અમદાવાદની એસવીપી હોસ્પિટલે આર્કિમિડિઝને ટેન્ડર વિના ૭ વર્ષમાં રૂ.૩૧.૨૫ કરોડ ચૂકવ્યા
રૂ. ૫ લાખથી વધુનું કામ ટેન્ડરથી કરાવવાનો નિયમ હોવા છતાં ટેન્ડર સિસ્ટમની ઐસી તેસી કરીને સોંપી દવામાં આવી રહેલા કામ
નવા ટેન્ડર ઇશ્યૂ કરવાને બદલે ૨૦૧૮થી ૨૦૨૫માં ઠરાવ કરી છથી આઠવાર ટેન્ડરની મુદત એક્સટેન્ડ કરી આપી
અમદાવાદઃ સરકારના કોઈપણ કામકાજ કરાવવાનું મૂલ્ય રૃા. ૫ લાખથી વધારે હોય તો ટેન્ડર ઇન્વાઈટ કરીને જ કામ સોંપવાનો નિયમ હોવા છતાં અમદાવાદની સરદાર વલ્લભભાઈ પટેલ-એસવીપી હોસ્પિટલના સત્તાવાળાઓએ આર્કિમિડીઝ તરીકે ઓળખાતી કંપનીને છેલ્લા સાત વર્ષમાં ટેન્ડર વિના રૃા. ૩૧.૨૫ કરોડનું ચૂકવણું કરી દીધું છે. હોસ્પિટલ ઇન્ફોર્મેશન મેનેજમેન્ટ કન્સલ્ટન્સીના કામકાજ માટે રુ. ૩૧.૨૫ કરોડનું ચૂકવણી કરી દેવામાં આવ્યું છે.
આ ઓછું હોય તેમ ડિસેમ્બર જાન્યુઆરી ૨૦૨૫-૨૬માં ટેન્ડર મંગાવ્યા પછી માત્ર આર્કિમિડેઝેનું જ ટેન્ડર આવ્યું ત્યારે રિટેન્ડરિંગ કરવાના પરંપરાનો છેદ ઉડાડી દઈને તેને જ આર્કિમિડિઝને જ ટેન્ડર આપી દેવામાં આવ્યું છે. એક માત્ર ટેન્ડર પણ મેનેજમેન્ટ કન્સલ્ટન્સીનું જ હતું. આમ વગર ટેન્ડરે વરસે બીજી રૃા. ૫૦ લાખની કામગીરી સોંપી દેવામાં આવી છે. અગાઉ મંજૂર કરેલા ટેન્ડરમાં ૨૦૧૮ની સાલથી છ-છ મહિનાના એક્સટેન્સન પણ આપવામાં આવી રહ્યા છે. આ રીતે અંદાજે ત્રણ વત્તા બે મળીને પાંચ વર્ષનું એક્સટેન્શન આપવમાં આવ્યું છે.
હોસ્પિટલના જ સૂત્રોનું કહેવું છે કે ટેન્ડર મંગાવ્યા પછી એક જ કંપની ટેન્ડર ભરે તો તે કંપનીનું ટેન્ડર માન્ય રાખવાની પ્રથા નથી. તેને બદલે સંબંધિત ડેપ્યુટી કમિશનર કે અધિકારી નવેસરથી ટેન્ડર મંગાવીને કામની સોંપણી કરે છે. હા, બીજીવાર પણ એક જ ટેન્ડર આવે તો તેવા સંજોગોમાં એક ટેન્ડરને આધારે કામ સોંપવાની નોબત આવે તો સંબંધિત અધિકારી પરિસ્થિતિને ધ્યાનમાં લઈને એકમાત્ર ટેન્ડર ભરનારને કામગીરી સોંપી શકે છે.
તદુપરાંત આર્કિમિડીઝ તરીકે ઓળખાતી કંપનીને એલ.જી. હોસ્પિટલ, શારદાબેન હોસ્પિટલ અને નગરી હોસ્પિટલના ઓપીડીમાં આવતા કે પછી હોસ્પિટલમાં સારવાર લેવા માટે આવતા પેેશન્ટ્સનો રેકોર્ડ તૈયાર કરવાની કામગીરી સોંપવામાં આવી છે. આ કામકાજ પણ ટેન્ડર વિના જ સોંપી દેવામાં આવ્યા હોવાનું બહાર આવી રહ્યું છે.
ટેન્ડર વિના આર્કિમિડીઝને કયા વર્ષે કેટલું પેમેન્ટ કરાયું
વર્ષ પેમેન્ટ
૨૦૧૮-૧૯ રૃા. ૫,૨૭,૮૮,૦૭૩
૨૦૧૯-૨૦ રૃા. ૪,૧૧,૧૧,૩૮૪
૨૦૨૦-૨૧ રૃા. ૪,૦૩,૯૦,૪૫૬
૨૦૨૧-૨૨ રૃા. ૪,૮૮,૭૨,૧૦૮
૨૦૨૨-૨૩ રૃા. ૩,૪૬,૦૦,૮૦૫
૨૦૨૩-૨૪ રૃા. ૪,૨૨,૦૦,૬૯૩
૨૦૨૪-૨૫ રૃા. ૨,૯૧,૫૮,૭૧૧
૨૦૨૫-૨૬ રૃા. ૨,૩૪,૪૫,૮૩૦
