H-1B વિઝા માટે અરજી કરનારાઓને 2027 સુધી મંજૂરી નહિ મળે
ભારતીય H-1B વિઝા અરજદારો વારંવાર ઇન્ટરવ્યૂ રદ થવાની ફરિયાદ કરી રહ્યા છે, જ્યારે કેટલાકના સ્ટેમ્પિંગની તારીખો હવે 2027 સુધી ધકેલાઈ ગઈ છે, અમેરિકી કોન્સ્યુલેટ્સમાં બેકલોગને કારણે આ સ્થિતિ નિર્માણ થઈ રહી હોવાનું જાણવા મળી રહ્યું છે. ભારતીય H-1B અરજદારો ઇન્ટરવ્યૂ રદ થવાની જાણ કરે છે.
અમેરિકા જવા માટે એચ-1બી વિઝા માટે અરજી કરનારાઓને હવે એપ્રિલ–મે 2027માં જ ઇન્ટરવ્યુની તારીખ આપવામાં આવે તેવી સંભાવના છે. આમેય H-1B વિઝા ધરાવતા ભારતીયો લાંબા વિલંબનો સામનો કરતા રહે છે કારણ કે ઇન્ટરવ્યૂ સ્લોટ્સ ઉપલબ્ધ કરાવવામાં આવતા જ નથી. હવે કેટલીક એપોઇન્ટમેન્ટ્સ 2027 સુધી ધકેલાઈ રહી છે.
અગાઉ ડિસેમ્બર 2025માં સેંકડો H-1B ધારકો વિઝા ઇન્ટરવ્યૂ માટે ભારત આવ્યા હતા, પરંતુ તેમને જણાવાયું કે વધારાની સોશિયલ મીડિયા સ્ક્રીનિંગને કારણે તેમની એપોઇન્ટમેન્ટ્સ 2026 સુધી મોકૂફ રાખવામાં આવી છે. જાન્યુઆરી અને ફેબ્રુઆરી 2026 માટે નક્કી થયેલી કેટલીક એપોઇન્ટમેન્ટ્સ પણ પાછી ઠેલવામાં આવી છે.
જોકે ઇમિગ્રેશન વકીલો અને નિષ્ણાતોનું કહેવું છે કે ખાસ કરીને H-1B કેસોમાં અત્યંત ગંભીર બની ગઈ છે. વિદેશમાં ફસાયેલા મોટાભાગના H-1B ધારકો માટે કોઈ વાસ્તવિક વિકલ્પ જ રહ્યો નથી. આ તમામ નીતિ પરિવર્તનોનો સંયુક્ત પ્રભાવ, પૂરતી સૂચના વિના અચાનક અમલ, ઈમર્જન્સી રાહતના નિયમિત ઇનકાર અને વર્કઅરાઉન્ડ્સની સમાપ્તિએ H-1B કાર્યક્રમમાં અભૂતપૂર્વ સંકટ ઊભું કર્યું છે.
H-1B વિઝા ઇન્ટરવ્યૂ વિલંબ 2027 સુધી લંબાયા
ઘણા H-1B અને H-4 અરજદારોએ સોશિયલ મીડિયામાં US Visa Helpdesk તરફથી મળેલા ઇમેઇલના સ્ક્રીનશોટ સોશિયલ મિડીયા પર મૂક્યા છે. તેમાં તેમની એપોઇન્ટમેન્ટ વારંવાર રદ થતી દેખાય છે. એક અરજદારે પોસ્ટ કરેલા ઇમેઇલમાં લખેલું હતું. “તમારી એપોઇન્ટમેન્ટ 2/5/2026ના રોજ સવારે 10:30 વાગ્યે રદ કરવામાં આવી છે. કૃપા કરીને વિગતો માટે તમારા ખાતામાં લૉગ ઇન કરો.” પછીના ઇમેઇલમાં લગભગ એક વર્ષ પછીની નવી તારીખ આપવામાં આવી હતી: “શેડ્યુલિંગ ફેરફારોને કારણે, તમારી US વિઝા એપોઇન્ટમેન્ટને નવી તારીખ અને સમયે ફરીથી નક્કી કરવામાં આવી છે: 5/24/2027 સવારે 10:45 વાગ્યે તમારે ઇન્ટરવ્યુ માટે આવવાનું રહેશે. તમને કોલ સેન્ટર અથવા કોન્સ્યુલેટનો સંપર્ક કરવાની જરૂર નથી, ફક્ત નવી તારીખે હાજર રહેવા વિનંતી છે. આથી તમને થયેલી અસુવિધા બદલ અમને ખેદ છે.
પરિણામે, ઘણા અરજદારો ઓનલાઈન પોતાની નિરાશા વ્યક્ત કરી રહ્યા છે. ઘણા લોકોએ જણાવ્યું કે વારંવાર રદ થતી એપોઇન્ટમેન્ટ્સ અને એક વર્ષથી વધુ આગળ ધકેલાતી તારીખોને કારણે કામકાજના પ્રોજેક્ટ્સ અથવા પરિવારની મુસાફરીનું આયોજન કરવું અશક્ય બની ગયું છે.
અચાનક નિયમ બદલાવથી વિઝા ગરબડ સર્જાઈ હોવાનું નિષ્ણાતો કહે છે. હાલના H-1B વિઝા વિલંબ એક રાતમાં થયા નથી. એચ-1બી વિઝા અંગેની નીતિમાં અચાનક બદલાવ આવ્યા પછી શરૂ થયા હતા. એચ-1બી વિઝાના ઘણા અરજદારો કહે છે કે કોઈ ચેતવણી કે તૈયારી વિના અમલમાં મૂકી દેવામાં આવ્યા છે.
