઇલિંગમાં જણાવ્યા મુજબ તેમણે ફરીથી રૂ.30 કરોડનું 1.01% હિસ્સો ખરીદ્યો છે. જાન્યુઆરી-માર્ચ 2023 દરમિયાન જ્યારે કેડિયાએ પ્રથમ વખત શેર ખરીદ્યો ત્યારે કિંમત અંદાજે રૂ.15 હતી. એપ્રિલ-જૂન 2024માં જ્યારે વેચાણ થયું ત્યારે શેર રૂ.60 આસપાસ હતો — એટલે કે 4 ગણો નફો.

હવે પ્રશ્ન એ છે કે શું આ ઘટનાનું નવેસરથી પુનરાવર્તન થશે? કંપનીની વેચાણ આવક FY20માં રૂ.2,617 કરોડથી FY25માં રૂ.5,093 કરોડ સુધી પહોંચી ગઈ છે. કંપનીનો સર્વગ્રાહી વિકાસ દર CAGR 14 ટકાનો રહ્યો છે. કંપનીનો EBITDA FY20માં રૂ.185 કરોડ હતો તે FY25માં વધીને રૂ.740 કરોડ સુધી પહોંચ્યો છે. કંપનીના નફામાં FY21ની ભારે નુકસાન બાદ ટર્નઅરાઉન્ડ થયો છે. 16 જાન્યુઆરી 2026ના બંધ ભાવ મુજબ શેર રૂ.30 પર ટ્રેડ થતો હતો. જે તેના સર્વકાલીન ઊંચા ભાવ રૂ.717થી 96 ટકા અને 52-અઠવાડિયાના ઊંચા ભાવ રૂ.52થી 42 ટકા ઓછો છે. હાલમાં શેરનું PE 8x છે, જ્યારે ઉદ્યોગનું મધ્યમ PE 18x છે. કંપનીની ઓર્ડર બુક તગડી છે. રૂ.15,000 કરોડના ઓર્ડર બુક અને પાંચ વર્ષમાં નફાનો સર્વગ્રાહી વિકાસદર-CAGR 180 ટકા છે. તેમ છતાં, કંપનીની કન્ટિન્જન્ટ લાયબિલિટીઝ અને આર્બિટ્રેશન સંબંધિત જોખમો પર રોકાણકારોએ નજર રાખવી જરૂરી છે.

અદ્વૈત એનર્જી: ગ્રીન હાઇડ્રોજનની સફર

2009માં સ્થાપવામાં આવેલી અદ્વૈત એનર્જી ટ્રાંઝિશન્સ લિ. પાવર ટ્રાન્સમિશન, સબસ્ટેશન અને ટેલિકોમ ઇન્ફ્રાસ્ટ્રક્ચર માટે વિશ્વ સ્તરની અગ્રણી કંપની છે. 2023માં કંપનીએ ગ્રીન હાઇડ્રોજન અને સોલર પાવર ક્ષેત્રમાં પ્રવેશ કર્યો છે. વિજય કેડિયાએ ડિસેમ્બર 2025માં કરેલા ફાઇલિંગ મુજબ કંપનીમાં તેમણે રૂ.17 કરોડનું ઇન્વેસ્ટમેન્ટ કરીને કંપનીનો 1.1 ટકા શેર હિસ્સો ખરીદ્યો છે.

કંપનીએ FY20માં રૂ.45 કરોડની આવકથી FY25માં રૂ.399 કરોડ સુધી પહોંચીને 55 ટકા CAGR-સર્વગ્રાહી વિકાસદર નોંધાવ્યો છે. કંપનીનો નફો FY20માં રૂ.1 કરોડ હતો તે FY25માં વધીને રૂ.32 કરોડ થઈ ગયો છે. જાન્યુઆરી 2021માં શેરનો ભાવ રૂ. 26 હતો, જે 16 જાન્યુઆરી 2026એ રૂ.1,359 થયો છે. આમ તેમાં 5,127 ટકાનો વધારો જોવા મળ્યો છે. આ ભાવ વધારાને પરિણામે કંપનીના શેરમાં પાંચ વર્ષ પહેલાં રૂ.1 લાખનું કરેલું રોકાણ આજે રૂ. 52.27 લાખ બની ગયું છે. હાલમાં કંપનીનો શેર તેના સર્વોચ્ચ ભાવ રૂ.2,419થી 44 ટકા ડિસ્કાઉન્ટ પર ટ્રેડ થઈ રહ્યો છે. કંપની પાસે રૂ.1,070 કરોડના ઓર્ડર બુક છે. પરિણામે મજબૂત ગ્રોથ રહેવાની છે. તેમ જ વિજય કેડિયાની એન્ટ્રી ગ્રીન એનર્જી ટ્રાંઝિશન પર મજબૂત વિશ્વાસ દર્શાવતી હોવાનું પ્રસ્થાપિત થશે.

વિચારી લેજો આ ટર્નઅરાઉન્ડ છે કે ટ્રેપ?

વિજય કેડિયાની નવી રોકાણ ચાલ હંમેશા બજારમાં ચર્ચાનો વિષય બને છે. મજબૂત નફાકારક વૃદ્ધિ અને મોટા ઓર્ડર બુક ધરાવતી આ બંને કંપનીઓ રોકાણકારોમાં ઉત્સુકતા જગાવે છે. પટેલ એન્જિનિયરિંગમાં ફરી પ્રવેશ કદાચ ફરી એકવાર 4x રિટર્નની તૈયારી હોઈ શકે છે.