આમ તો 3 ડિસેમ્બર 2025ના રોજ અમેરિકાના વિદેશ ખાતાએ તમામ H-1B અને H-4 અરજદારો માટે ફરજિયાત સોશિયલ મીડિયા વેટિંગ જાહેર કરી દીધુ હતું. તેનો અમલ 15 ડિસેમ્બરથી ચાલુ કરી દેવામાં આવ્યો હતો. આમ અચાનક નીતિમાં આવેલા પરિવર્તને અરજદારોને આગોતરી સૂચના વિના ઊંઘતા જ ઝડપી લીધા હતા. ભારત અને અન્ય ઊચ્ચ વોલ્યુમ પોસ્ટ્સમાં આવેલા કોન્સ્યુલેટ્સે તરત જ એપોઇન્ટમેન્ટ્સ રદ કરવાનું શરૂ કર્યું હતું અને મોટા ભાગે એક વર્ષ પછી ફરી શેડ્યુલ કરી આપી હતી.
અમેરિકાની એચ-1બી વિઝા પર નોકરી આપતી કંપનીઓએ તાત્કાલિક વ્યાવસાયિક જરૂરિયાતો દસ્તાવેજ સાથે રજૂ કરી હોવા છતાં ઈમર્જન્સી એપોઇન્ટમેન્ટની અરજીઓ નિયમિત રીતે નકારી કાઢવામાં આવી રહી છે. નવા વેટિંગની પ્રક્રિયાને કારણે કોન્સ્યુલેટ પોસ્ટ્સે દૈનિક ઇન્ટરવ્યૂ ક્ષમતામાં 40 ટકા સુધી ઘટાડો કર્યો છે. તેથી જ મોટો બેકલોગ સર્જાયો છે.
આ રીતે વિલંબ કરવાની સાથે સાથે જ અમેરિકાના વિદેશ ખાતાએ વિઝાની પ્રુડેન્શિયલ રીવોકેશન-સમજણ પૂર્વક રદ કરવાની પ્રક્રિયા પણ ચાલુ કરી દીધી છે. H-1B ધારકો અને તેમના H-4 આધારિત સભ્યોને અસર કરે છે. કેટલાક કિસ્સાઓમાં H-1B જીવનસાથીના જૂના DUI રેકોર્ડને કારણે H-4 જીવનસાથીનો વિઝા રદ કરવામાં આવ્યો છે. પ્રુડેન્શિયલ રીવોકેશન સત્તાવાળાઓને નવો માહિતી મળ્યે વિઝા રદ કરવાની મંજૂરી આપે છે.
સોશિયલ મીડિયા સ્ક્રીનિંગ અને બેકલોગ
વિલંબ 15 ડિસેમ્બર 2025થી શરૂ થયો, જ્યારે યુએસે રોજગાર આધારિત વિઝા માટે ફરજિયાત સોશિયલ મીડિયા સ્ક્રીનિંગની પ્રથા લાગુ કરી છે. આ પ્રકારની સ્ક્રિનિંગના દરેક કેસમાં આશરે 30 મિનિટ ઉમેરે છે અને દૈનિક એપોઇન્ટમેન્ટ ક્ષમતાને અડધી કરી દે છે.
નવા વર્ષની પૂર્વસંધ્યાએ X (પૂર્વે ટ્વિટર) પર પોસ્ટમાં, ભારતમાં આવેલા અમેરિકી દૂતાવાસના અધિકારીઓએ એચ-1બી વિઝાના અરજદારોને ચેતવણી આપી હતી કે “અમેરિકાના ઇમિગ્રેશન કાયદાનું ઉલ્લંઘન કરવાથી પરિણામો ભોગવવા પડશે,” જ્યારે દસ હજારો લોકો ઇન્ટરવ્યૂ બેકલોગને કારણે માર્ચ 2026 સુધી ફસાયેલા રહ્યા છે.
રિમોટ વર્ક કાયદેસર છે, પરંતુ વાસ્તવિક નથી
અમેરિકાના ઇમિગ્રેશનના કાયદામાં કંઈ પણ એવું નથી જે H-1B ધારકોને ભારતમાંથી તેમના યુએસ નોકરીદાતાઓ માટે રિમોટ વર્ક કરવાથી રોકી શકે છે. પરંતુ વ્યવહારિક રીતે, ઘણા નોકરીદાતાઓ વ્યાવસાયિક, સુરક્ષા અથવા ઓપરેશનલ કારણોસર આ વ્યવસ્થા મંજૂર કરતા નથી. જો વિદેશમાં ફસાયેલો H-1B ધારક ભારતમાંથી રિમોટ વર્કની મંજૂરી આપનાર નોકરીદાતાની કંપની છોડીને બીજી કંપનીમાં નોકરી કરવા જાય તો 21 સપ્ટેમ્બર 2025ના પ્રેસિડન્ટ પ્રોક્લેમેશન-પ્રમુખની જાહેરાત હેઠળ લાગુ પડતી $100,000 એન્ટ્રી ફી ટ્રિગર થાય છે એટલે કે ભરવી પડે છે. આ ફી કોઈપણ નવા H-1B પિટિશન પર લાગુ પડે છે જો લાભાર્થી યુનાઇટેડ સ્ટેટ્સ બહાર હોય. પરિણામે, કામદારો એક તરફ એવા નોકરીદાતા સાથે ફસાઈ જાય છે જે રિમોટ વર્ક મંજૂર ન કરે અને બીજી તરફ છ આંકડાની દંડ ફી ચૂકવીને નોકરી બદલવાની મજબૂરી વચ્ચે ફસાઈ જાય છે. લોકોના જીવન પર તેની વિનાશક અસર પડી છે.
